Sameiningin - 01.04.1960, Page 10

8
Sameiningin
hefir dvalizt við Háskóla íslands og orðið hvers manns
hugljúfi, og bróðir hans, séra Harald, starfaði tvö ár sem
kennari við Guðfræðideild háskólans og samstarfið með
honum þar er meðal minna beztu og hugljúfustu minninga,
og hans sakna allir, nemendur og samkennarar. Mér er
það einlægt áhugamál, að sambandið milli kirknanna megi
enn eflast á raunhæfan hátt. Og sú afmælisgjöf, sem ég hef
þá ánægju að færa yður frá þjóðkirkju íslands á þessari
hátíð, á að vera áþreifanlegur vottur um vilja vorn til
þess að styrkja tengslin vor í milli. íslenzka kirkjan hefir
í tilefni þessa afmælis lagt fram nokkra fjárupphæð til
þess að stofna sjóð, er verja skal til þess að stuðla að gagn-
kvæmum heimsóknum og kynnum. Sjóðurinn verður í
vörzlu biskups íslands. Ég vona, að hann eigi eftir að koma
að notum og leiða til þess, að hinn blessaði arfur ávaxtist
betur með oss beggja vegna, sakir gagnkvæmrar örvunar
og uppbyggingar.
En sjálfur Drottinn vor Jesús Kristur og Guð, faðir vor,
sem elskaði oss og gaf oss í náð eilífa huggun og góða von,
huggi hjörtu yðar og styrki í sérhverju góðu verki og
orði. (II. Þess. 2:7).
(Þetta ávarp var flutt í upphafi kirkjuþings s. 1. sumar.)