Vikan - 26.02.1987, Blaðsíða 44
Næstu dagar eru aldeilis skemmtilegir, bolludagur,
sprengidagur og öskudagur. Á bolludaginn háma allir
í sig rjómabollur með súkkulaði. Á sprengidaginn er það
saltkjöt með baunum - túkall og loks er öskudagurinn.
Það er alltaf að aukast að krakkar klæði sig í furðuföt
á öskudaginn og máli sig í framan. Sumir eiga grímubún-
inga eða geta fengið þá lánaða en aðrir þurfa að finna
upp á einhverju sniðugu til að vera í.
Það er aldeilis hægt að láta hugmyndaflugið ráða og
nota næstum hvað sem er í búninginn, gömul föt, tusk-
ur, poka, kassa, svamp og svo framvegis. Á mörgum
heimilum eru til gömul föt sem hægt er að nota. Munið
bara að biðja um leyfi áður en þið hefjið framkvæmdirn-
ar svo að þið skemmið ekkert sem á að nota síðar.
Þó að veðrið hafi verið óvenjugott í
vetur skuluð þið vera við öllu búin
ef þið ætlið að vera úti í búningnum
ykkar. Klæðið ykkur því vel. Það er
hægt að vera í búningi utan yfir ykk-
ar venjulegu fötum, búa til skikkju
yfir úlpuna og skreyta hatta og húf-
ur. Vefjið marglitum slæðum utan
um hatt eða festið hattinn á kollinn
með slæðu, þá fýkur hann ekki út í
loftið. Kíkið í tískublöð hjá mömmu
eða frænku og fáið hugmyndir. Próf-
ið að vefja treflum og klútum um
höfuðið, kannski mörgum í einu, og
sjáið hvað það getur komið skemmti-
lega út.
Finnið garnafganga, búið til alla-
vega lita dúska og saumið á húfu.
Úr garni er líka hægt að búa til hár-
toppa og fléttur og þá er auðveldast
að festa toppinn eða fléttuna á húfu.
Gleraugu
Ef þið eigið grímu notið þið hana
en það er líka gaman að hafa skraut-
leg gleraugu. Gömul gleraugu, sem
glerin vantar í, eru tilvalin. Sumir
eiga flott sólgleraugu og þeir sem
nota gleraugu daglega geta breytt
þeim með því að krumpa álpappír
og setja á umgjörðina.
Með andlitsfarða er hægt að breyta
sér ótrúlega. í búðunum fæst andlits-
málning fyrir krakka og kannski fáið
þið lánað málningardótið hjá
mömmu. En notið alls ekki tússliti,
þeir fara illa með húðina og það er
hræðilega erfitt að ná þeim af. Þið
getið málað freknur, skegg og fleira,
allt eftir því hvað þið ætlið að vera.
X
44 VIKAN 9. TBL