Árbók Hins íslenzka fornleifafélags - 01.01.2012, Page 102

101ETNÓGRAFÍSK ENDURNÝJUN ÍSLENSKRA SAFNA
aðilum og styrktarsjóðum og hefur frá árinu 2004 notið árlegs rekstrarstyrks
úr safnasjóði. Setrið fékk aðstöðu í félagsheimili sem er í nokkurra kílómetra
fjarlægð frá Hólmavík.
Sumarið 2002 var opnuð sýning með yfirskriftinni „Sauðfé í sögu
þjóðar“ sem sýnir minjar og ljósmyndir frá sauðfjárbúskap á Ströndum. Á
hverju sumri hefur setrið boðið upp á viðburði sem hafa það að markmiði
að laða að gesti og skemmta þeim. Sem dæmi má nefna uppákomur eins
og Furðuleika, þar sem keppt er í furðulegum íþróttum eins og afturgöngu,
belgjahoppi, ruslatínslu og skítkasti. Sú uppákoma sem vakið hefur mikla
kátínu og boðið hefur verið upp á frá stofnun, er svokallað hrútaþukl. Þar
eru fengnir til leiks álitlegir hrútar og þeir dæmdir af fagmönnum, en síðan
gefst óvönum kostur á að meta hrútana með því að þukla þá og er það síðan
borið saman við mat fagmannanna. Sá sem kemst næst einkunn þeirra er
sigurvegari. Setrið hefur einnig verið í samstarfi við Byggðasafn Húnvetninga
og Strandamanna á Reykjum í Hrútafirði, en það fékk fjölmarga gripi að láni
frá safninu. Að auki hefur Sauðfjársetrið staðið fyrir söfnun á gripum hjá fólki
í nærsveitum42 og komið fyrir á sýningunni.
Sauðfjársetrið á Ströndum. Ljósmynd: Jón Jónsson