Fréttatíminn - 30.08.2013, Blaðsíða 56

 Í takt við tÍmann anna Rut aRnaRdóttiR
Get alltaf borðað pítsu
Anna Rut Arnardóttir er tvítugur Selfyssingur sem leikur í nýrri Spotify-auglýsingu Símans.
Anna Rut dúxaði í Fjölbrautaskóla Suðurlands um síðustu jól með 9,4 í meðaleinkunn og
er að hefja nám í vélaverkfræði. Hún spilar á fiðlu og fór á sína fyrstu Þjóðhátíð í sumar.
Staðalbúnaður
Ég var að flytja í bæinn og því er fremur lítið í
fataskápnum akkúrat núna. Mest af fötunum
þar hef ég fundið á flóamörkuðum, Rauða kross
búðinni og fleiri stöðum. Það eru aðal búðirnar.
Ef ég kaupi mér einhver tískuföt þá geng ég oft-
ast voða lítið í þeim, ég veit ekki af hverju. Ég
hugsa að að megi segja að ég klæði mig frekar
„kasúal“ en annars fer það eiginlega bara
eftir veðrinu. Ég er mjög lítið fyrir fylgihluti,
þeir eru eiginlega bara fyrir.
Hugbúnaður
Ég fór í partí fyrir nýnema á föstudaginn
en annars er ég ekki orðin mjög sjóuð í
skemmtanalífinu. Mér finnst mjög fínt að
fara út að skokka og ég ætlaði að taka
þátt í Reykjavíkurmaraþoninu. En
svo gafst ég upp á því þegar ég sá
veðurspána. Ég ætlaði að hlaupa
tíu kílómetra en hefði örugg-
lega gefist upp á leiðinni. Ég
var í ræktinni á Selfossi
og hef verið að hugsa
um að kaupa kort hér í
bænum. En ég er ekki
á bíl svo ég þyrfti þá
að hjóla eða taka
Strætó þangað. Ég
tek kannski bara hnébeygjur á ljósum í staðinn. Eina
sjónvarpsstöðin sem ég er með núna er RÚV. Ég er
með Dexter í tölvunni en fannst það pínu subbulegir
þættir á köflum, ég á samt kannski eftir að koma mér
betur inn í þá.
Vélbúnaður
Ég er með iPhone eins og meirihluti þjóðarinnar. Ég
nota hann nú mest til að tala í hann og fara á netið
en það er líka gott að taka myndir á hann, maður
þarf ekki lengur að eiga myndavél. Jú, svo nota ég
hann líka fyrir Facebook, Instagram og Snapchat. Og
Pinterest, það er mjög skemmtilegt. Ég á líka Mac-
tölvu, hvíta. Hún er fjögurra ára en ennþá mjög fín.
Aukabúnaður
Ég hef mjög gaman af matreiðsluþáttum. Ég elda
alveg líka, eða reyni alla vega að elda eitthvað, en ég
hef meira gaman af því að skoða mat. Þegar ég borða
úti fer ég yfirleitt á pítsustaði. Ég get alltaf borðað
pítsu. Ég tók sjötta stigið á fiðlu í fyrra og langar
að klára áttunda stigið. Ég veit ekki hvernig það á
eftir að ganga meðfram náminu. Auk fiðlunnar hef
ég áhuga á tísku og hönnun og mér finnst gaman að
sauma. Í sumar fór ég á mína fyrstu Þjóðhátíð og það
var mjög skemmtilegt. Ég fór líka í eina veiðiferð með
pabba. Við veiddum í Ljótapolli rétt hjá Landmanna-
laugum og ég fékk einn urriða í lokin, þegar ég var
alveg að gefast upp. Uppáhalds staðurinn minn er
Gjáin í Þjórsárdal, það er algjör ævintýrastaður.
 appafenguR
Relaxing Sounds of Nature
Sumum finnst fátt þægilegra en að sofna við hljóðið
í rigningunni lemja húsþakið. Þeir sem eiga snjall-
síma geta nú sofnað við rigninguna þó engin rign-
ing sé. Appið Relaxing Sounds of Nature býður upp
á fjölda hljóða sem róa hugann, hvort sem er fyrir
svefn eða bara til að gleyma annríki hversdagsins.
Ég nota svokallaða Lite útgáfu sem er ókeypis
en einnig er hægt að kaupa útgáfu með enn fleiri
möguleikum. Meðal hljóða sem eru í
minni útgáfunni eru hljóð í engisprett-
um, umhverfis- og dýrahljóð úr skógi á
Englandi, frumskógarhljóð frá Tælandi,
lestarhljóð, hjartsláttur og drungalegt
hljóð í yfirgefnu sjóræningjaskipi.
Hægt er að blanda hljóðum saman og
búa til svokallaðan play-lista.
Ég nota appið stundum til að sofna
og þá stilli ég hvenær ég vil að slökkt
verði á hljóðinu, hvort sem ég vil láta
það gerast eftir 15 mínútur eða tvö
klukkutíma. Þá er einnig innbyggð
vekjaraklukka og þá er hægt að velja
hljóð til að vakna við sem eru öllu nota-
legra en hávært píp í vekjaraklukku.
Þetta app er fyrir iPhone en sambæri-
leg öpp eru til fyrir Android- og Win-
dows-síma.
Erla Hlynsdóttir
erla@frettatiminn.is
Laugavegi 25 - S: 553-3003
H ö n n u n a r
h ú s
www.hrim.is
Opnunartími
Mán-fös
10:00-18:00
Laugardaga
10:00-18:00
Sunnudaga
13:00-17:00
Falleg hönnun er góð gjöf
56 dægurmál Helgin 30. ágúst-1. september 2013