Fréttablaðið - 12.05.2011, Blaðsíða 66

12. maí 2011 FIMMTUDAGUR50
golfogveidi@frettabladid.is
136 66ÁHUGAKYLFINGAR léku 17. holuna á TPC Sawgrass-vellinum á meðan sérfræðingar golf.com
fylgdust með. Holan er 100 metra löng par 3 og er flötin
á lítilli eyju úti í vatni.
SLÓGU Í VATNIÐ eða 49 prósent. Meðalforgjöfin
hjá kylfingunum var 15,5. Aðeins tveir fengu fugl og
fimmtíu par. Players-mótið hefst á TPC Sawgrass í dag.
Einn magnaðasti kylfingur allra
tíma, Severiano Ballesteros, var
lagður til hinstu hvílu í heimabæ
sínum í gær. Hann lést, 54 ára að
aldri, aðfaranótt laugardags eftir
langvinna baráttu við krabbamein,
en verður minnst fyrir afrek sín og
hæfileika. Hann var einn dáðasti
íþróttamaður sinnar kynslóðar og
fyrirmynd kylfinga um allan heim.
„Hann var náttúrlega fyrsti Evr-
ópubúinn til að vinna Masters og í
raun sá sem kom evrópsku golfi á
kortið. Svo var hann frábær kylf-
ingur, skemmtilegur karakter og
elskaður af áhorfendum,“ segir
Sigurður Pétursson, afrekskylf-
ingur og golfkennari, í samtali við
Fréttablaðið.
Seve stökk með miklum látum
inn á sjónarsviðið þar sem hann
vann sinn fyrsta sigur á Evrópu-
mótaröðinni árið 1976, 19 ára að
aldri. Hann lét ekki staðar numið
þar, heldur varð hann efstur á
tekjulista mótaraðarinnar og það
afrek endurtók hann næstu tvö ár.
Strax var ljóst að stjarna var
fædd, enda hafði Seve mikla
útgeislun og lék af sannri ástríðu.
Keppnisskapið og sigurviljinn var
einstakur hjá honum, auk þess
sem stutta spilið hjá honum var
óviðjafnanlegt.
Tiger Woods lét þau orð falla
eftir andlátið að annar eins kylf-
ingur og Seve myndi aldrei aftur
koma fram.
Lengi mætti telja upp afrek
Seves, en til dæmis sigraði hann
á fimm risamótum, þrisvar í
Ryder-keppninni og alls 50 sinn-
um á Evrópumótaröðinni, sem
eru fleiri sigrar en nokkur annar
kylfingur getur státað af. Hann
varð sex sinnum tekjuhæstur á
mótaröðinni og þrisvar kylfingur
ársins og trónaði á toppi heims-
listans í 61 viku samtals á níunda
áratugnum.
Erfið bakmeiðsli settu mark
sitt á seinni hluta ferils Seves
þar sem hann landaði sínum síð-
asta sigri árið 1995. Eftir það fór
að halla undan fæti og þrátt fyrir
margar tilraunir til að snúa aftur
hafði hann ekki erindi sem erfiði.
Lokaafrekið á ferli hans var þegar
hann stýrði Ryder-liði Evrópu til
sigurs árið 1997.
„Seve var mikill leiðtogi,“ bætir
Sigurður við. „Það sást best í
Ryder þegar hann reif liðið upp á
rassinum þar.“
Seve hætti keppni endanlega
árið 2007, en í október 2008 veikt-
ist hann alvarlega og gekkst í
framhaldinu undir aðgerðir og
lyfjameðferð vegna heilaæxlis.
Hann náði nokkrum bata um stund
og var farinn að reyna sig aftur
á golfvellinum, en hrakaði aftur
eftir það.
Allir helstu kylfingar heims
hafa vottað Seve virðingu sína og
sóttu margir útförina í gær. Hans
verður lengi minnst, og nú er jafn-
vel talað um að mynd af honum
verði sett í merki Evrópumóta-
raðarinnar. thorgils@frettabladid.is
Golfheimurinn syrgir
mikinn meistara
Severiano Ballesteros er látinn, 54 ára að aldri. Spánverjinn geðþekki er sigur-
sælasti kylfingur Evrópu frá upphafi. Hann vann fimm risatitla á ferlinum.
GOÐSÖGN Seve Ballesteros verður lengi minnst fyrir afrek sín og frammistöðu á golfvellinum. Hér er hann í sveiflu á Wentworth
árið 1978 þar sem hann var nær einráður um árabil á heimsmótinu í holukeppni. NORDICPHOTOS/GETTY
■ Sigursælasti kylfingur Evrópu-
mótaraðarinnar með 50 sigra
■ Fimm risatitlar:
- Opna breska (‘79, ‘84, ‘88)
- Masters (‘80, ‘83)
■ Sex sinnum tekjuhæstur á
Evrópumótaröðinni, þrisvar
valinn kylfingur ársins
■ Sat á toppi heimslistans í 61
viku
■ Sigursælasta tvíeyki í sögu
Ryder-keppninnar með José
María Olazábal með 12 stig úr
15 leikjum
■ Fjórir PGA-sigrar
■ Alls 91 sigur á mótum víða um
heim, síðast árið 1995.
Helstu afrek:
TRYGGÐU ÞÉR MIÐA STRAX
„Critics choice“
Time Out, London
„Þessi leiksýning hefur allt
sem þarf til að skapa vel
heppnað og
eftirminnilegt leikverk.“
I.Þ., Mbl.
Miðasala | 568 8000 | borgarleikhus.is
fim. 12/5 kl. 20 – lau. 21/5 kl. 20 – fös. 27/5 kl. 20
Klæðaburður á golfvöllum hefur valdið mörgum kylfingum heilabrotum. Hinrik Gunnar Hilmarsson, sem annast hefur
eftirlit, vallarvörslu og dómgæslu hjá Golfklúbbi Reykjavíkur, leggur þetta til málanna:
■ Það er ljóst að skoðanir kylfinga um klæðaburð á golfvöllum eru mjög skiptar. Hvað sem því líður eru það klúbb-
arnir sem setja reglur um klæðaburð á sínum völlum og hafa að sjálfsögðu fullan rétt til þess.
■ Kylfingar sem spila golf í útlöndum fara eftir þessum reglum enda annað ekki í boði. Reglurnar
eru misjafnar. Til dæmis banna sumir klúbbar gallabuxur, það verður að vera kragi á bolnum sem
kylfingar klæðast, ekki má nota aðra skó en golfskó, ekki má vera í æfingabuxum og svo framvegis.
Þessar reglur eru einnig misjafnar eftir löndum og kylfingar sem spilað hafa á Bretlandseyjum vita
að þar geta reglurnar verið mjög strangar. Engu að síður fara kylfingar eftir þeim.
■ Hér á landi hafa margir golfklúbbar sett reglur um klæðaburð og ber að fara eftir þeim alveg eins og
við brjótum ekki staðarreglur eða golfreglur. Sætti kylfingar sig ekki við þessar reglur verða þeir
að fara eitthvert annað, svo einfalt er það.
■ Dæmisaga: Fyrir meira en hálfri öld þegar íslendingar byrjuðu að fara í golfferðir voru hjón
að spila í Edinborg, sólin skein og orðið mjög heitt. Þau ákváðu því að fara úr að ofan,
konurnar á brjóstahaldaranum og karlarnir berir að ofan. Innan fárra mínútna kom
vallarstarfsmaður til þeirra, vísaði þeim stystu leið af vellinum með ósk um að þau
héldu sig frá vellinum í framtíðinni.
Hollráð Hinna: Klæðaburður golfarans
Golfvellir á höfuðborgarsvæðinu:
Flatir opnar víða um helgina
Opnun sumarflata
Vellir á höfuðborgarsvæðinu
Hlíðavöllur (GKJ) opið
Korpúlfsstaðir (GR) opið
Nesvöllur (NK) opið
Urriðavöllur (GO) á morgun
Hvaleyrarvöllur (GK) á morgun
Setbergsvöllur (GSE) á morgun
Grafarholtsvöllur (GR) laugardaginn
Mýrin (GKG) laugardaginn*
Bakkakotsvöllur (GOB) Óvíst**
*Flatir í Leirdal opna helgina 21.-22. maí
** Stefnt að opnun um helgina
Ástand golfvalla er almennt
með ágætum.
Víða á höfuðborgarsvæð-
inu er þegar búið að opna
sumarflatir en þeir golf-
klúbbar sem ekki eru búnir
að því gera það annaðhvort
á morgun eða um helgina.
Undantekningin er Leirdalur
hjá Golfklúbbi Garðabæjar
og Kópavogs. Stefnt er að því
að opna flatir þar helgina 21.-
22. maí.
- th