Húnavaka - 01.05.2016, Side 174
H Ú N A V A K A 172
Á þessum árum vann Haukur þá vinnu sem til féll. Hann var vinnumaður
á nokkrum bæjum í Blöndudal, hjá bræðrum sínum og á Ytri-Löngumýri hjá
Birni Pálssyni og vann við ýmislegt annað sem til féll í sveitinni. Haukur lagði
stund á frjálsíþróttir á sínum yngri árum og vann til verðlauna.
Hann fór suður til Reykjavíkur að vinna við saltfiskverkun og vann hjá
Íslenskum aðalverktökum við að reisa girðinguna utan um herstöðina á
Keflavíkurflugvelli. Hann var um tíma í frystihúsi í Sandgerði og á bílaverkstæði
hjá hinum landskunna Ólafi Ketilssyni sérleyfishafa. Síðan fór hann aftur
norður. Fyrir norðan vann hann ýmsa vinnu, meðal annars við brúarsmíði.
Eftir það keypti hann sér vörubíl og vann á honum við akstur.
Eftir miðjan sjötta áratuginn hóf hann akstur leigubíla, fyrst á Bifreiðastöð
Steindórs en aðallega vann hann á Borgarbílastöðinni, þar starfaði hann um
eða yfir 40 ár, árin 1960-2000, alltaf með sama afgreiðslunúmer, númer 38.
Haukur eignaðist níu börn. Á árunum 1952 til 1958 var Haukur trúlofaður
Láru Bogey Finnbogadóttur, f. 1936 og eignuðust þau tvö börn, Svan Líndal
f. 1955 og Kolbrúnu Líndal f. 1957. Á árunum 1958 til 1969 var Haukur í
sambúð með Sólveigu S. Bótólfsdóttur, f. 1935 og eignuðust þau Sævar Líndal
f. 1960. Á árunum 1970 til 1994 var Haukur giftur Margréti Önnu Ríkharðs-
dóttur og eignuðust þau Guðmund Inga f. 1970. Önnur börn Hauks eru:
Gunn laugur Þór f. 1951, Þorgeir f. 1952, Eiríkur Rúnar f. 1954, Hafdís f. 1957
og Steinar Valberg f. 1962.
Hann bjó lengst af í vesturbæ Reykjavíkur, vildi búa sem næst kjarna
Reykjavíkur. Síðustu árin bjó hann við Aðalstræti í hjarta borgarinnar. Hann
sagði alltaf að Reykjavík væri borgin sín og þar vildi hann hvíla eftir sinn dag.
En hugur hans leitaði samt norður, hann hélt alltaf tengslum við fjölskyldu
sína þar og þangað fór hann í frístundum. Þá var tjaldað við Svínavatn og
veiddur silungur og soðinn.
Haukur var handlaginn maður, sama hvort það voru pípulagnir, rafmagn,
flísalagnir, málun, smíðar eða vélaviðgerðir. Áhugamál hans voru bílar og
bílaviðgerðir, veiðiskapur og bóklestur, hann var vel lesinn og átti töluvert af
bókum. Hann hafði gaman af kveðskap, setti saman vísur og safnaði vísum
eftir aðra. Einnig hafði hann ánægju af harmonikkuleik og spilaði sjálfur á
harmonikku.
Haukur andaðist á Heilbrigðisstofnunni á Blönduósi, þar hafði hann dvalið
um árabil. Útför hans var gerð frá Neskirkju 27. febrúar og jarðsett var í
Gufuneskirkjugarði.
Sr. Sveinbjörn Einarsson.