Húnavaka - 01.05.2016, Page 167

H Ú N A V A K A 165
SVEINN TORFI ÞÓRÓLFSSON frá Skagaströnd:
Keli og ég
Þorkell Magnússon 1894 – 1968
Þegar ég átti heima á Skagaströnd, 1945 - 56, bjuggu þar, eins og í öðrum
kauptúnum, ýmsar persónur sem urðu manni
minnisstæðar. Einn þeirra var Keli. Hann hét fullu
nafni Þorkell Magnússon og átti heima í Goðhól, nú
Hólabraut 10, á Skagaströnd en hann var alltaf
kallaður Keli eða Keli gamli.
Keli fæddist í Borgarfirði en ólst upp suður með
sjó, nánar tiltekið á Vatnsleysuströnd. Hann lærði
snemma sjómennsku sem varð hans ævistarf. Hann
var á togurum en síðar formaður á eigin bát og
annarra norður á Skaga, bæði í Kálfshamarsvík og
seinna á Skagaströnd. Honum farnaðist vel. Hann
var veðurglöggur og fiskinn.
Keli var einn af þessum einbúum sem fylgdu
flest um kauptúnum hér áður fyrr. Hann kvæntist
ekki, hafði sérstakan talanda og blandaði lítið geði
við aðra.
Keli var lítill maður vexti og grannur og var orð inn lotinn í herðum í lokin.
Bar hann þess merki að ekki hafði verið mulið undir hann.
Keli átti trillu, sem var hvít á litinn og um eitt tonn að stærð. Um 1955 átti
Keli trilluna, Magnús Jónsson HU 29, 1,5 brl. með 4 ha Volvo Penta vél.
Róðrarlag Kela var sérstakt. Á kvöldin fór hann með línuspotta fram á brún
og næsta morgun fór hann svo og dró línuna. Hann var kominn að stein-
bryggjunni við Hólsnef um klukkan tíu og þangað komu húsmæður á
Skagaströnd og keyptu nýja ýsu og annan fisk af honum.
Keli notaði ekki pundarann en tók í hausinn á fiskinum, lyfti fyrir auga sér
og gaf upp verð. Sumir sögðu að það færi eftir barnafjölda og hvað væri í
buddunni hjá viðkomandi.
Mamma keypti aldrei fisk hjá Kela. Ég held hún hafi verið hálf smeyk við
hann og hún varaði okkur strákana við honum.
Hann byggði sjálfur hús sitt, ásamt fjárhúsi og hlöðu fyrir nokkrar kindur.
Þorkell Magnússon.