Þjóðmál - 01.12.2010, Síða 90

88 Þjóðmál VETUR 2010
misheppnaðrar útrásar þar vestra . Jón
Gerald, sem var sonur bandarísks föður
og íslenskrar móður og hafði alist upp á
Íslandi, hafði í nokkur ár verið heimagangur
hjá Jóhannesi og Jónínu og leit nánast á þau
sem fósturforeldra sína og á Jón Ásgeir sem
fóstbróður sinn . Nú stóð hann skyndilega
frammi fyrir gjaldþroti vegna viðskipta við
þá feðga . Jafnframt komst hann að því,
að Jón Ásgeir hafði leitað á konu hans, og
kveður Jónína í bók sinni óhætt
að segja, að hann hafi sturlast
af bræði yfir því .
Jón Gerald hafði auk
venjulegra viðskipta gert
ýmislegt misjafnt að undirlagi
Baugsfeðga, þar á meðal falsað
reikninga og rekið litla snekkju
í Miami, þar sem vændiskonur
skemmtu gestum Baugsfeðga .
Sumarið 2002 kom Jón Gerald
til Íslands — sturlaður af bræði
eins og Jónína segir — og
leitaði með aðstoð Jónínu að
lögfræðingi, sem gæti rekið mál hans gegn
Baugsfeðgum . Þeir höfðu þá marga helstu
lögfræðinga landsins á sínum snærum, og
stjórnarformaður Baugs, Hreinn Loftsson,
var fyrrverandi aðstoðarmaður Davíðs
Oddssonar . Þau Jón Gerald og Jónína
óttuðust áhrif og ítök Baugsfeðga . Hvar var
lögfræðingur, sem mætti treysta? Jónína sneri
sér til Styrmis Gunnarssonar ritstjóra, sem
hún hafði kynnst vel í raunum sínum . Hann
benti henni á Jón Steinar Gunnlaugsson
hæstaréttarlögmann . Í fyrstu efaðist Jónína
um, að hann væri heppilegur til verkefnisins .
En Styrmir fullvissaði hana um það, að hann
væri alls óháður Baugsfeðgum og góður
vinur Davíðs Oddssonar forsætisráðherra,
en hann hafði einmitt gagnrýnt þá feðga
opinberlega . Fóru nokkur tölvuskeyti á milli
þeirra Styrmis og Jónínu um þetta .
Jón Steinar Gunnlaugsson tók málið að
sér . Hann varaði Jón Gerald við því, að
kæra frá honum vegna falsaðra reikninga
gæti líka beinst að honum sjálfum . En
efst í huga Jóns Geralds var að koma fram
hefndum, eins og Jónína lýsir skilmerkilega
í bók sinni . Lagði Jón Steinar fram kæru
við íslensku lögregluna fyrir hönd Jóns
Geralds, sem leiddi til þess, að lögregla
gerði húsleit í höfuðstöðvum Baugs í ágúst
2002 . Fann hún þar ýmis gögn, og var
eftir rækilega rannsókn ákært
í málinu 2005, og lauk því
sumarið 2008 eftir mikið þóf
fyrir dómstólum með því, að
þeir Jón Ásgeir og Jón Gerald
hlutu báðir skilorðsbundið
nokkurra mánaða fangelsi
fyrir hina fölsuðu reikninga,
en Jón Ásgeir var sýknaður af
mörgum ákæruatriðum .
Jónína Benediktsdóttir varð
gjaldþrota 2003 . Í bók hennar
segir margt af því, hvernig
Baugsveldið reyndi eftir megni
frá 2002 til 2008 að berja niður þau Jón Gerald
Sullenberger og aðra þá, sem það taldi ógna
sér . Keyptu Baugsfeðgar nær alla einkarekna
fjölmiðla landsins, þar á meðal Fréttablaðið,
Stöð tvö, DV og ýmis tímarit . Einkanjósnari
á vegum Baugsfeðga fylgdi Jóni Gerald um
skeið hvert fótmál úti í Bandaríkjunum .
Menn í þjónustu Baugs skrifuðu á Netið
nafnlausar svívirðingar um Jónínu og ýmsa
úr forystusveit Sjálfstæðisflokksins, sem þeir
töldu sér ekki holla . Tókst Jónínu með mikilli
harðfylgni að útvega sér ip-tölur þeirra og
rekja meðal annars í tölvu á Fréttablaðinu,
þótt ekki fylgi sögunni, hver sat þar við
lyklaborð . (Dulnefni hans var, að því er ég
hygg, rimryts, mannsnafnið Styrmir aftur á
bak .) Aðrir menn í þjónustu Baugs höfðu það
verkefni eitt að bera út sögur um Jónínu og
Jón Gerald við innlenda og erlenda fjölmiðla
í því skyni að gera þau tortryggileg .