Húnavaka - 01.05.2016, Page 10
hafa meiri áhuga á öðrum tækifærum, s.s. lagningu sæstrengs til Bretlands. Það er því ljóst
að betur má ef duga skal til að efla atvinnulíf í héraðinu.
Mannlíf er almennt gott í Húnaþingi og byggir m.a. á þeim mannauði að fjöldi fólks
leggur sitt af mörkum til samfélagsins án þess að alltaf sé greitt fyrir þá vinnu. Félagslíf er
því bæði fjölbreytt og skemmtilegt og umhyggjan fyrir náunganum enn til staðar. Þjónusta
sveitarfélaganna er einnig ótrúlega góð miðað við smæð þeirra. Þessi þjónusta er ekki sjálfgefin
nema að hluta til þótt í íslensku samfélagi þyki hún eðlileg og nauðsynleg. Þegar við sjáum
fréttir og fræðslu úr ýmsum öðrum heimshlutum verður okkur þó ljóst að það búa ekki allir
að þeim gæðum sem við teljum svo sjálfsögð. Gæði eins og heilbrigðisþjónusta, félagslegt
öryggi, mannréttindi, menntun, skoðanafrelsi, trúfrelsi og almenn virðing fyrir lífi og tilvist
náungans er ekki allstaðar í heiðri höfð.
Við lifum á tímum örra breytinga. Tækninni fleygir fram á öllum sviðum og verður sífellt
erfiðara að fylgja henni svo vel sé. Miðlun upplýsinga gerist á sekúndubroti; fasbók, app,
twitter, snapchat, tumblr, instagram, skype og þannig mætti lengi upp telja. Magn stafrænna
upplýsinga vex á hverri mínútu sem líður með margfeldisstuðli sem mun einungis fara
hækkandi. Sífellt erfiðara er orðið að vinsa notagildið úr upplýsingum og gögnum á netinu og
stóran hluta þeirra mætti örugglega flokka sem upplýsingamengun. Mannkynið verður einnig
æ berskjaldaðra fyrir tækninni, bæði til góðs og ills. Um upplýsingatæknina má því kannski
nota gömlu ljóðlínurnar; ,,Í honum er gull og grjót, getur unnið mein og bót“. Tæknin gerir
líka stjórnvöldum um allan heim erfiðara fyrir að halda ýmsum upplýsingum frá almenningi
því tæknin hvorki þekkir né virðir nein landamæri. Við sjáum þetta allt í kringum okkur og
atburðir síðustu vikna hér á landi sýna það berlega að t.d. stjórnmálamönnum er hollara að
reyna ekki að leyna eigin hagsmunum. Jafnvel skattaskjól eru ekki lengur öruggur leynistaður.
Ágætu lesendur. Á ársþingi USAH í mars sl. var samþykkt að gangast fyrir átaki í
útbreiðslu Húnavökuritsins. Að þessu sinni verður ritinu dreift inn á öll heimili í A-Hún. og
víðar og um leið er söluverðið lækkað umtalsvert. Með þessu er vonast til að kaupendum og
þar með lesendum ritsins fjölgi og þá jafnframt fleiri stoðum rennt undir rekstur þess. Vonandi
taka heimamenn vel í þetta átak.
Megi árið 2016 verða Austur-Húnvetningum og landsmönnum öllum hagfellt til lands
og sjávar. Lifið heil.
Ingibergur Guðmundsson.
H Ú N A V A K A 8