Són - 01.01.2007, Síða 47

PASSÍUSÁLMAPLÚS: 47
í Betlehem, Nablus, Gaza
eða Golgatahæð
(blóðdropar dundu þar)
má falla á kné í hlíðar
eða klífa turninn mjóa
meðan einhver glamrar á orgel
horfa inn eftir hafi
hermannagrænu á lit.
Yfir öðrum botni innhafs
er sammæðra sól að sortna
(dapurt dauðans stríð)
tveggja ára börn í blóði
táningar slengja grjóti
brotajárnssprengja í bænar stað
hungur í rifnum húsum
þá er erfitt að tolla í turni
við íslenska strönd
þótt þakið sé skothelt, eiri lagt
– krossar vaxa við kirkju.
Kannski er Kristí pína gleymd
(mæðusöm urðu myrkrin)
því enn er fólki fórnað
í sama svörð.
Svo kemur sandbarið kvöldið
og þyrstum býðst bensín í klút
eins og edikið forðum.
Þá mótar fyrir Hauskúpuhæð
yfir Hvalfjarðarströnd í þoku.
Og enn, að lokinni líkvöku
yfir línhvítu enni bróður,
systur, dóttur, móður,
(dapurt dauðans stríð)
er vant að leggjast í fjöru
finna saltvatnið særa tungu
draga hljóðlega þyrna úr enni