Fréttablaðið - 14.07.2012, Side 20

14. júlí 2012 LAUGARDAGUR20
1. Bærinn við Blönduós
Stærsti þéttbýlisstaðurinn við Húnaflóa státar af
margvíslegri afþreyingu fyrir ferðalanga. Sem dæmi
má nefna söfnin á Blönduósi, Hafíssetrið, Laxasetur
Íslands og Textílsetur Íslands. Ferðalangar verða
heldur ekki sviknir af sundlaugarferð eða túr á golf-
völlinn.
2. Hrútey
Ugglaust eru margir sem oft hafa ekið í gegnum
Blönduós án þess að veita Hrútey athygli. Eyjan sú
er í Blöndu og blasir við úr bænum. Göngubrú liggur
yfir í hana sunnanverða. Hún er gróðurvaxin og fal-
leg og tilvalinn áningarstaður í lautartúr því þar eru
bæði bekkir og borð.
3. Hópið
Húnavatnssýslur eru paradís íslenskra stangveiði-
manna, víða er hægt að veiða og þar á meðal í fimmta
stærsta stöðuvatni landsins, Hópinu. Veiði er heimil
í öllu vatninu og Veiðikortið gefur aðgang að því. Oft
veiðist best fram í miðjan júlí í vatninu en sjóbirting
er fínt að veiða fram í september.
Fyrir utan hann veiðist bleikja og lax í Hópinu enda
gengur mikið af laxi í gegnum Hópið í Víðidalsá og
Gljúfurá. Þess má geta að Hvítserkur og Borgarvirki
eru í nágrenninu, bæði staðir sem vert er að skoða
og svo er aldrei að vita nema ferðalangar sjái seli
við ströndina.
4. Vatnsdalur
Grösugur og búsældarlegur dalur sem gaman er að
skoða. Hér skal sérstaklega bent á Kattaraugu, all-
djúpan pytt neðan vegarins í landi Kornsár. Í pyttinum
er verulega óvenjulegt náttúrufyrirbrigði; tvær fljót-
andi smáeyjar og er svæðið friðlýst. Upplýsingaskilti
náttúruverndarráðs hafa verið sett upp við tjörnina.
5. Þingeyrarkirkja
Ein merkasta kirkja landsins að gerð og sögu var
byggð á árunum 1864-1877, og vígð 9. september árið
1877. Kirkjan er byggð í rómverskum stíl með tæp-
lega eins metra þykkum veggjum. Í loftinu eiga að
vera 1000 gylltar stjörnur og sömuleiðis eiga gluggar
kirkjunnar að vera 1000 smáar rúður. Hún tekur
nokkuð yfir 100 manns í sæti.
6. Spákonufell
Þægileg ganga er á bæjarfjall nágrannabæjar
Blönduóss, Skagastrandar. Spákonufellið er 639
metrar á hæð og af því er gott útsýni yfir Húnaflóa
og fjöllin þar um kring. Nokkrar leiðir eru á fjallið
en algengust er svokölluð norðurleið. Þá er lagt upp
örskammt frá golfskála Golfklúbbs Skagastrandar
en þar má finna skilti með korti af gönguleiðum á
Spákonufell.
heimild: www.northwest.is
Veiði og vinalegt
náttúrufar
Á Blönduósi og í næsta nágrenni er margt að sjá. Svæðið er rómað fyrir
fjölmörg tækifæri til veiðimennsku, fagra náttúru og svo er ýmiss konar
afþreying í boði í bænum. Fréttablaðið heldur áfram för um landið.
Bylgjulestin verður á ferðinni í sumar eins og undanfarin sumur. Næsti
áfangastaður er Blönduós en þar verður vaktin staðin á Húnavöku. Hemmi
Gunn er lestarstjóri Bylgjulestarinnar og honum við hlið er hin fjöruga
Svansí. Þau stýra þættinum Ævintýraeyjunni á Bylgjunni á laugardögum
milli kl. 13 og 16 en að þessu sinni hrekkur lestin í gang þegar á föstudeg-
inum. Í Bylgjulestinni er hljóðnemum beint að fólkinu sem býr í bæjunum,
fólkinu sem er að ferðast um landið og kíkir í heimsókn og reynt að koma
stemningunni til allra hinna sem eiga ekki heimangengt.
BYLGJULESTIN
Húnavaka, hin árlega bæjarhátíð á Blönduósi, hefst á fimmtudag. Á mið-
vikudag eru bæjarbúar hins vegar hvattir til þess að skreyta bæinn hátt og
lágt. Hátíðin er sett fyrir framan Hafíssetrið klukkan hálfsjö og svo er blásið
til heljarinnar grillveislu þar sem veislugestir leggja til kjöt- og eftirrétta-
hlaðborðs með sama sniði. Um kvöldið er svo leikjakvöld í gamla bænum.
Á föstudag hefst dagskráin klukkan hálfeitt með töfranámskeiði, fyrirtæki
opna hús sín og bjóða í grill, þá er diskó um kvöldið svo fátt eitt sé nefnt. Á
laugardegi er sömuleiðis dagskrá allan daginn. Meðal þess sem efnt verður
til er fiskisúpukeppni í kvennaskólanum og útimarkaður við Félagsheimilið.
Um kvöldið verður kvöldvaka í Fagrahvammi og dansleikur í Félagsheim-
ilinu. Nánari upplýsingar um hátíðina er að finna á vefnum huni.is.
GRILL OG GAMAN
1
4
2
53
6
Húnafjörður
Húnaflói