Són - 01.01.2007, Side 31

1 Matthías Jochumsson (1956:103).
Kristján Eiríksson
Hallgrímur Pétursson
skáld alþýðunnar
Hallgrímur Pétursson er óumdeilanlega frægast trúarskáld Íslendinga og
hefur jafnan verið talinn einhver mestur guðsvinur í sögu þjóðarinnar.
Fyrir utan það að boða kristna kenningu mótmælenda af meiri innileik
og snilld en önnur skáld þá er samband hans við hinn líðandi Krist svo
óskilgreinanlega náið að erfitt er að sjá hvar Jesús endar og Hallgrímur
byrjar. Hann hefur um aldir fylgt Íslendingum frá vöggu til grafar og
kveðið menn í sátt við hverfulleika lífsins með söng svo fögrum í
sálminum um blómið „að sólin skein í gegnum dauðans göng“.1
Heilræði, lífsviska og algild sannindi eru snar þáttur í skáldskap
Hallgríms og hefur það ekki síst skírskotað til almennings. Skulu hér
tekin nokkur dæmi af handahófi úr Passíusálmunum:
Sú von er bæði völt og myrk,
að voga freklega á holdsins styrk,
án Guðs náðar er allt vort traust
óstöðugt, veikt og hjálparlaust
(Úr 1. Passíusálmi)
Bænin má aldrei bresta þig,
búin er freisting ýmislig;
þá líf og sál er lúð og þjáð
lykill er hún að drottins náð
(Úr 4. Passíusálmi)
Oft má af máli þekkja
manninn, hver helst hann er
(Úr 11. Passíusálmi)