Skírnir - 01.01.1985, Side 39

SKÍRNIR
FJÖLNIR
35
Fjölnis og hvað væri eftir hvern. Hann taldi að Bóka-fregn í fyrsta
árganginum væri samin af Brynjólfi Péturssyni og greinin Fjölnir
í þriðja árgangi væri samin af þeim þremenningunum í Kaup-
mannahöfn, Brynjólfi, Jónasi og Konráði. Konungsbrjef og
þakklœtisskrá og Boðsbrjef um minnisvarða eptir sjera Tómas
Sæmundsson eru samin af fleirum en einum því að bréf Konráðs
Gíslasonar til Jónasar bera með sér að hann hefir haft þar hönd í
bagga. Hið sama gildir um minnisvarðann eftir séra Tómas Sæ-
mundsson í næsta árgangi á eftir að þar er engin vissa um hver
hefir haldið á pennanum. Björn M. Ólsen telur að Jónas og
Konráð hafi samið greinina Halastjarna í fyrsta árganginum í
sameiningu og Auglísíngar í öðrum árganginum, en frekari
vitneskja um þetta er ekki kunn.
Árið 1831 kom út í Kaupmannahöfn bæklingur sem bar heitið
Den danske Billedhugger Bertel Thorvaldsen og hans Værker.
Ved J. M. Thiele. Þar er lýsing á skírnarfonti sem Thorvaldsen
hafði gert og gefinn var kirkjunni í Brahe-Trolleborg á Fjóni.
Skírnarfonturinn sem Thorvaldsen ætlaði að gefa Miklabæjar
kirkju var nánast sömu gerðar og fonturinn í Brahe-Trolleborg.
Fljótt á litið virðist greinin Frá skjírnarfonti Thorvaldsens í fjórða.
árgangi Fjölnis, vera frumsamin og í Fjölni 1847 er henni valinn
staður milli frumsaminna og þýddra greina Jónasar, en þegar
betur er að gáð kemur í ljós að hér er að mestu leyti um þýðingu
að ræða á hluta af bæklingi Thieles. Helstu viðbæturnar eru um
komu skírnarfontsins til Danmerkur og frásögnin á bls. 39-40
um hug Thorvaldsens til íslendinga.4
Eins og áður segir var Tómas Sæmundsson sá sem skrifaði mest
í Fjölni í óbundnu máli. Næstir eru þeir Konráð og Jónas og mér
telst svo til að hvor þeirra hafi skrifað rúmlega 100 síður af frum-
sömdu efni í ritið, en sumt hafa þeir unnið saman svo að erfitt er
að greina í sundur hvað hvor á og enda þótt Konráð hafi skrifað
meginið af bókafregnum í Fjölni lögðu þar fleiri hönd að verki,
eins og Fundabækur Fjölnisfélagsins votta. Brynjólfur Pétursson
var svo rúmlega hálfdrættingur á við þá Jónas og Konráð með um
það bil 60 síðna lesmál. Frá honum er stórt stökk til annarra höf-
unda Fjölnis sem áttu þar eina grein eða tvær, og sjaldnast náðu
því að fylla eina örk.