Húnavaka - 01.05.2016, Page 113
H Ú N A V A K A 111
HARALDUR ÆGIR GUÐMUNDSSON frá Blönduósi:
Björgun
Ég gaf mig á tal við rauðan logann sem svaf í köldu hafinu, hann saug úr mér
orðin og dauðinn reis upp að baki mér, kom úr kafinu. Hann spurði hver ég
væri og hvert ég færi. Ég sagði honum að taka mig ef hann vildi, ég væri ekki
meir. Hann læsti klóm sínum í mig og togaði mig í ölduna og ég gaf eftir í von
um frið. Dauðinn sagði, komdu hér, það er ekkert að óttast, þetta eru bara við,
eldurinn og eilífðin. Loginn táknar þitt hjartabál og ég er þín dauða sál, með
okkur ertu enginn en gætir þó bjargast ef tungan temur orð þín. Ég hélt niðri
í mér andanum er ég dansaði með fjandanum í köldu hafinu, er hjarta mitt
brann. Rauður loginn, sá er ég hræddist mest, stóð upp úr öldunni sem
sólsetur og ég fann, hann tók mig upp votan, dró mig á land, gróf mig í sand
og settist í hafið. Dauðinn hafði kvatt og laumast á kaf, ég slapp úr þessari
atlögu, lá blautur og barinn, óvarinn fyrir heitum kossi rauðaloga, sem
brenndi varir mínar í myrkrinu.
Haraldur Ægir Guðmundsson fæddist
á Blönduósi 30. júlí 1977, sonur Guð-
mundar Haraldssonar og Erlu Bjargar
Evensen. Hann er menntaður húsa-
málari og hefur starfað við það sam-
hliða atvinnuferli í tónlist og textagerð
síðan árið 2006. Hann ólst upp á
Blönduósi, hóf snemma að skrifa ljóð
og texta og vinnur nú að sinni fyrstu
ljóðabók: „Lífið bak við augun/Loga-
börn“ sem áætlað er að komi út á þessu ári. Ljóðin í þeirri bók eru allt frá árinu 1994
og til ljóða sem skrifuð eru árið 2015.
Hann stundaði um tíma nám við tónlistarskóla FÍH í Reykjavík samhliða einka námi
á kontrabassa hjá Þórði Högnasyni. Árið 2006 flutti hann til Salzburgar í Austurríki
og þar hófst atvinnuferill hans í tónlist. Gaf hann út og/eða spilaði inn á 10 hljóm-
plötur, sínar eigin og annarra á árunum 2008 - 2013, þegar hann fluttist aftur til
Íslands.
Haraldur hefur haldið tónleika í Austurríki, Þýskalandi, Króatíu, Liechtenstein og á
Ítalíu. Hann starfar í Reykjavík sem málari og tónlistarstjóri lifandi tónlistar á
Icehotel Marina.