Dagblaðið Vísir - DV - 27.05.2011, Qupperneq 16

16 | Fréttir 27.–29. maí 2011 Helgarblað
Allt á einum stað!
Bílaverkstæði | Dekkjaverkstæði | Smurstöð | Varahlutir
Þú færð fría olíusíu ef þú lætur
smyrja bílinn hjá okkur
Komdu með bílinn til okkar og
þú færð fría ástandsskoðun
Jón Ásgeir Jóhannesson, fyrrverandi
stjórnarformaður og aðaleigandi
fjárfestingarfélagsins FL Group, seg­
ir að Glitnir hafi ekki verið í ábyrgð­
um fyrir lán sem dótturfélag FL
Group tók hjá bandaríska fjárfest­
ingarbankanum Morgan Stanley til
að kaupa hlutabréf í Glitni fyrir hrun.
„Glitnir var ekki í ábyrgð fyrir láni FL
hjá Morgan Stanley. Stoðir, áður FL,
ætti að geta staðfest það,“ segir Jón
Ásgeir í svari sínu við fyrirspurn DV.
Þetta dótturfélag FL Group hét FL
GLB Holding BV. og var skráð í Hol­
landi. Félagið var stærsti hluthafi
Glitnis.
Fyrirspurn DV til Jóns Ásgeirs er
tilkomin út af því að DV hefur und­
ir höndum yfirlit yfir þau hlutabréf
sem Glitnir átti sjálfur í bankan­
um  fyrir hrunið 2008. Í yfirlitinu er
meðal annars fjallað um opinbera
hlutabréfaeign Glitnis í sjálfum sér
samkvæmt Verðbréfaskráningu Ís­
lands (ISD). Í yfirlitinu kemur fram
að hlutabréf FL GLB Holding BV.
í Glitni hafi verið veðsett Morgan
Stanley í gegnum Glitni. Í yfirlitinu,
sem unnið er upp úr gögnum Glitn­
is, segir orðrétt þar sem rætt er um
hlutabréfaeign þessa dótturfélags
FL Group og Þáttar International í
Glitni: „Frá dragast óbeinar veðsetn­
ingar hjá ISD í gegnum Glitni hf.“
Glitnir gætti hagsmuna Morgan
Þessi setning þýðir þó ekki að Glitn­
ir hafi verið í ábyrgðum fyrir lánum
félaganna tveggja. Setningin þýðir
væntanlega að Glitnir hafi gætt hags­
muna Morgan Stanley út af lánun­
um til félaganna þar sem bandaríski
bankinn hafði fjármagnað hluta­
bréfakaupin og átti veð í þeim. Þar
sem Morgan Stanley var ekki aðili að
Verðbréfaskráningu Íslands líkt og
Glitnir hafa bandaríski bankinn og
sá íslenski gert með sér samning um
að FL Group og Þáttur International
mættu ekki selja bréfin eða veðsetja
þau öðrum án vitneskju og samþykk­
is Morgan Stanley.
Glitnir endaði svo á því að lána
bæði dótturfélagi FL Group og Þætti
International fyrir uppgreiðslu á lán­
unum við Morgan Stanley. Þetta
gerðist í mars og febrúar árið 2008. Í
febrúar 2008 fóru 104 milljónir evra,
rúmlega 10 milljarðar króna, frá
Glitni og til Morgan Stanley þar sem
Þáttur International gat ekki greitt
skuld sína við bandaríska bankann
og í mars sama ár greiddi Glitnir 50
milljónir evra, um fimm milljarða
króna, til Morgan Stanley en um var
að ræða greiðslu á lokahluta láns
félagsins hjá bandaríska fjárfesting­
arbankanum. Því var um að ræða
meira en 15 milljarða króna sem fóru
frá Glitni og til Morgan Stanley vegna
uppgreiðslu á lánunum.
Möguleikinn ræddur
Möguleikinn á því að Glitnir hafi ver­
ið í ábyrgðum fyrir þessum lánum
hefur verið til umræðu í fjölmiðlum
upp á síðkastið þó ekkert óyggjandi
svar sé fyrir hendi um þetta atriði.
Sigrún Davíðsdóttir fjallaði meðal
annars um þetta atriði í nýlegum
pistli í útvarpsþættinum Speglin­
um. Þar sagði Sigrún: „En þetta er
líka sagan um að það var í raun ekki
Milestone sem fékk beint lán frá Mor­
gan Stanley – heldur að Glitnir var í
ábyrgð fyrir láninu. Þessi lán Mor­
gan Stanley sem virtust vera sjálfstæð
fyrirgreiðsla til þessara félaga voru
að öllum líkindum þannig að Glitnir
var í ábyrgð. Það sem leit út sem sjálf­
stæð lánafyrirgreiðsla erlends banka
til þessara íslensku eignarhaldsfélaga
var það í raun ekki.“ Sigrún fullyrti
ekki að Glitnir hefði verið í ábyrgð
fyrir láninu til Þáttar International en
benti á að það væri möguleiki.
Breytir miklu
Því liggur fyrir að Glitnir greiddi
þessi lán upp á endanum en spurn­
ingin er af hverju þetta var gert. Líkt
og DV hefur fjallað um áður er hugs­
anlegt að ein af skýringunum á því
af hverju Glitnir greiddi upp lánin
að það hefði komið sér afar illa fyr­
ir Glitni og hluthafa hans ef Morgan
Stanley hefði leyst bréf FL Group og
Þáttar International til sín snemma
á árinu 2008. Slíkt hefði hugsanlega
orsakað verðhrun á hlutabréfum í
Glitni og bankinn hefði líklega fall­
ið fyrr. Tveir af stærstu eigendum og
skuldurum Glitnis hefðu þá sömu­
leiðis legið í valnum eftir Morgan
Stanley.
Ástæðan fyrir uppgreiðslu lán­
anna er mikilvæg þar sem bein
ábyrgð Glitnis á lánunum myndi
þýða að hlutfall eigin bréfa Glitnis
af útgefnu hlutafé í bankanum hafi
verið vanreiknað. Ef þetta var raun­
in þýðir það að ábyrgðin á lánun­
um til FL Group hafi í reynd hvílt á
Glitni en ekki á félögunum sjálfum
sem skráð voru fyrir hlutabréfun­
um. Því hefði átt að reikna hluta­
bréfaeign þessara félaga með hluta­
bréfum sem Glitni átti í sjálfum.
Í skjalinu sem er til umræðu hér
kemur fram að Glitnir hafi hald­
ið utan um í kringum 14 prósent af
hlutabréfunum í bankanum sjálfum
á árunum 2006 til 2008. Ef Glitnir
var í ábyrgðum fyrir lánunum til FL
Group og Þáttar hefði þessi tala hins
vegar farið upp í rúmlega 35 prósent
þar sem félögin tvö áttu samtals
meira en 20 prósent í Glitni.
Kannast ekki við ábyrgðir
Guðmundur Ólason, fyrrverandi
forstjóri Milestone, segir það „al­
veg útilokað“ að Glitnir hafi verið í
ábyrgðum fyrir lán til Þáttar Inter­
national. Hann segir að Glitnir hafi
ekki með neinum hætti komið að
lánasamningi Þáttar International
við Morgan Stanley. „Þeir komu
ekkert að þessu,“ segir Guðmundur.
Þeir sem stýrðu umræddum fjár­
festingarfélögum neita því báðir að
Glitnir hafi verið í ábyrgðum út af
þessum lánum. Ekki er því hægt að
fullyrða að svo hafi verið í reynd. Ef
þetta var hins vegar raunin myndi
það þýða að þær blekkingar og tál­
sýnir sem einkenndu margt í við­
skiptum íslensku bankanna með
eigin hlutabréf hafi verið enn alvar­
legri en talið hefur verið þar sem
bankarnir hafi sjálfir átt allt of mik­
ið af hlutabréfum í sjálfum sér. Þetta
myndi líka þýða að erlendir fjárfest­
ingarbankar hafi einfaldlega ekki
treyst íslenskum fjárfestingarfélög­
um sem skuldurum og hafi því kraf­
ist bankaábyrgða áður en þeim var
lánað fyrir hlutabréfum.
n Jón Ásgeir Jóhannesson segir Glitni ekki hafa ábyrgst lán FL Group n Glitnir gætti hagsmuna Morgan
Stanley n Bankaábyrgð á erlendum lánum myndi breyta myndinni af íslenska efnahagshruninu
Hlutabréf FL og Þáttar
veðsett í gegnum Glitni
„Glitnir var ekki í
ábyrgð fyrir láni FL
hjá Morgan Stanley.
Ingi Freyr Vilhjálmsson
fréttastjóri skrifar ingi@dv.is
Engin ábyrgð Jón Ás-
geir segir að Glitnir hafi
ekki verið í ábyrgðum
vegna láns sem
dótturfélag FL Group
fékk hjá Glitni. Jón
Ásgeir sést hér með Jóni
Sigurðssyni, fyrrverandi
forstjóra FL Group.