Són - 01.01.2014, Page 10

8
Frá ritstjórum
Til lesenda
Tímaritið Són lítur nú dagsins ljós í tólfta sinn. Eins og í fyrra er það
Óðfræði félagið Boðn sem gefur Són út. Þær breytingar hafa orðið á
rit stjórninni að Ragnar Ingi Aðalsteinsson hefur látið af störfum sem
ritstjóri og eru honum færðar þakkir fyrir sín góðu störf. Anna Þorbjörg
Ingólfs dóttir, sem stýrði síðasta hefti með Ragnari Inga, heldur áfram
og ritstýrir nú Són ásamt Hauki Þorgeirssyni, doktor í íslenskri málfræði
og sérfræðingi við Stofnun Árna Magnússonar í íslenskum fræðum.
Efnið í þessu hefti Sónar er fjölbreytt. Þar eru fjórar ritrýndar greinar
og sex ritstýrðar óðflugur og umræðugreinar auk ljóða. Við viljum þakka
öllum höfundum sem og ritrýnum og yfirlesurum fyrir þeirra ólaunaða
en mikilsverða framlag í þágu Sónar.
Mikil gróska er í óðfræðirannsóknum um þessar mundir og því þörf á
tíma riti eins og Són fyrir fræðilegt efni um bragfræði og ljóðlist. En Són
á einnig að vera vettvangur fyrir léttara efni og vangaveltur um brag og
ljóð list í fjölbreyttu samhengi. Ábendingum um efni er hægt að koma
til ritstjóra.
Áskriftargjaldið er nú innheimt í heimabanka og við biðjum áskrif-
endur að athuga að það er Boðn sem er skrifuð fyrir reikningnum. Hægt
er að fá eldri hefti Sónar við vægu verði og nýir áskrifendur fá síðasta
hefti sér að kostnaðarlausu.
Anna Þorbjörg Ingólfsdóttir og Haukur Þorgeirsson, ritstjórar
Ath. í þessari PDF-útgáfu hefur verið leiðrétt villa í prentaðri gerð Sónar á bls.
152, þar sem stafirnir hv höfðu fallið framan af orðinu „hvörra“ í grein Þórunnar
Sigurðardóttur. Að öðru leyti er PDF-útgáfan nákvæmlega eins og prentgerðin.