Bændablaðið - 23.10.2014, Síða 24

24 Bændablaðið | Fimmtudagur 23. október 2014
„Þetta er óskaplega gaman,
mig dreymir stundum sápur á
nóttunni,“ segir Hrefna Waage
sem undanfarin ár hefur búið til
skrautlegar sápur af ýmsu tagi.
Hrefna kallar starfsemi sína
Sápugaman og hægt er að fræðast
nánar um þær á samnefndri vefsíðu
og á Facebook.
Hrefna hefur líka jafnan blað
og penna innan seilingar, því aldrei
er að vita hvenær ný hugmynd að
skemmtilegri sápu kviknar og því
um að gera að hripa hana niður um
leið og hún fæðist.
Heilbrigðisvottað eldhús
Hrefna er Hornfirðingur að ætt og
uppruna en býr á Egilsstöðum og
hefur aðsetur fyrir sápugerð sína
að Þrándarstöðum í Eiðaþinghá, en
þaðan er maður hennar, Benedikt
Hlíðar Stefánsson. Hrefna hefur
komið sér fyrir í húsi sem þar
stendur, Grenisöldu, sem áður stóð
á samnefndum stað við Kárahnjúka,
en var flutt að Þrándarstöðum fyrir
nokkrum árum. Þar hefur hún komið
sér upp góðri aðstöðu, fullkomnu
sápueldhúsi fyrir sig og aflaði sér
þeirra leyfa sem til sápugerðar
þarf, „heilbrigðisvottað eldhús til
framleiðslunnar frá Heilbrigðiseftirliti
Austurlands, þannig að betra verður
það ekki,“ segir Hrefna sem kann
einkar vel við sig í Grenisöldu og er
þar gjarnan um helgar að sýsla við
sápugerð. Virka daga sinnir hún
annarri vinnu á Egilsstöðum.
Hrefna segist hafa óskaplega
gaman af því að breyta inni á
baðherberginu heima hjá sér.
„Ég breyti reglulega um liti inni
á baði og því fylgir að hafa allt í stíl,
handklæði, mottu, kerti, skraut og að
sjálfsögðu sápur. Í framhaldinu fór ég
að kanna hvort ég gæti ekki gert þær
sjálf og leitaði fyrir mér á netinu. Þar
fann ég alveg heilan helling af flottum
sápum og uppskriftum og ákvað þá
að gera sjálf mínar eigin sápur,“ segir
Hrefna.
Hefur vaxið stig af stigi
Í fyrstu fikraði hún sig áfram og bjó
til sápur fyrir eigið heimili, en ekki
leið á löngu þar til hún fór að gefa
ættingjum og vinum eina og eina sápu
og það vatt svo upp á sig, ættingjar og
vinir fóru að falast eftir sápum til að
gefa sínum vinum.
„Þannig hefur þetta vaxið stig af
stigi frá því ég byrjaði fyrir rúmlega
þremur árum,“ segir hún.
Baðtepokar frá Sápugamni sem settir eru út í baðvatnið njóta vinsælda.
Grenisalda, hús sem stendur við bæinn Þrándarstaði í Eiðaþinghá, en var
áður við Kárahnjúka.
„Ég vil endilega að fólk noti sápurnar, til þess eru þær,“ segir Hrefna Waage á Egilsstöðum en hún býr til margs konar skrautlegar sápur. Myndir /MÞÞ
Fátt er notalegra en að bregða sér í gott bað með ilmandi baðbombu.