Fréttablaðið - 26.11.2011, Qupperneq 92

26. nóvember 2011 LAUGARDAGUR56
F
yrr í þessum mánuði reiddi kanadíski tannlæknirinn Michael
Zuk fram 19.500 pund, jafnvirði um þriggja og hálfrar millj-
ónar íslenskra króna, fyrir jaxl úr John heitnum Lennon á
uppboði í Stockport í Englandi. Bítillinn fyrrverandi hafði
gefið húshjálp sinni, Dot Jarlett, tönnina úr sér á sjöunda ára-
tugnum. „John og mamma voru afar náin og hann stakk upp
á því að hún færði systur sinni, sem var mikill Bítlaaðdáandi, jaxlinn að
gjöf. Tönnin hefur tilheyrt fjölskyldunni æ síðan,“ sagði Barry Jarlett,
sonur hinnar níræðu Dorothy, í undanfara uppboðsins.
Þetta er þó fráleitt í fyrsta sinn sem munur sem tengist Bítl-
inum selst fyrir háar fjárhæðir á uppboði. Lennon virðist hafa
haft yndi af því að gefa fólki í kringum sig gjafir sem jaðra
við að vera óhugnanlegar, því árið 2007 seldist hárlokkur
sem Lennon gaf hárgreiðslukonu sem vann við Bítlamynd-
ina A Hard Day‘s Night á um 560.000 krónur.
Árið 1982 seldist ´65-árgerð af Rolls Royce sem var í
eigu Lennons, fagurlega skreyttur blómum að skynörvandi
sið, á 270 milljónir en ætti með réttu að hafa rokið upp í
verði í dag. Tónlistarmaðurinn George Michael greiddi
örlítið minna árið 1990, eða 250 milljónir, fyrir píanó með
brunablettum eftir sígarettur sem Lennon samdi mörg sín
frægustu lög á, þar með talið Imagine.
Þá seldist klósettið hans Lennons fyrir um 1,8 milljónir
króna árið 2007 og árið eftir fengust rúmlega þrjár og hálf
milljón fyrir upptöku af blindfullum og dónalegum Lennon
við upptökur á sólóskífu sinni Rock ‘n’ Roll árið 1974.
Tveggja milljóna króna klósett
Jaxl úr tónlistarmanninum John Lennon, sem seldist fyrir um þrjár og hálfa milljón króna á uppboði fyrr í mánuðinum, er langt
því frá furðulegasta dæmið um minjagripi fræga fólksins sem margir girnast. Kjartan Guðmundsson leit á fleiri dæmi um slíkt.
„Tryggðu þér þessa krukku sem
gæti hugsanlega innihaldið
loftsameindir sem komist hafa
í beint samband við Angelinu
Jolie og Brad Pitt,“ stóð skýrum
stöfum á uppboðsíðunni
eBay á síðasta ári. Sá sem
setti auglýsinguna inn var Joe
Wilson, áhugamaður um frægt
fólk, sem sagðist hafa opnað
krukku nærri leikaraparinu
fræga og taldi góða hugmynd
að bjóða hana upp. Sem hún
reyndist raunar, því ónafn-
greindur aðili fjárfesti í krukk-
unni fyrir rúmlega 60.000
krónur. Allt er nú til.
■ LIFÐU Í KRUKKU
Á hápunkti Britney-æðisins á
árunum í kringum aldamótin
þótti flest það sem söngkonan
snerti þess virði að bjóða í
það fúlgur fjár. Einn dýr-
mætasti gripurinn, sem
seldist á tæpar 600.000
krónur, var þungunarpróf
sem Britney mun hafa tekið
á hóteli í Los Angeles árið
2004 og staðfesti að hún
og þáverandi eiginmaður
hennar, Kevin Federline,
ættu von á sínu fyrsta barni.
Sama ár rataði notað tyggjó,
sem Britney spýtti á götuna
fyrir utan Sanderson-hótelið
í London, á eBay og seldist á
60.000 krónur. Í kjölfarið fylltist
eBay af „fölsuðum“ Britney-
tyggjóum.
Tveimur árum síðar seldist
regnhlíf, sem söngkonan nýtti
til að ráðast gegn papparössum,
á uppboði en engum sögum
fer af upphæðinni sem einhver
var tilbúinn að reiða fram fyrir
vopnið.
■ ÞUNGUNARPRÓF OG REGNHLÍF
Þegar nærfatnaður stjarnanna
endar á uppboði, sem gerist
nánast óþægilega reglulega,
eru það oftast nær óprúttnir
aðilar sem komast yfir klæðin
eftir misjafnlega löglegum
leiðum til að krækja sér í
aura. Þó er sú ekki raunin
með söngkonuna Cher, sem
ákvað upp á eigin spýtur
að setja brjóstahaldarann
sinn á uppboð árið
2007. Hard Rock Café
í Las Vegas tryggði sér
haldarann fyrir ótil-
greinda upphæð, en
sjálf lét Cher hafa eftir
sér í fjölmiðlum að hún
hefði látið „stærstan
hluta ágóðans“ rakna til
góðgerðamála.
■ FÁÐU ÞÉR BRJÓSTAHALDARA
Gyðjan Marilyn Monroe og flest sem henni viðkemur
hefur lengi vakið áhuga safnara með rúm fjárráð. Til að
mynda hafa kjólar sem hún klæddist, meðal annars
í kvikmyndinni Seven Year Itch (sem uppstreymi úr
loftrist blés upp um leikkonuna sem frægt varð) og sá
sem hún var í þegar hún söng afmælissönginn fyrir John
F. Kennedy Bandaríkjaforseta árið 1962 (sem var svo
þröngur að það þurfti að sauma hann utan á hana), selst
fyrir stórfé á undanförnum árum.
Öllu undarlegra þótti þó þegar þrjár röntgenmyndir
af brjóstholi Monroe voru settar á uppboð í Las Vegas.
Myndirnar voru teknar árið 1954, þegar leikkonan gekkst
undir aðgerð á sjúkrahúsi vegna legslímuflakks, og seldust
fyrir fimm og hálfa milljón króna, mun meira fé en upp-
boðshaldarinn bjóst við í undanfara uppboðsins. „Svona
skyggnist maður inn í Marilyn Monroe á hinn fullkomna
hátt,“ sagði hann stoltur.
■ SKYGGNST INN Í MARILYN MONROE
Hin danskættaða, en
þó bandaríska, leikkona
Scarlett Johansson var
kvefuð í viðtali í spjall-
þætti Jay Leno árið 2008.
Hinn kurteisi Leno rétti
leikkonunni bréf sem hún
snýtti sér í og svo plast-
poka, enda hét Johans-
son því að selja notaðan
snýtipappírinn á uppboðs-
síðunni eBay til styrktar
góðgerðasamtökunum
USA Harvest. Snýtibréfið
var þeim mun dýrmætara,
að sögn leikkonunnar,
vegna þess að hún hafði
smitast af kvefinu af leikar-
anum Samuel L. Jackson
við tökur á kvikmyndinni
The Spirit. Bréfið seldist
að lokum á um 670.000
krónur.
■ DÝRMÆTUR LEIKKONUHOR
Veðmálavefsíðan GoldenPalace.
com varð stoltur eigandi nýrna-
steins sem eitt sinn tilheyrði Star
Trek-leikaranum William Shatner
árið 2006. Shatner hafði hnigið
niður við tökur á sjónvarps-
þættinum Boston Legal, verið
drifinn á sjúkrahús og
ákveðið strax að aðgerð
lokinni að selja steininn
til styrktar góðgerða-
samtökunum Habitat
for Humanity. „Hann
er svo stór að hann
smellpassar á fingurna
á fólki,“ sagði
leikarinn um
nýrnasteininn, sem
seldist á tæplegar
þrjár milljónir króna.
■ NÝRNASTEINN UTAN ÚR GEIMNUM
Uppboð sem hefði
hugsanlega getað
orðið það viðbjóðs-
legasta í tónlistar-
sögunni var stöðvað
síðastliðið sumar.
Þá stóð til að selja
skurðverkfæri,
gúmmíhanska og
fleira sem notað
var við krufningu
sjálfs kóngsins, Elvis
Presley, samkvæmt
ónafngreindum
líksmurningar-
manni. Sá varð fyrir
vonbrigðum, eftir
að hafa beðið eftir rétta tækifærinu til að selja góssið í yfir
þrjá áratugi, þegar hætt var við uppboðið á þeim forsendum
að engin leið væri að sanna að munirnir væru ekta og hefðu
í raun komist í tæri við Presley. Líksmurningarmaðurinn vildi
tæpa eina milljón og sjö hundruð þúsund krónur fyrir varning-
inn og ekki er útilokað að hann hafi selst utan uppboðs.
■ VIÐBJÓÐSLEGASTA UPPBOÐIÐ