Læknablaðið - 15.09.1988, Blaðsíða 14

262
LÆKNABLAÐIÐ
V. Vottorð, tilvísun, innlögn. A. Vottorð. Alls
voru gefin út 273 vottorð. Flest voru þau til
atvinnurekanda (fjarvistavottorð) 82, til
Tryggingarstofnunar ríkisins og sjúkrasamlaga 66
og ökuleyfisvottorð 48. B. Tilvísun. Alls var
skráð 51 tilvísun til sérfræðings. Var þá haft
samband við sérfræðing persónulega, munnlega
eða bréflega, og hann beðinn að taka við
einstaklingnum. Áður hefur komið fram að í 101
tilviki var sjúklingi ráðlagt að leita sérfræðings,
en þá látið eftir að velja sinn sérfræðing sjálfur.
Tilvísanir skiptust þannig milli sérgreina, að á
kvensjúkdómalækna voru 24, lyflækna 16, háls-,
nef- og eyrnalækna 10 og barnalækna 1. C.
Innlögn á sjúkrahús eða beiðni um innlögn. Kom
fyrir í 122 skipti, þar af voru átta innlagnir
skráðar mjög bráðar. Innlagnir skiptust milli
deilda, þannig að á skurð- og kvennadeildir fóru
27, lyfjadeildir 25, Sjúkrahúsið á Hólmavík 25 og
barnadeildir 9, en 27 beiðnir voru sendar um
innlagnir á Reykjalund og Heilsuhæli
Náttúrulækningafélags íslands og ein beiðni á
geðdeild.
VI. Skurðaðgerðir eða deyfingar. Til úrlausna var
skráð 261 skurðaðgerð og/eða deyfing.
Langoftast var um sárameðferð eða saumatökur
að ræða 114, innspýtingar í liði eða sinafestur
voru 36 og aðskotahlutir (úr auga, eyra, holdi)
voru fjarlægðir í 31 skipti.
UMRÆÐA
Vandamiðaða sjúkraskráin er auðveld í notkun,
eftir að hún er komin í gagnið.
Undirbúningsvinna er þó nokkur og þarf að vera
vönduð til að þessi sjúkraskrá skili sínu.
Mikilvægt er í byrjun, að vinna upp allar gamlar
upplýsingar og koma þeim heilsuvandamálum,
sem skipta máli, inn i heilsuvandaskrá
sjúkraskýrslunnar. Eftir að sjúkraskýrslan sjálf er
komin í notkun, þarf síðan að fylla inn á
heilsuvandaskrána með upplýsingum úr
læknabréfum og færa þarf
rannsóknarniðurstöður. Þetta tryggir, að
heilsuvandaskráin er samfelld og enginn
heilsuvandi fellur út af skránni, þó að hann hafi
verið leystur annarsstaðar en á viðkomandi
heilsugæslustöð.
í Egilsstaðakerfinu (1) er kódun greiningar byggð
á ICHPPC-2, International Classification of
Health Problems in Primary Care, sem er flokkun
út frá ICD-9, níundu útgáfu
Alþjóða-dánarmeinaskrárinnar, löguð að
heimilislækningum (3). Tilefnis- og
úrlausnakódar eru unnir upp úr ýmsum áttum og
aðlagaðir staðháttum að einhverju leyti (1). Eru
þeir í aðalatriðum góðir, þó að gloppur
fyrirfinnist. Aðalatriðið er, að vera samkvæmur
sjálfum sér við kódunina, þannig að hægt sé að
ganga út frá ákveðnum öruggum skilmerkjum,
þegar túlka á upplýsingasafnið. Ég tel, að ekki sé
ástæða til að eltast við smáatriði við kódun tilefna
og úrlausna. Reynsla mín af úrvinnslu þessara
gagna er að svona smáatriðaskilgreiningar skila
sér ekki. Miklu frekar ætti að leita í
sjúkraskýrsluna sjálfa, ef þörf er á nákvæmari
útfærslu á ákveðnum tilefnum eða úrlausnum við
einhverja rannsóknarvinnu. Hætta er á því, að
upplýsingasöfn á heilsugæslustöðvum verði síður
sambærileg ef undirflokkun er of mikil.
Samræmdar skilgreiningar og þar með
sambærileg upplýsingarsöfn á
heilsugæslustöðvum ættu að vera eitt af
grundvallarmarkmiðum þessarar
skráningarvinnu.
Egilsstaðakerfið getur staðið eitt sér, sem
vandamiðuð sjúkraskýrsla og raunverulega er
tölvufærsla kerfisins algjör aukageta. Einföld
flokkun á samskiptaseðlum getur t.d. dugað til að
telja aðkomur að stöð, kynjaskiptingu, vaktaálag
og til að færa farsóttarskýrslur. Tölvufærsla
gefur lækni vissulega betri möguleika til að fá
yfirlit um starf sitt, svarar mörgum spurningum,
gefur kost á rannsóknarvinnu, en er jafnframt
töluverð vinna, sem nýtist ekki nema menn hafi
einhvern áhuga á því, sem út úr tölvunni getur
komið.
I mínum huga hefur Egilsstaðakerfið sannað gildi
sitt sem aðgengileg og skemmtileg vandamiðuð
sjúkraskrá. Jafnframt getur hún staðið fyrir sínu
án þess að tölvuvinnslu sé beitt.
Þær niðurstöður, sem hér hafa verið kynntar,
skýra sig að mestu leyti sjálfar. Þær gefa þversnið
af því, sem búast má við í þúsund manna hópi á
einu ári. Aldursskipting íbúanna er áþekk og hjá
öllum landsmönnum og ætla má vegna legu
héraðsins, að flest samskipti þessa hóps við
heilbrigðisþjónustuna séu hér skráð.
Þetta þversnið af þúsund íbúa hópi leyfir okkur
að vænta, að eftirfarandi gerist á einu ári í
samskiptum við heilbrigðisþjónustuna:
- Um 90% íbúa eiga samskipti.
- Rúmlega fimm samskipti eru á íbúa.
- Tæp 90% starfsins eru á dagvinnutíma.
- Á stofu eru 66% samskipta, 23% i síma og 7%
vitjanir.