Árbók Hins íslenzka fornleifafélags - 01.01.2012, Qupperneq 12

11QORLORTORSUAQ: FORNLEIFARANNSÓKNIR Í VATNAHVERFI
Herbergi 2 (eldhús)
Herbergi 2 var fyrir miðri byggingunni og var herbergi 1 vestan en herbergi
3 austan við það. Norður af því var lítill gangur sem lá inn í herbergi 5.
Herbergið var 3,5 x 3,5 metrar að innanmáli. Herbergið var fullt af hruni
og þegar það hafði verið fjarlægt kom í ljós ílangt eldstæði. Einnig kom í
ljós lítill steinveggur á milli herbergis 1 og 2 og gekk eystri hluti eldstæðisins
undir vegginn. Af þessu má draga þá ályktun að á eldra byggingarstigi hafi
herbergi 1 og 2 verið eitt herbergi sem var síðar skipt í tvennt. Gólflagið
í herbergi 2 var tvískipt og lá efra lagið alls staðar í herberginu en endaði
við litla vegginn. Neðra gólflagið var mjög lagskipt og var það alls staðar í
herberginu en lá undir litla steinvegginn sem enn frekar studdi þá ályktun
að herbergin hafi upphaflega verið eitt stórt rými. Eldstæðið var ferhyrnt og
gert úr stórum flötum steinum sem höfðu verið reistir upp á rönd og inni í
því voru litlir flatir steinar. Eldstæðið var fullt af ösku, kolum og viðarleifum.
Stærð og útliti eldstæðisins svipar til annarra eldstæða sem grafin hafa verið
upp í bústöðum norrænna manna frá miðöldum á Grænlandi. Norðan við
eldstæðið var lítil stétt og er óvíst um tilgang hennar. Rétt við eldstæðið
norðanmegin var lítil hola sem var full af litlum steinum. Líklegt er að þetta
sé feluhola þar sem glóð var geymd yfir nótt til að kveikja upp eld að morgni.
Hringlaga stoðarholur og stoðarsteinn við nyrðri langvegg í herbergi 3 (stofu).
Ljósmynd: Ragnar Edvardsson.