Peningamál - 01.02.2002, Blaðsíða 32

PENINGAMÁL 2002/1 31
gegna mikilvægu hlutverki í því ferli. Einu sinni í
mánuði að jafnaði skal sérstaklega metið hvort
peningastefnan samrýmist verðbólgumarkmiði bank-
ans. Bankastjórn staðfestir verðbólguspá og tekur
ákvarðanir í peningamálum. Reglurnar fela ekki í sér
að bankastjórn taki ákvarðanir í peningamálum á
fyrirfram tilgreindum dögum.
Reglurnar kveða svo á að aðgerðir í peninga-
málum og meginforsendur þeirra skuli kynntar opin-
berlega svo fljótt sem verða má. Þó skuli þess gætt að
þær verði ekki birtar á meðan innlendir markaðir eru
opnir fyrir viðskipti. Í þessu sambandi er rétt að taka
fram að þetta ferli getur ekki gilt að fullu um inngrip
Seðlabankans á gjaldeyrismarkaði. Þau verða að
sjálfsögðu á meðan markaðir eru opnir og verða ekki
tilkynnt fyrirfram eðli máls samkvæmt.
Að endingu er í reglunum kveðið á um mikilvægi
þess að í Seðlabankanum verði sinnt ítarlegum rann-
sóknum á þáttum sem varða stefnuna í peninga-
málum og framkvæmd hennar.
Sem fyrr segir kveða ný lög um Seðlabanka
Íslands á um setningu reglna af þessu tagi. Enda þótt
undirbúningur þeirra hafi staðið nokkurn tíma fela
reglurnar í megindráttum í sér að nú hefur verið færð
í letur lýsing á vinnubrögðum sem þegar hafa verið
viðhöfð í bankanum um nokkurt skeið. Reglurnar
verða endurskoðaðar eftir því sem tilefni gefst til.
Meðal annars kemur til álita þegar tímar líða að
ákveða fyrirfram og tilkynna opinberlega daga þegar
bankastjórn metur og ákveður hvort aðgerða sé þörf
í peningamálum líkt og gert er víða annars staðar.
Starfsreglurnar eru eftirfarandi:
Starfsreglur um undirbúning, rökstuðning og
kynningu ákvarðana í peningamálum
Starfsreglur þessar eru settar með hliðsjón af
ákvæðum 3. málsgreinar 24. greinar laga nr. 36/2001
um Seðlabanka Íslands. Þær byggjast á eftirfarandi
meginsjónarmiðum:
• Að tryggt sé eftir föngum að við ákvarðanir í
peningamálum nýtist upplýsingar sem máli
skipta og þekking starfsmanna Seðlabankans.
• Að við ákvarðanir í peningamálum séu viðhöfð
bestu fagleg vinnubrögð og að þær séu vel grund-
aðar og í samræmi við markmið bankans.
• Að ákvörðunarferlið auki gagnsæi peninga-
stefnunnar og auðveldi kynningu á henni.
• Að fyrir liggi eftirá hvernig einstakar ákvarðanir
voru teknar og hvaða ráð og rök lágu að baki.
Vinnuferli
1. Samkvæmt ákvæðum 1. málsgreinar 23. greinar
laga nr. 36/2001 fer bankastjórn Seðlabanka
Íslands með ákvörðunarvald í peningamálum.
2. Samkvæmt 3. grein laga nr. 36/2001 er megin-
markmið Seðlabanka Íslands að stuðla að
stöðugu verðlagi. Með samþykki forsætisráð-
herra hefur Seðlabankinn sett tölulegt markmið
um verðbólgu sem er að jafnaði sem næst 2½%
hækkun vísitölu neysluverðs á 12 mánuðum.
3. Seðlabanki Íslands gerir ársfjórðungslega verð-
bólguspá sem skal birt í Peningamálum. Verð-
bólguspáin sem gerð er á ábyrgð bankastjórnar
skal undirbúin á hagfræðisviði bankans. Við gerð
hennar skal stuðst við spálíkön sem hagfræðisvið
ræður yfir og þróar. Ákvörðun bankastjórnar um
staðfestingu verðbólguspár skal vera skrifleg.
Ítarleg grein skal hverju sinni gerð fyrir for-
sendum hennar.
4. Bankastjórn fylgist stöðugt með framvindu og
horfum í efnahags- og peningamálum og metur
peningastefnuna á grundvelli þess og í samhengi
við verðbólgumarkmið bankans. Bankastjórn
byggir á upplýsingum frá hinum ýmsu sviðum
bankans og mati þeirra á gögnum sem þau safna
og leggja meðal annars fyrir peninga- og fjár-
málafundi, sbr. lið 5. Þá styðst bankastjórn einnig
við upplýsingar sem aflað er með samtölum við
fulltrúa ýmissa samtaka, stofnana og fyrirtækja.
5. Bankastjórn heldur peninga- og fjármálafundi að
jafnaði tvisvar í mánuði en þó eigi sjaldnar en
einu sinni í mánuði með aðstoðarbankastjóra,
aðalhagfræðingi og framkvæmdastjórum al-
þjóðasviðs, fjármálasviðs, peningamálasviðs og
tölfræðisviðs. Á peninga- og fjármálafundum
skulu meðal annars lagðar fram eftirfarandi upp-
lýsingar frá einstökum sviðum bankans: