Húnavaka - 01.05.2016, Qupperneq 178

H Ú N A V A K A 176
byggði Jörgen hús þar fyrir fjölskylduna. Þau voru búsett á Skagaströnd í
nokkur ár en síðan fluttu þau til Hafnarfjarðar. Samhliða vinnu byggði Jörgen
fjölskyldunni framtíðarheimili við Hlaðbrekku 17 í Kópavogi. Þau fluttu í
Hlaðbrekkuna árið 1960 og bjuggu þar til ársins 2010 að þau hjónin fluttu,
fyrir aldurs sakir, á hjúkrunarheimilið Boðaþing.
Stella var afar ósérhlífin kona og bar annarra hag framar sínum eigin og var
ávallt boðin og búin að rétta hjálparhönd. Hún var mild og góð móðir. Stella
starfaði fyrst og fremst sem húsmóðir en vann oft utan heimilis í hálfu eða fullu
starfi, meðal annars í frystihúsinu Barðanum í Kópavogi. Hún var eftirsóttur
starfskraftur þar enda gaf hún körlunum í flökuninni ekkert eftir. Stella vann
auk þessa ýmiskonar aðra vinnu, til dæmis prjónaði hún og seldi lopapeysur.
Hún vann einnig um tíma sem dagmamma. Síðustu ár starfsævinnar vann
Stella hjá Heilbrigðisráðuneytinu og sá þar um að hella upp á kaffi og hafa til
meðlæti fyrir starfsmenn. Hún var mjög vel liðin og átti gott með að umgangast
fólk af öllum stigum sem reyndust henni vel í alla staði.
Stella fór aldrei út fyrir landsteinana en þau Junni fóru víða um landið á
fjölskyldubílnum og gistu þá oft í tjaldi en síðari árin á hótelum. Henni fannst
alltaf jafn gaman að koma til Skagastrandar á sumrin og heimsækja skyldfólk
og vini þar.
Stella vildi alltaf vera snyrtileg til fara. Hún hafði mjög gaman af að dansa,
hafði einnig gaman af lestri góðra spennu- og ástarsagna og að horfa á góðar
bíómyndir í sjónvarpi.
Hún lést í Boðaþingi og var jarðsungin frá Lindakirkju í Kópavogi, jarðsett
var í Kópavogskirkjugarði.
Sr. Guðmundur Karl Brynjarsson.
Ólafur Guðmundsson,
Skagaströnd
Fæddur 19. desember 1934 – Dáinn 7. apríl 2015
Ólafur var fæddur á Efstabóli í Önundarfirði. Foreldrar hans voru Guðmundur
Friðriksson, f. 1892, d. 1974, bóndi og Guðrún Jóna Kristjánsdóttir, f. 1902,
d. 1972, húsfreyja. Hann var annar í röð fjögurra systkina en þau eru: María
Guðrún, f. 1933, Kristjana Guðrún Sigríður, f. 1936 og Jón, f. 1942.
Ólafur sleit barnsskónum að Efstabóli við hefðbundin sveitastörf. Fjölskyldan
fluttist til Flateyrar er hann var um fermingu, þar lauk hann unglingaskólanámi
og fór síðan til sjós.
Hann hóf nám í Iðnskólanum í Stykkishólmi og lauk námi í skipasmíði hjá
Kristjáni Guðmundssyni skipasmið. Hann fékk meistarabréf árið 1963 en þá
hafði hann smíðað sinn fyrsta bát hjá Slippnum árið 1961. Hann smíðaði
margan bátinn og skipið á sinni ævi.
Snemma bar á einstakri handlagni hans, áhuga fyrir framþróun og áræðni
fyrir nýjungum.