Árbók Hins íslenzka fornleifafélags - 01.01.2012, Síða 114

RAGNAR EDVARDSSON
FORNLEIFARANNSÓKN Í
QUASSIARSUK (BRATTAHLÍÐ)
Á SUÐUR-GRÆNLANDI 2005–2006
Inngangur
Árin 2005 og 2006 fór fram fornleifarannsókn í Quassiarsuk á Suður-
Grænlandi. Staðurinn er einnig þekktur undir nafninu Brattahlíð en
samkvæmt Landnámu og Eiríkssögu var þetta bær Eiríks rauða.1 Þó eru litlar
sem engar fornleifafræðilegar heimildir fyrir því að svo sé. Í þessari grein
eru uppgraftarstaðirnir tveir aðgreindir með kóðunum Ø29a, norðurbærinn
(KNK61V3-III-540), og Ø28b, búðasvæðið (KNK61V3-III-536), eins og
þeir voru skráðir við rannsóknir Nørlunds og Stenbergers sumarið 1932.2
Markmið rannsóknarinnar var tvíþætt. Í fyrsta lagi að ná góðum sýnum,
þ.e. dýrabeina-, plöntu- og gripasýnum, til að fá hugmynd um almenna
varðveislu á staðnum og kanna hvort vert væri að hefja frekari rannsóknir
á búsetu og efnahag norrænna manna í Quassiarsuk. Við fyrri rannsóknir
á Ø29a (KNK61V3-III-540) hafði fundist talsvert magn dýrabeina en fá
þeirra voru flutt á Þjóðminjasafn Danmerkur.3 Dýrabeinasafnið sem geymt
var á Þjóðminjasafninu var svo lítið að það gat ekki gefið neinar öruggar
niðurstöður um efnahag bæjarins á miðöldum. Það var von rannsakenda að
með frekari uppgrefti væri hægt að ná nægjanlega stóru dýrabeinasafni til
að gefa betri hugmyndir um efnahag bæjarins á miðöldum. Í öðru lagi var
markmiðið að fá hugmynd um aldur búsetu á staðnum svo og hugmyndir
um jarðveg og annað sem viðkom búskap í Quassiarsuk á miðöldum. Við
rannsóknina 2005 og 2006 var hreinsað upp úr uppgrefti Nørlunds og
Stenbergers í öskuhaug bæjarins frá 1932. Einnig var grafið í óhreyfðum
mannvistarlögum suðaustan við skurð Nørlunds og Stenbergers.
Árið 2005 var grafið í öskuhaug við bæjarstæði norðurbæjarins (Ø29a)