Vera - 01.07.1983, Blaðsíða 22

ERTUAÐ BYGGJA?
Ertu að byggja, þarftu að bæta,
viltu breyta?
Eða viltu kannski rífa hús, gera bíla-
stæði eða fella tré? Ef svo er þá
skaltu snúa þér til bygginganefndar
Reykjavíkur.
Hvað er bygginganefnd?
Bygginganefnd Reykjavíkur er sjö manna nefnd og hef-
ur hún þá sérstöðu meðal nefnda borgarinnar að hún
starfar undir yfirstjórn borgarstjórnar og félagsmálaráð-
herra. Félagsmálaráðuneytið gefur út byggingareglugerð
sem allar bygginganefndir í landinu starfa eftir. Sam-
kvæmt reglugerðinni er sveitarstjórnum skylt að skipa
bygginganefnd eftir hverjar sveitarstjórnarkosningar.
Ákvarðanir bygginganefndar fara til borgarstjórnar til
staðfestingar. Ef borgarstjórn fellst ekki á afgreiðslu
bygginganefndar þá fer málið til úrskurðar félagsmála-
ráðherra.
Hvert er verksvið bygginganefndar?
Samkvæmt byggingareglugerð er bygginganefnd falin
byggingamálefni sveitarfélaga, hún hefur umsjón með því
að byggt sé í samræmi við skipulag og fjallar um bygg-
ingaleyfisumsóknir. í reglugerðinni segir að hver sá sem
ætlar að grafa grunn, reisa hús, rífa hús eða breyta því eða
notkun þess, gera bílastæði eða önnur mannvirki, sem
hafa áhrif á útlit umhverfisins skuli senda umsókn ásamt
uppdráttum til bygginganefndar. Bygginganefnd fjallar
um málið, veitir byggingarleyfi eða synjar þvi. Áður en
hægt er að gefa út byggingarleyfi er að mörgu að hyggja
fyrirhuguð bygging þarf að vera í samræmi við skipulag,
það má t.d. ekki byggja íbúðarhús í hverfi sem á að vera
iðnaðarsvæði samkvæmt skipulagi. Uppfylla þarf ýmsar
eldvarnarkröfur og svo mætti lengi telja.
Þegar um er að ræða nýbyggingu í eldri hverfum þarf
að gæta að því að hún falli inn í þá byggð sem fyrir er.
Þessa hefur ekki alltaf verið gætt sem skyldi, en vonandi
verður hér bót á, því nú er verið að vinna að reglum um
nýbyggingar í eldri hverfum. Samkvæmt þeim skal gæta
þess sérstaklega að nýbygging stingi ekki í stúf við eldri
byggð og að tillit sé tekið til gróðurs.
Byggingareglugerðin er mjög ítarlegt plagg, þar eru ná-
kvæm fyrirmæli um hvaða upplýsingar eiga að fylgja
byggingarleyfis-umsókninni. Meðal þess sem þarf að
koma fram á teikningum er skipulag lóðar og þegar um
íbúðir er að ræða skal sýna innra skipulag íbúðarinnar,
herbergjaskipan og fyrirkomulag innréttinga.
Nýbyggingar og breytingar á eldra húsnæði eru í meiri-
hluta þeirra mála sem nefndinni berast. En auk þess að
gefa fólki leyfi til að byggja og breyta þá veitir bygginga-
nefnd iðnmeisturum viðurkenningu, það er veitir þeim
starfsleyfi innan lögsagnarumdæmis Reykjavíkur. Bygg-
inganefnd getur veitt þeim sem standa fyrir byggingar-
framkvæmdum áminningu ef þeir brjóta ákvæði bygg-
ingareglugerðarinnar. Að lokum má geta þess til gamans
að bygginganefnd gerir tillögur til borgarstjórnar um
nöfn á götum, og hverfum og að óheimilt er að fella tré
sem er yfir 4 m á hæð eða 40 ára gamalt nema með sam-
þykki bygginganefndar.
Getur almenningur haft áhrif á á-
kvarðanir bygginganefndar?
í byggingareglugerðinni er fólki tryggður nokkur réttur
til þess, því að þar segir:
„Telji einhver rétti sínum hallað með ályktun bygginga-
nefndar eða sveitarstjórnar, er honum heimilt að skjóta
máli sínu til úrskurðar félagsmálaráðherra innan þriggja
mánaða frá því honum var kunnugt um ályktunina“.
Ráðherra skal svo kveða upp úrskurð innan þriggja
mánaða frá því honum berst kæra.
Kærum til ráðuneytisins hefur fjölgað nokkuð að und-
anförnu, það er orðið algengara að fólk kvarti ef þeim
finnst framkvæmdir nágrannans ganga of nærri sér. Yfir-
leitt rísa þessi deilumál þegar verið er að byggja við eldri
hús, reisa bílskúra á lóðum sem þegar eru byggðar eða
byggja ný hús í eldri hverfum. Ekki hefur hingað til verið
skylda að kynna nágrönnum fyrirhugaðar framkvæmdir
og oft hafa menn vaknað við það einn góðan veðurdag að
granninn er byrjaður að grafa eða jafnvel slá upp mótum.
Nú hefur nýrri grein verið bætt við byggingareglugerð-
ina og á það að tryggja betúr að fólk fái að vita um bygg-
ingaáform nágrannans. í henni segir: „Áður en leyfi er
veitt fyrir nýbyggingu, viðbyggingu eða breytingu á húsi í
þegar byggðu hverfi eða verulegri breytingu á notkun húss
skal nágrönnum sem bygginganefnd telur að hagsmuna
eigi að gæta gefinn kostur á að tjá sig um fyrirhugaða
framkvæmd innan mánaðar. Bygginganefnd getur þó
veitt lengri frest ef sérstakar ástæður eru fyrir hendi“.
Þessi reglugerðarbreyting og svo þau ákvæði um kynn-
ingu sem er í tillögunum um reglur fyrir nýbyggingar í
eldri hverfum, ættu að tryggja að fólk fái vitneskju um
fyrirhugaðar byggingar og breytingar í nágrenni sínu og
fái tækifæri til að gera athugasemdir við þær ef þeim
finnst ástæða til.
Umhverfið, byggðin og náttúran, er sameign okkar allra
og ábyrgð, þess vegna verðum við öll að vera á verði og
gæta þess að því sé ekki spillt.
ggg
„..að gæta sérstak-
lega að nýbygging
stingi ekki í stúf við
eldri byggð og að tillit
sé tekið til gróður»“.
„Telji einhver rétti
sínum hallaö“...
„Kærum til ráðu-
ncytisins hefur fjölg-
að nokkuð að undan-
förnu“...
„Nú hefur nýrri
grein verið bætt við
byggingareglugerðina
og á það að tryggja
betur að fólk fái að
vita um byggingaá-
form nágrannans“.
„...ættu að tryggja
að fólk fái vitneskju
um fyrirhugaöar
byggingar og breyt-
ingar í nágrenni sínu
og fái tækifæri til aö
gera athugasemdir
við þær ef þeim finnst
ástæða til“.
22