Íslenskt mál og almenn málfræði - 01.01.1984, Side 48

46
Asta, Gísli og Þórólfur
öðrum orðum, fylgnin milli aðaleinkunnar og villufjölda gæti verið
meiri eða minni en fylgnin milli kennaramats og villufjölda.
Til þess að kanna þetta nánar reiknuðum við viðeigandi tölur fyrir
þá 65 einstaklinga sem við höfðum nægilegar upplýsingar um. Niður-
stöður getur að líta í Töflu 5. Taflan sýnir að marktæk fylgni er milli
þágufallssýki og einkunnar annars vegar og þágufallssýki og kennara-
mats hins vegar. Til samanburðar má geta þess að sambandið milli
aðaleinkunnar og þágufallssýki er lítið eitt veikara en sambandið milli
þágufallssýki og félagsstöðu fyrir safnið í heild. Eins er sambandið
milli kennaramats og þágufallssýki nánast því jafnsterkt og margnefnt
samband milli þágufallssýki og félagsstöðu fyrir allt úrtakið. í þessu
sambandi er rétt að minna enn á það að þessi samanburður er fyrst og
fremst byggður á hluta alls úrtaksins eða 65 einstaklingum og því langt
frá því að vera fræðilega traustur. Hins vegar má kannski segja, að sú
vísbending sem gögnin gefa sé í þá átt að námsárangur yfirleitt skýri
tölfræðilega um það bil jafn mikið af dreifingu þágufallsvillna og fé-
lagsstaða. Með öðrum orðum, þessar niðurstöður, svo langt sem þær
ná, benda til þess að Halldór Halldórsson (1983) hafi nokkuð til síns
máls þegar hann heldur því fram að þágufallssýki sé algengari hjá börn-
um sem hafa tiltölulega lága einkunn.
Tafla 5. Samband þágufallssýki, aðaleinkunnar og kennaramats
2
-.323
3
-.407
.716
1. Þágufallssýki
2. Aðaleinkunn
3. Kennaramat
(Fjöldi: 65 einstaklingar)
Önnur leið sem hugsanlega mætti fara til þess að fá einhverja vís-
bendingu um réttmæti umræddra hörgulkenninga er að nota kennara-
mat sem mælikvarða á námsárangur. Eins og fram kemur í Töflu 5 er
sterk fylgni milli aðaleinkunnar og kennaramats (0.72). Svipaðar niður-
stöður hafa einnig komið í ljós í hliðstæðum rannsóknum. Þannig
reyndist vera álíka fylgni milli kennaramats og aðaleinkunnar í rann-
sóknum sem Wolfgang Edelstein hefur gert (munnlegar upplýsingar) og
þeirri sem hér er til umræðu. Tafla 6 sýnir samband milli kennaramats
og þágufallssýki fyrir allt úrtakið. Eins og sjá má er veruleg fylgni