Árbók Hins íslenzka fornleifafélags - 01.01.2012, Síða 22

21QORLORTORSUAQ: FORNLEIFARANNSÓKNIR Í VATNAHVERFI
byggingaþróun hafi fylgt svipuðu ferli. Svo virðist sem munur sé á þróun
bygginga milli Eystri- og Vestribyggðar. Í Eystribyggð var þróunin svipuð og
á Íslandi þar sem bætt var herbergjum við íveruhúsið eftir því sem leið á en
flest útihús héldu áfram að vera dreifð í nágrenni þess. Í Vestribyggð þróaðist
svokölluð bæjarþyrping (centralised farm) þar sem öll íveruhús og útihús
voru saman í einni byggingu. Útlit bæjarins í Qorlortorsuaq, byggingarefni
og herbergjaskipan o.s.frv., er svipað því sem sést hefur í uppgröftum á Suður-
Grænlandi og Íslandi frá 12. og 13. öld.23 Rannsóknargögnin benda til þess að
Ø74 hafi verið minniháttar býli, jafnvel kotbýli sem byggði afkomu sína fyrst
og fremst á landbúnaði og þá sérstaklega kinda- og geitabúskap.
Rannsóknin á Qorlortorsuaq er kannski ekki eins mikilvæg og aðrar
rannsóknir sem gerðar hafa verið á Grænlandi en þó er hún mikilvæg viðbót
við rannsóknir á búsetu og búsetuþróun á Suður-Grænlandi. Hún sýnir
sérstaklega að mörgum spurningum varðandi þróun byggðar á Grænlandi er
enn ósvarað og nauðsyn þess að hafnar verði skipulagðar fornleifarannsóknir
á bæjarstæðum bæði í Vatnahverfi og annars staðar. Rannsóknin sýndi að sú
aðferðafræði sem nýtist best við uppgröft á Grænlandi er að opna stór svæði
og grafa í heild sinni í stað þess að grafa litla skurði sem í raun skemma
meira og gefa oft litlar sem engar upplýsingar um uppgraftrarstaðinn.
Stór opinn uppgröftur hentar líka ágætlega í grænlensku umhverfi þar
sem jarðvegsþykknun er hæg og því þarf ekki að grafa sig í gegnum þykk
mannvistar- og jarðlög eins og á mörgum öðrum stöðum í heiminum.