Öldrun - 01.05.2007, Blaðsíða 22

22
www.oldrun.net ÖLDRUN – 25. árg. 1. tbl. 2007
Félag sjúkraþjálfara í
öldrunarþjónustu
Sara Hafsteinsdóttir
yfirsjúkraþjálfari LSH í Fossvogi
formaður FSÖ
Félag sjúkraþjálfara í öldrunarþjónustu (FSÖ) var stofnað
25. janúar 1996. Stofnendur voru 26 sjúkraþjálfarar sem
unnu með aldraða einstaklinga á hinum ýmsu stofnunum
víðsvegar um landið. Þórunn B. Björnsdóttir var kosin
formaður félagsins, aðrir í þessari fyrstu stjórn félagsins
voru Sigrún Guðjónsdóttir, Inger Elíasson og Bergþóra
Baldursdóttir.
Markmið félagsins eru:
Fagleg:
• Að stuðla að fræðslu og forvarnarstarfi fyrir aldraða
• Að stuðla að framhaldsmenntun og rannsóknum í
sjúkraþjálfun aldraðra
• Að efla samskipti við hliðstæð félög erlendis
Félagsleg:
• Að efla samskipti milli sjúkraþjálfara í öldrunarþjón­
ustu víðsvegar um landið
Félagið hefur gefið út fræðslubækling og veggspjald um
byltur, forvarnir og tillögur að úrbótum. Einnig fræðslurit,
bækling og veggspjald um heilabilun. FSÖ hefur staðið að
gerð kennsluefnis um byltur og forvarnir annars vegar og
mikilvægi hreyfingar hjá öldruðum hins vegar. Þetta efni
geta félagsmenn fengið lánað. Bæklingur um líkamshreyf­
ingu og beinþynningu hefur einnig verið gefinn út.
Félagsmaður í FSÖ, Þórunn B. Björnsdóttir, var
einn höfunda að leikinni fræðslumynd um heilabilun,
Hugarhvarf – lífið heldur áfram með heilabilun.
Þá hafa félagsmenn þýtt og staðfært nokkra mæli­
kvarða innan öldrunarsjúkraþjálfunar. Má nálgast þá á raf­
rænu formi í mælitækjabanka Félags íslenskra sjúkraþjálf­
ara (www.physio.is).
Félagið var með kynningarbás á norrænu þingi sjúkra­
þjálfara og norrænni öldrunarráðsstefnu sem fram fór hér
á landi árið 2000.
Nokkrir félagar úr FSÖ tóku þátt í 14. heimsþingi
sjúkraþjálfara sem haldið var í Barcelona 7.­12. júní 2003.
Mikilvægt skref var stigið á þinginu er formlegur stofn­
fundur alþjóðlegs félags sjúkraþjálfara í öldrunarþjónustu
innan heimssamtakanna var haldinn. Hugmyndin að stofn­
un félagsins kviknaði á alþjóðlegu námskeiði í sjúkraþjálf­
un aldraðra sem haldið var á Möltu 1993 á vegum World
Confederation for Physical Therapy (WCPT). Skipuð var
undirbúningsnefnd sem vann ötullega að framgangi máls­
ins en fylgja þarf ströngum vinnureglum heimssamtaka
sjúkraþjálfara til að öðlast viðurkenningu sem formlegt
undirfélag innan samtakanna. Erlent heiti félagsins er The
International Association of Physical Therapists working
with Older People (IPTOP). Ísland var á meðal 14 stofn­
aðildarlanda félagsins og sátu sex íslenskir sjúkraþjálfarar
stofnfundinn fyrir hönd FSÖ. Stofnaðildarlöndin eru auk
Íslands: Nýja Sjáland, Ástralía, Búlgaría, Finnland, Þýska­
land, Írland, Malta, Svíþjóð, Tyrkland, Bretland, Kanada,
Bandaríkin og Chile. Stofnfélagar eru tæplega 7.000. Fleiri
lönd hafa sótt um aðild að alþjóðafélaginu.
Á meðal meginmarkmiða alþjóðafélagsins er:
• Að koma á samvinnu milli sjúkraþjálfara í öldrunar­
þjónustu um allan heim
• Að stuðla að auknum gæðum í endurhæfingu aldraðra
• Að hvetja til rannsókna og skapa tækifæri til miðlunar
þekkingar milli félagsmanna
• Að aðstoða aðildarlönd WCPT við að stofna undirfélög
sjúkraþjálfara í öldrunarþjónustu í eigin heimalöndum
Efnt var til samkeppni um merki IPTOP og er ánægju­
legt að geta þess að merki hannað af Þórunni B. Björns­
dóttur, sjúkraþjálfara á Íslandi, varð fyrir valinu.
Frá stofnun alþjóðafélagsins hafa árlega verið haldnar
ráðstefnur á vegum þess í hinum mismunandi aðildarlönd­
um.
Starf FSÖ yfir vetrartímann er: skipulögð dagskrá með
fyrirlestrum og fræðslu fyrir félagsmenn. Farnar eru ferð­
ir á haustin eða vorin til að kynnast starfsemi mismunandi
stofnana víðs vegar um landið. Þetta er kjörinn vettvangur
til að fræðast og kynnast betur innbyrðis. Nú eru yfir 60
meðlimir í félaginu.
Núverandi stjórn FSÖ er þannig skipuð:
Formaður: Sara Hafsteinsdóttir, sarahaf@landspitali.is
Ritari: Sigrún B. Bergmundsdóttir, sigrunbb@landspitali.is
Gjaldkeri: Jón Þ. Brandsson, jonbrand@sjukrathjalfarinn.is
Varamaður: Sigrún Guðjónsdóttir, sigrun@skjol.is
Löggiltir sjúkraþjálfarar innan Félags íslenskra sjúkra­
þjálfara geta orðið félagar. Áhugasömum er bent á að snúa
sér til stjórnar FSÖ.