Morgunblaðið - 03.04.2009, Page 36
36 MenningFÓLK
MORGUNBLAÐIÐ FÖSTUDAGUR 3. APRÍL 2009
Fólk
Eftir Jóhann Bjarna Kolbeinsson
jbk@mbl.is
TÓNLISTARHÁTÍÐIN Nokia on Ice verður
haldin í annað sinn í kvöld, en að þessu sinni
verður hún í Listasafni Reykjavíkur og á Só-
dómu Reykjavík. Það ber trúlega helst til tíðinda
að hljómsveitin Bang Gang mun spila á hátíðinni,
en nokkuð er síðan sveitin spilaði síðast hér á
landi. „Ég verð með bandið sem ég hef verið með
upp á síðkastið. Ég var svo heppinn að fá þá Arn-
ar og Nóa úr Leaves, Hrafn Thoroddsen og
franska bassaleikarann Stéphane Bertrand til
liðs við mig,“ segir Barði Jóhannsson, forsprakki
Bang Gang, sem lofar flottum tónleikum í kvöld.
„Þegar við héldum útgáfutónleikana komst sér-
legur ljósa- og myndvarpamaður okkar ekki.
Hann kemst hins vegar núna, þannig að þetta
verður heilmikið „show“, mjög myndrænt allt
saman.“
Aðspurður segir Barði að sveitin muni að-
allega spila lög af nýjustu plötu sinni, Ghosts
From The Past, en einnig eitthvað af Something
Wrong og svo eitt lag af You.
Bang Gang spilar í Listasafni Reykjavíkur
ásamt Dr. Spock, Jeff Who? og Sometime. Á Só-
dómu Reykjavík spila hins vegar Mammút,
Sudden Weather Change, Bárujárn, Cosmic Call
og DJ Matti. Tónleikarnir hefjast kl. 22 og miða-
sala fer fram á midi.is. Miðaverð er 2.500 krónur
og athygli er vakin á því að takmarkað magn
miða er í boði á hátíðina.
Myndvarpamaðurinn kemst á Nokia on Ice
Myndrænn Barði lofar flottum tónleikum í kvöld.
Uppselt er fyrir löngu á minning-
artónleika um Rúnar Júlíusson
sem fram fara í Laugardalshöll 2.
maí næstkomandi. Það eru synir
Rúnars, þeir Baldur og Júlíus, sem
standa að tónleikunum en þeir hafa
svo safnað í kringum sig fjöldanum
öllum af tónlistarmönnum og
hljómsveitum sem með einum eða
öðrum hætti urðu á vegi Rúnars
Júlíussonar á langri og farsælli ævi
tónlistarmannsins. Vegna fjölda
áskorana hefur verið ákveðið að
bæta við aukatónleikum sama dag
kl. 16. Miðaverð verður 1.000 krón-
um lægra en á aðaltónleikana en
dagskráin verður þó hin sama.
Hefst miðasala í dag kl. 10.
Eftirfarandi listamenn og hljóm-
sveitir koma fram: Áhöfnin á Hala-
stjörnunni, Bjartmar Guðlaugs,
Björgvin Halldórsson, Buff (Lónlí
blú bojs-syrpa), Deep Jimi and the
Zep Creams, Eiríkur Hauksson
(GCD-syrpa), Hjaltalín, meðlimir
Hljóma, Jóhann Helgason, Karla-
kór Keflavíkur, Krummi, KK, Lif-
un, Páll Óskar, Unun & Helgi
Björns, Sálin hans Jóns míns, Shady
Owens, Stuðmenn og meðlimir Trú-
brots.
Aukatónleikar til
minningar um Rúna Júl.
Aprílgabb Bjarkar Guðmunds-
dóttur virðist hafa slegið í gegn á
veraldarvefnum ef marka má
google-leitarforritið. Á heimasíðu
söngkonunnar sagði frá því að
breska rokksveitin Led Zeppelin
hefði ráðið Björk til að syngja með
bandinu á væntanlegri heimstón-
leikaferð í kjölfar ákvörðunar Rob-
erts Plant um að tónleikaferð hans
með Alison Krauss gengi fyrir.
Fréttin fór eins og eldur í sinu um
veraldarvefinn og hver bloggsíðan
á fætur annarri póstaði viðbrögð
við henni. Í athugasemdakerfum
blogg- og fréttasíðna var fréttinni
alla jafna tekið vel og margir lýstu
því yfir að nú gætu þeir loksins
hlustað á Led Zeppelin.
Almenn ánægja
með Björk í Zeppelin
Eftir Jóhann Bjarna Kolbeinsson
jbk@mbl.is
„MIG hefur lengi langað til að
gera þetta, koma til Íslands og
spila út um allt land. Það passaði
rosalega vel að gera það núna, að
byrja tónleikatörn ársins á Ís-
landi,“ segir færeyska tónlist-
arkonan Eivör Pálsdóttir sem hef-
ur tónleikaferð sína um Ísland í
kvöld. Eivör kemur fram á sjö
tónleikum næstu sex dagana, og
verða þeir víða um land.
„Þetta verða fyrstu tónleikarnir
þar sem ég spila með nýju hljóm-
sveitinni minni, og líka fyrstu tón-
leikarnir þar sem ég flyt nýtt
efni,“ segir Eivör sem hefur feng-
ið þrjá vel valda tónlistarmenn
með sér í lið, Færeyingana Ben-
jamin Petersen (gítar) og Mikael
Blak (bassi) og finnska slagverks-
leikarann Abdissa „Mamba“ As-
sefa, sem er raunar af eþíópískum
ættum. Aðspurð segist Eivör vera
að hugsa um nafn á nýju hljóm-
sveitina sína, en ekki vera búin að
finna neitt enn sem komið er.
„Ég ætla að spila svolítið bland-
að prógramm, bæði gamalt efni og
svo annað sem er alveg nýtt og
verður á plötunni minni sem kem-
ur líklega út í október,“ segir Ei-
vör og bætir því við að tónlistin á
nýju plötunni verði líklega tölu-
vert hrárri en það sem áður hefur
heyrst frá henni.
„Ég er reyndar ekki komin
mjög langt með hana, ég er að
vinna í hugmyndum. Maður veit
náttúrlega aldrei hvað gerist í
stúdíóinu, en ég hugsa að hún
verði aðeins hrárri en það sem ég
hef gert hingað til.“
Íslendingar eru stríðsmenn
Mikið stendur annars til hjá Ei-
vöru á árinu. „Ég fer til dæmis til
Kanada og verð þar í heilan mán-
uð á tónleikaferðalagi í sumar, en
svo fer ég líka til Noregs, Svíþjóð-
ar og jafnvel fleiri Norðurlanda,“
segir hún.
Eivör er búsett í Færeyjum, en
hún kemur þó reglulega til Ís-
lands. Aðspurð segir hún að vissu-
lega finnist sér ástandið í efna-
hagslífi þjóðarinnar hræðilegt.
„En tilfinningin sem ég fæ þeg-
ar ég kem hingað er að fólk sé al-
mennt bjartsýnt, og ég held að
það sé mikill styrkur fyrir fólk. Ís-
lendingar eru stríðsmenn og
kunna að standa sig í svona
ástandi. Þið eruð náttúrlega vík-
ingar,“ segir Eivör og hlær.
Eins og fram hefur komið hafa
Færeyingar verið duglegir við að
styrkja Íslendinga á þessum erf-
iðu tímum, bæði andlega og fjár-
hagslega. Eivör segir það ekkert
nema sjálfsagt. „Þjóðir eins og
Færeyingar og Íslendingar eiga
auðvitað að hjálpa hvor annarri
þegar svona ástand kemur upp.
Þannig er ég til dæmis búin að fá
styrk frá heimabænum mínum,
Götu, fyrir tónleikana mína í
Borgarnesi og Vestmannaeyjum,
enda eru þetta vinabæir. Þannig
að það verður ókeypis á þá tón-
leika, og það er frábært að geta
boðið upp á það.“
Miðasala er á midi.is.
Spilar fyrir víkingana
Eivör Pálsdóttir leggur í tónleikaferðalag um Ísland Hefur leikinn á Nasa í
Reykjavík í kvöld Ókeypis á tónleika hennar í Borgarnesi og Vestmannaeyjum
Morgunblaðið/Golli
Eivör Færeyska gyðjan mun heiðra Íslendinga um land allt með nærveru sinni næstu daga. Er það vel.
3. apríl kl. 20: Nasa, Reykjavík
4. apríl kl. 20:
Græni hatturinn, Akureyri
4. apríl kl. 23:
Græni hatturinn, Akureyri
5. apríl kl. 20.30:
Hólaneskirkja, Skagaströnd
7. apríl kl. 20:
Bíóhöllin, Akranesi
8. apríl kl. 20:
Menntaskólinn, Borgarnesi
9. apríl kl. 16: Hvítasunnu-
kirkjan, Vestmannaeyjum
Tónleikar Eivarar
Án hvers geturðu ekki verið? Lofts.
Hvar læturðu helst til þín taka á
heimilinu? Klárlega mestir hæfi-
leikar í eldhúsinu og minnstir í til-
tektinni.
Hversu pólitísk ertu á skalanum frá
1-10? Örugglega svona 7 en er samt
að gera mér betur grein fyrir því
með aldrinum að þessir flokkar eru
allir eins.
Fortíðin er sorgleg, nútíminn ótrygg-
ur – Guði sé lof að við eigum enga
framtíð. Er þetta Ísland í dag? (spyr
síðasti aðalsmaður, Valur Freyr Ein-
arsson, leikari) Ég reyni alltaf að
líta jákvæðum augum á morgundag-
inn, finnst þetta ansi neikvætt sjón-
armið … :)
Hvernig myndir þú vilja deyja? Er
ekki hægt að lifa að eilífu?
Hvaða málsháttur á best við þig?
Ég er ekki búin að fá páskaegg
ennþá, en þessi er góður: Að hika er
sama og tapa.
Hverju myndirðu vilja breyta í eigin
fari? Stærri brjóst, minni rass og
magi, stærri varir, lengri lappir. Æ
ég reyni að vera sátt eins og ég er,
maður er að verða svo gamall. Samt
alltaf gott að reyna að sýna meiri til-
litssemi og umburðarlyndi gagnvart
náunganum.
Hvaða þekkti Íslendingur fer mest í
taugarnar á þér? Davíð Oddsson.
Hefurðu lagt í stæði ætlað fötl-
uðum? Já, afi var með svona miða í
rúðuna og ég fékk stundum bílinn
hans lánaðan og svindlaði mér þá í
stæðið, maður var ungur og vitlaus :)
Hvaða kvikmynd værirðu til í að end-
urgera? Pretty Woman með sjálfa
mig í aðalhlutverki og Justin í stað-
inn fyrir Richard Gere.
Myndarlegasti karlmaðurinn fyrir ut-
an maka? Ég geri mér það ekki að
reyna að velja bara einn …
Uppáhaldsíþrótt á eftir badminton?
Fótbolti, handboti, tennis o.s.frv. Ég
elska íþróttir!
Ertu góð í tennis? Ég er ekki góð, en
samt betri en mjög margir (sér-
staklega þeir sem aldrei hafa spilað
spaðaíþrótt).
Kanntu þjóðsönginn? „Ó Guð vors
lands, ó lands vors Guð. Við lofum
þitt heilaga, heilaga nafn …“ Já mér
sýnist það bara.
Hefurðu áhyggjur af hárvextinum?
Já, ég læt gildi samfélagsins stjórna
mörgu, meira að segja hversu mikið
hár er ásættanlegt að hafa á löpp-
unum/handarkrikunum/bikiníl-
ínunni, því miður!
Í hvaða stelpu/strák varstu fyrst
skotin? Ég var rosalega skotin í
besta vini mínum þegar ég var fimm
ára, Helga Má, en ég held að hann
hafi ekki verið skotinn í mér :)
Ef þú værir neydd til þess, gætirðu
útskýrt íslenska bankahrunið?
Kannski í mjög einfölduðu máli, en
reyni að hugsa sem minnst um þessa
menn sem settu þjóðina á hausinn.
Hvers viltu spyrja næsta viðmæl-
anda? Af hverju spilar þú ekki bad-
minton?
TINNA HELGADÓTTIR
AÐALSMAÐUR ÞESSARAR VIKU VARÐ ÞREFALDUR ÍSLANDSMEISTARI Í BADMINTON
UM SÍÐUSTU HELGI, EN HÚN SIGRAÐI Í EINLIÐALEIK, TVENNDAR- OG TVÍLIÐALEIK.