Bændablaðið - 26.03.2015, Side 50

50 Bændablaðið | Fimmtudagur 26. mars 2015
Vélabásinn
liklegur@internet.is
Hjörtur L. Jónsson
Nýr Subaru Outback, fólksbíll
eða jepplingur?
Allt frá því að bræðurnir Ómar
og Jón Ragnarssynir sýndu
með eftirminnilegum hætti
hvað Subaru var góður bíll í
rallý um 1980, keyrandi í mark
til sigurs á þrem hjólum niður
grófa brekkuna frá Gullkistu við
Laugarvatn, hef ég alltaf verið
mikill aðdáandi Subaru.
Þrátt fyrir að hafa aldrei átt
Subaru hef ég fylgst vel með
nýjum árgerðum og þegar kemur
að breytingum á Subaru. Hinn 7.
mars var frumsýndur nýr Outback
og tók ég smá prufuakstur á bílnum.
Mikil breyting hvað varðar
aðgengi að vélbúnaði til viðhalds
Alltaf hefur mér fundist sætin
í Subaru góð og nú er komið
rafmagn til að stilla sætið við hlið
ökumanns og einnig er kominn hitari
í aftursæti. Nýi Outback bíllinn fæst
bæði með dísilvél (150 hestöfl) og
bensínvél (175 hestöfl). Ég kaus að
prófa dísilbílinn sem er með nýrri
boxervél og þrátt fyrir kraftmikla
vél er eyðslan ekkert mikil (uppgefin
eyðsla í blönduðum akstri er 6,0
lítrar á hundraðið). Til þessa hefur
ekki verið neitt sérstaklega gott
aðgengi að vélbúnaði og öðru sem
þarfnast viðhalds og sem dæmi er allt
að hálfrar stundar verk að skipta um
stöðuljósaperu í einstaka árgerðum
af eldri Subaru. Allt aðgengi til
viðhalds er framúrskarandi og mjög
gott að koma hendi að öllum perum.
Hlaðinn öryggisbúnaði með 5
stjörnur frá Euro NCAP
Tvær myndavélar (nefnist
EySight), eru hvor sínum megin
við baksýnisspegilinn og snúa fram
og er nefnt skynvætt öryggiskerfi.
Þessi búnaður nemur það sem er
fyrir framan bílinn og sem dæmi
að ef hraðastillirinn er stilltur
á 90 og maður nær bíl sem er á
70 hægir bíllinn sjálfkrafa á sér.
Ef myndavélarnar sjá vegg, bíl,
reiðhjól eða gangandi í akstursstefnu
sem skapar hættu á árekstri gefur
búnaðurinn merki til viðvörunar og
ef þeirri viðvörun er ekki sinnt af
ökumanni bremsar bíllinn sjálfkrafa.
Þessar myndavélar virka líka sem
akreinavari og gefa merki ef maður
fer yfir punktalínu án þess að gefa
stefnuljós, þó var ég var við að
ég fékk viðvörun frá búnaðinum
þar sem hann las krapahrygg sem
punktalínu. Hönnun bílsins gagnvart
hugsanlegum árekstri framan á
bílinn er þannig að ef högg kemur
framan á bílinn fer vélin undir bílinn
en ekki í fætur ökumanns og farþega
enda fékk Outback 5 stjörnur nýlega
í árekstrarprófun.
Kom á óvart í mjög grófum slóða
Sá kostur sem Subaru hefur fram yfir
aðrar tegundir bifreiða er boxervélin.
Með því að vera með boxervél er
þyngdarpunkturinn neðar, bíllinn
stöðugri og liggur almennt aðeins
betur á malarvegum. Einnig er mjög
langt milli hjóla á Outback og fyrir
vikið fer hann betur með farþega
sína á holóttum og grófum vegum
og vegleysum, en Outback er óvenju
langur miðað við sambærilega bíla,
rúmir 4,8 metrar. Í prufuakstri
mínum ók ég mjög grófan vegslóða
og þegar ég sá hvað var fram undan
hugsaði ég að nú væri gott að hafa
lágt drif. Engin þörf var á lágu
drifi, sjálfskiptingin skilaði bílnum
áfram á hægri og mjúkri ferð yfir
allar ójöfnurnar. Oft hef ég nefnt
hversu vitlaus nýju dagljósalögin
eru, en nóg er að vera með ljós að
framan á daginn samkvæmt reglum.
Outback er með svona búnað, en
fram yfir marga aðra nýja bíla er
hægt að kveikja full ljós og hafa
takkann svoleiðis þegar bíllinn er
yfirgefinn. Góður kostur fyrir þá sem
vilja alltaf keyra með ljós.
Fjölskylduvænn jepplingur
Verðið er mjög gott, en Outback
er á verði frá 6.290.000 og nánari
upplýsingar er hægt að nálgast á
vefsíðunni www.bl.is. Að prufuakstri
loknum velti ég því fyrir mér hvort
Subaru Outback væri jepplingur
eða fólksbíll. Niðurstaða mín er að
miðað við það góða rými sem inni
í bílnum er, öryggisútbúnað, kraft
vélar og með þetta nýja drif flokka
ég bílinn sem fjölskylduvænan
jeppling.
Þyngd 1.668 kg
Hæð 1.605 mm
Breidd 1.820 mm
Lengd 4.815 mm
Dráttargeta 1.800 kg
Helstu mál og upplýsingar
Myndir / HLJ
Fróðleikur og viðhald:
Ókosturinn við salt á hálar götur
Mörgum finnst þeir alltaf vera að
skipta um bremsudiska og klossa
á bílunum sínum og endingin
engan veginn nógu góð. Þetta er
mjög misjafnt á milli landshluta
og geta bremsur enst mjög vel
á bílum þar sem götur eru ekki
saltaðar.
Á Akureyri eru götur lítið
saltaðar og í samtali við Ara Þór
Jónsson, bifvélavirkja hjá Höldur á
Akureyri, sagði hann mér að hann
sjái mun á því hvort bílar hefðu verið
1–2 vetur í Reykjavík á móti sams
konar bíl með sama tíma á götum
Akureyrar. Munurinn er mikill
saltaustur á götur Reykjavíkur á
veturna sem berst upp undir bíla og
heitar bremsurnar losa auðveldlegar
við vatnið og eftir verður saltið (sést
oft þegar þornar að hvítar saltrendur
utan á bílum, þetta er oft mun meira
á járninu í kringum bremsur vegna
hitans frá bremsunum). Bílstjóri
sem saltar götur Reykjavíkur sagði
mér að mun meira salt hefði verið
sett á götur Reykjavíkur í vetur
og má því búast við að töluvert
margir bílar séu með saltrendur á
bremsubúnaði eftir veturinn.
Auðvelt er að lengja líftíma
bremsubúnaðar með lítilli vinnu
og tilkostnaði.
Auðveldasta aðferðin til að
lengja líftíma bremsubúnaðar er
að skola hann reglulega með volgu
vatni í gegnum felgurnar. Einnig er
gott að setja ryðvarnarefni á allan
bremsubúnaðinn nema klossana
sjálfa og bremsudiskana
(sjálfur mæli ég með
Fluid Film sem er gott
ryðvarnarefni og unnið
úr ullarfitu úr sauðfé).
Þegar koma leysingar
og pollar myndast á
götum er ástæðulaust að
forðast pollana og hefur
bremsubúnaðurinn bara gott af því
að gusað sé smá í pollunum, en góð
gusa þvær seltuna í burtu.
Þegar skipt er um bremsuklossa
er bráðnauðsynlegt að hreinsa allt
ryð af stálsleðanum sem klossarnir
sitja í og mála þá með hitaþolinni
málningu til að klossarnir festist
síður í sleðunum. /HLJ