Morgunblaðið - Sunnudagur - 01.03.2015, Qupperneq 47

1.3. 2015 MORGUNBLAÐIÐ SUNNUDAGUR 47
Listasafns Íslands en börn þeirra eru Guð-
björg Tómasdóttir, tónlistarmaður og graf-
ískur hönnuður og Tryggvi Tómasson, nemi í
lyfjafræði.
Guðbjörg fékk frí frá starfi sínu sem graf-
ískur hönnuður til að geta sinnt tónlistinni að
fullu en hún er atvinnutónlistarmaður, í
hljómsveitinni My bubba sem stofnuð var í
Kaupmannahöfn fyrir um fimm árum en hún
spilar á gítar og banjó. Sveitin hefur gefið út
nokkrar breiðskífur og ferðast um heiminn,
spilað á Iceland Airwaves, Hróarskelduhátíð-
inni og hitað upp fyrir listamenn á borð við
Damien Rice, Matthew E. White og Ninu
Persson.
Í lífi Tómasar skipar tónlistin einnig stórt
hlutverk og í gegnum tíðina hefur hann
skipulagt tónleika, kynnt íslenskar hljóm-
sveitir í Svíþjóð og öfugt: erlendar sveitir
hérlendis. Tónleika-Tómas er á kreiki þessa
dagana og er að vinna í því að koma einum
þekktasta djasspíanóleikara Svía hingað til
lands.
Áður en við förum út í hvernig stendur á
því að læknir hringir í tónlistarmenn án þess
að þekkja þá og biður þá að halda tónleika –
hver er þinn tónlistarlegi bakgrunnur?
„Ég lærði á fiðlu sem strákur og er for-
eldrum mínum þakklátur fyrir að hafa hvatt
mig til þess þrátt fyrir að ég hafi nú ekki
verið meiri maður en svo að ég skammaðist
mín fyrir að spila á hana gagnvart félögum
mínum. Á þeim tíma var ég
bara ekki þroskaðri en þetta
og tók stríðnina sem þessu
fylgdi nærri mér.
Í dag held ég að krakkar
sem eru flinkir í tónlist sjái
möguleikana, að það er til
dæmis hægt að fara út í
popptónlist, stofna hljóm-
sveitir og gera það sem
mann dreymir um. Ég hætti
í fiðlunáminu um 16 ára
gamall og ég segi það ennþá,
bæði í gríni og ekki, að það
hjálpaði ekki að ég var
skammaður fyrir að æfa mig
ekki jafnvel og nemandinn
sem var á undan mér í tíma, hún Sigrún,“ en
sá nemandi var Sigrún Eðvaldsdóttir. „Þetta
var óskaplega óhagstætt fyrir mig og
óheppni að vera þarna beint á eftir henni.
Þetta latti mig nú frekar en hitt!“
Þess má geta að íþróttir tóku þarna yfir
en Tómas unir sér ekki á jafnsléttu nema
vera í sundi eða á hlaupum eða í skvassi –
hann er jú formaður Skvasssambands Ís-
lands og var í landsliðinu. Við reynum að
koma að því síðar.
En tónlistin fylgir þér samt áfram?
„Já, hún er stór hluti af lífi mínu, bæði er
ég alltaf með tónlist í gangi, á skurðstofunni,
jafnt heima og yfir pappírsvinnu, hvar og
hvenær sem er og svo hef ég undanfarin ár
komið að því að skipuleggja ýmsa tónleika.
Þegar ég var í sérnámi í Lundi í Svíþjóð
uppgötvaði ég djassinn. Þar er mikil hefð
fyrir þeirri tónlist, einn þekktasta djassklúbb
Norðurlanda er þar að finna, og fremstu
djassgeggjarar heims hafa komið þangað til
að spila. Svo var ég svo heppinn að besti vin-
ur minn í Svíþjóð hafði persónuleg tengsl við
marga þekktustu djassista Svíþjóðar í gegn-
um plötuverslun sem hann rak og ég kynnt-
ist þeim örlítið í gegnum hann.
Á þessum árum var Sigur Rós að byrja og
Múm og ég heillaðist af þeim, sá um að
smala fólki á tónleika með þeim sveitum þeg-
ar þær spiluðu í Lundi og Malmö. Og svo
kynntist ég tónlist Jagúar í gegnum dóttur
mína sem var þá að hlusta á þá. Ég var svo
heillaður af því sem var að gerast í tónlist-
arsenunni á Íslandi, og verandi sá sem ég er:
að vilja breiða út fagnaðarboðskapinn, fór ég
að kynna íslenska tónlist fyrir fólki í kring-
um mig sem hafði jafnvel ekkert verið að
hlusta mikið á tónlist. Ég dró það með mér á
tónleika og skipulagði forpartí á undan til að
búa til stemningu og þetta vatt upp á sig. Á
endanum ákvað ég að hringja í Samúel J.
Samúelsson, forsprakka Jagúar, og spyrja
hvort þeir vildu ekki koma til Svíþjóðar og
halda tónleika.“
Tómas þekkti hvorki haus né sporð á þeim
persónulega og viðurkennir að þeir hafi
kannski orðið svolítið hissa þegar hann
kynnti sig sem Tómas, lækni í Lundi sem
hefði mikinn áhuga á músík.
Jagúar kom út til Svíþjóðar og Tómas
leigði sendiferðabíl og keyrði með hljómsveit-
ina um Svíþjóð þar sem þeir héldu meðal
annars útitónleika í Lundi og í Malmö og síð-
an hefur þeim félögum í Jagúar og Tómasi
verið vel til vina.
Á döfinni að flytja inn djasspíanista
Þetta hefur líka virkað í öfuga átt. Tómas
hefur tekið með sér tónlistarmenn og hljóm-
sveit að utan. Fyrir rúmum áratug flutti
hann til landsins surferbandið Langhorns og
skipulagði tónleika með þeim á Nasa ásamt
Trabant. Þannig fékk hann forsvarsmenn
staðarins til að halda tónleika með hljómsveit
sem Íslendingar könnuðust ekkert við, með
því að fá eitt heitasta band Íslands á þeim
tíma til að vera með.
Tómas skýtur því inn í að Ragnar Kjart-
ansson, fyrrum söngvari Trabant, sé í miklu
eftirlæti hjá sér, bæði sem tónlistarmaður og
svo í því sem hann fór að gera síðar í mynd-
listinni.
Eftir að Tómas flutti heim eftir nám, bæði
í Bandaríkjunum og Svíþjóð, ákvað hann að
nýta tengsl sín við djassinn í Svíþjóð og hélt
áfram að rífa upp símann og biðja tónlist-
armenn að koma til Íslands
sem og að sannfæra tón-
leikahaldara hér heima að
það væri góð hugmynd.
Hann hefur farið ýmsar leið-
ir til að koma slíkum áform-
um í verk því sú vinna við
tónleikahald er ólaunuð sem
hann segir allt í lagi meðan
það sé gerlegt, það sé
ánægjunnar virði.
„Einu sinni sótti ég um
styrk til Nordisk Kulturfond,
hafði svipaðan hátt á og þeg-
ar ég sæki um styrki til
lækningarannsókna. Ég fékk
styrkinn, ágætisstyrk, og
notaði hann til að fara með danska djass-
bandið Hot and Spicy í tónleikaferðalag um
öll Norðurlöndin og Grænland.“
Tómas hefur fengið nokkra af þekktustu
djasspíanista Svíþjóðar hingað til lands. And-
ers Widmark kom á Listahátíð í Reykjavík
árið 2006. Nokkrum árum síðar kom Esbjörn
Svensson til landsins og spilaði fyrir til-
stuðlan Tómasar. Svensson lést í köfunar-
slysi aðeins ári eftir þá tónleika en þá höfðu
þeir Tómas verið að skipuleggja fleiri tón-
leika hér á landi.
Morgunblaðið/Kristinn
* Konan mínhefur stund-um sagt við mig
að ég verði að
muna að ég hafi
ekkert endilega
verið kosinn
maður ársins á
Grenimel 41.
Fjölskyldan; Tryggvi Tómasson, nemi í lyfjafræði, Tómas sjálfur og eiginkona hans, Dagný Heiðdal
listfræðingur, og Guðbjörg Tómasdóttir, tónlistarmaður og grafískur hönnuður.