Ský - 01.02.2007, Blaðsíða 31
ský 31
Töfraljómi er yfir nafninu The Beatles. Það hreyfir við öllum, ungum sem gömlum. Bítlarnir, eins og þeir voru
strax kallaðir hér á landi þegar þeir fyrst urðu
þekktir í byrjun sjöunda áratugarins, höfðu
afgerandi áhrif á þróun popptónlistar og
með árunum náðu þeir hlustun langt út fyrir
poppið og hefur ekkert lát orðið á vinsældum
þeirra. Er langt síðan viðurkennt var að þeir
hafi mótað tónlistarumhverfið í heiminum á
síðari hluta síðustu aldar.
Leiðtogarnir John Lennon og Paul
McCartney sömdu langflest lögin sem
Bítlarnir gáfu út. George Harrison samdi fá
lög en þau bestu frá honum hafa löngu verið
viðurkennd sem tónsmíðar er jafnast á við
það besta eftir Lennon og McCartney.
Nokkur þekkt lög Bítlanna fengu á síðasta
ári yfirhalningu þegar hinn frægi sirkus
Cirque du Soleil setti upp viðamikla sýningu
í Las Vegas sem byggði á tónlist Bítlanna. Í
kjölfarið gaf upptökustjórinn, George Martin,
sem oft er kallaður „fimmti bítillinn“ út plötu
þar sem upphaflegar upptökur voru notaðar
og hljóðblandaðar á ný af honum og syni
hans Giles og ýmsu bætt við. Platan nefnist
Love og hlaut mjög góðar viðtökur, meira
að segja hjá hörðustu Bítlaaðdáendum, sem
yfirleitt vilja ekki láta hreyfa við upprunalegu
útgáfum. Upphófst enn á ný Bítlabylgja sem
ekki sér fyrir endann á og eru lög þeirra leikin
á útvarpsstöðvum eins og um nýja tónlist sé
að ræða og kemur betur og betur í ljós að
tónlist fjórmenninganna er engum tíma háð,
orðin klassísk. Og það má einnig taka fram að
nýverið urðu Bítlarnir þess heiðurs aðnjótandi
að vera fyrsta hljómsveitin sem kemst á
frímerki hjá breska heimsveldinu.
Hver skyldu svo vera bestu bítlalögin?
Mjög erfið spurning sem sex Bítlaaðdáendum,
sem Ský lagði spurninguna fyrir, fannst erfitt
að svara og er ég kominn að þeirri niðurstöðu
að eftir því sem maður kafar meira ofan í
tónlist Bítlanna er erfiðara að taka eitt lag
fram yfir annað. Þau eru einfaldlega það góð
að auðvelt er að lenda í sjálfheldu við valið
og skil ég vel þegar einn viðmælandinn sagði
að bestu Bítlalögin að hans mati þyrftu ekki
endilega að vera uppáhaldslögin.
Hvað um það, sex þekktir einstaklingar og
bítlasérfræðingar gengust undir það að velja
tíu bestu bítlalögin og val þeirra segir okkur
mikið um það hversu góð lög Bítlanna eru í
heildina þar sem listarnir eru ólíkir og valið
oft bundið persónulegum minningum. Það er
athyglisvert að sérfræðingarnir velja alls meira
en 40 ,,bestu’’ lög Bítlanna. Allir viðmælendur
hefðu viljað velja fleiri lög og lög sem meðal
annars komu fram hjá þeim og eru ekki á
listunum en hefðu lent í næstu sætum eru
meðal annars: Fixing a Hole, Dear Prudence,
Glass Onion, Here Comes the Sun, We Can
Work it Out, Eight Days a Week, Michelle,
You Never Give Your Money, Paperback
Writer, Fool on the Hill, Here, There and
Everywere, Norwegian Wood og Yesterday.
Ingólfur Margeirsson
Hefði viljað halda listanum áfram
„Þetta er erfitt og ómannlegt val fyrir hvern Bítlaaðdáanda, að velja bestu lögin.
Þeir sömdu um 200 lög og öll nánast snilldarverk. Að draga tíu út úr þeim haug er
nánast óvinnandi verk og auðvitað vildi ég halda listanum áfram. Ég hefði t.d. sett
I am the Walrus númer 11. Varðandi val mitt þá sýp ég enn hveljur þegar ég hlusta
á A Day in the Life, Because er eitt fallegasta lag Bítlanna, að miklu leyti sungið
án undirleiks, Come Together, eitt sterkasta lag Johns Lennons, The Long and
Winding Road er eitt fallegasta og innihaldsríkasta lag Pauls McCartneys. Blackbird
er vatnsheld Paul-ballaða. Rómantískt, enskt lag með viktoríutímabilsanda yfir sér,
einfalt í allri sinni snilld, Strawberry Fields Forever er meistaraverk Johns Lennons,
lagið er stúdía í klippingu þrátt fyrir frumstæðar aðstæður, Something sýnir hvað
mikið tónskáld bjó í George Harrison, While My Guitar Gently Weeps er annar
gimsteinn eftir Harrison, All You Need Is Love er boðskapur Bítlanna um ást og
kærleika, sama hvað margt er hallærislegt við þetta lag í dag, mér þykir ennþá vænt
um það, You´ve Got to Hide Your Love Away er fallegt lag eftir Lennon og fyrsta
órafmagnaða lagið sem Bítlarnir hljóðrituðu.“
1. A Day in the Life
2. Because
3. Come together
4. The Long and Winding Road
5. Blackbird
6. Strawberry Fields Forever
7. Something
8. While My Guitar Gently Weeps
9. All You Need is Love
10. You’ve Got to Hide Your Love Away
Bítlalögin