Tímarit Máls og menningar - 01.12.1961, Síða 25

ÍSLENZK ÞJÓÐERNISMÁL
búa í húsum — forfeður okkar bjuggu í aungvum húsum, heldur moldarbíngj-
um, og voru samt menn; alt alt alt nema þetta eina eina eina: afhenda ekki
landsréttindin sem við börðumst í sjö hundruð ár fyrir að ná aftur, við særum
yður herra við alt sem þessari þjóð er heilagt, gerið ekki únga lýðveldið
okkar að halaklepp á útlendri atómstöð; það eitt, það eitt; og ekkert nema
það ...“ Þessi orð fá enn meiri þunga í dag.
Að lokum þessi spurning: Til hvers höfum vér átt Jón Sigurðsson, til hvers
höldum vér upp á hálfrar aldar afmæli Háskóla íslands, til hvers erum vér að
fá handritin heim, ef vér fleygjum frá oss sjálfstæðinu? Er ekkert sem vakið
getur íslenzka menntamenn, islenzku þjóðina?
359