Són - 01.01.2007, Blaðsíða 5

Til lesenda
Enn er lesendum boðið að dreypa á Sónarmiði sem að þessu sinni er
ívið betur úti látinn en í fyrri heftum. Skáld og þýðendur fá hér meira
rúm en áður en á móti kemur að greinar um skáldskap eru ekki eins
gildur þáttur í ritinu og verið hefur. Verður heftið af þeim sökum
aðeins rýrara en næstu hefti á undan. Sónarskáld er að þessu sinni
Vilborg Dagbjartsdóttir.
Hugað er að formþáttum ljóða eins og í fyrri heftum. Ragnar Ingi
Aðalsteinsson rekur þær kenningar sem helstar hafa verið uppi um
sérhljóðastuðlun og þær sem efst eru á baugi nú um stundir. Þá skrif-
ar Heba Margrét Harðardóttir um sonnettuskáldskap Jakobs Jóhann-
essonar Smára og má segja að hún taki við þar sem frá var horfið í
grein Hjartar Marteinssonar í síðasta hefti. Ekkert yfirlit er að þessu
sinni um ljóðabækur síðasta árs en ætlunin er að bæta þar úr á næsta
ári og fjalla þá jafnframt um ljóðabækur þessa árs.
Öllum þeim sem efni eiga í ritinu og lagt hafa því lið á einhvern
hátt eru færðar bestu þakkir og lesendur biðjum við vel að njóta.
Fyrir hönd Sónarsinna
Kristján Eiríksson