Húnavaka - 01.05.2016, Page 189
H Ú N A V A K A 187
Hanna starfaði lengst af hjá Kaupfélagi Hún vetninga eða allt til ársins 2004
er hún lét af störfum vegna veikinda. Þegar Upprekstrarfélag Eyvindar staða-
heiðar hóf að reka ferðaþjónustu á heiðinni tóku hjónin að sér skálavörslu í
Ströngu kvíslar- og Galtarárskálum í hartnær 20
ár. Þau höfðu einlæga ást á heiðinni og
óbyggðunum, í því umhverfi undu þau sér best.
Þar kom sér vel snilli Sigfúsar í meðferð véla og
tækja, því mörgu þurfti að huga að við
skálavörsluna, umhverfið og við að greiða götu
ferðamanna. Ferðalangar, sem komu flestir
ríðandi, rómuðu hjónin fyrir gestrisni og
hjartahlýju.
Hanna og Sigfús voru samrýmd hjón og miklir
vinir. Þau voru nægjusöm og sóttust ekki eftir efn-
is legum gæðum. Það var gott að sækja þau heim,
heimilið var gestkvæmt og ríkulega borið á borð.
Hanna var glæsileg kona og hélt sér vel til,
hárið óaðfinnanlegt og neglurnar fallegar. Hún elskaði litadýrð í fatavali og var
uppáhaldslitur hennar fjólublár og glitrandi skraut kunni hún að meta.
Tónlist skipaði stóran sess í lífi Hönnu og Sigfúsar, eins og svo margra Svart-
dælinga og var mikið sungið í gegnum tíðina. Hönnu fannst einnig gaman af
að dansa og sótti einnig flestar söngskemmtanir sem hún komst á. Karlakórar
voru í einstöku uppáhaldi hjá henni, sérstaklega Álftagerðisbræður sem hún
átti ættir að rekja til, svo og Karlakór Bólstaðarhlíðarhrepps. Hún var glað-
lynd, hafði fallega rödd og var lagvís.
Hin síðari árin gerði alzheimer-sjúkdómurinn vart við sig og hvarf hún
smátt og smátt inn í heim gleymskunnar. Það kom börnum hennar því á óvart,
eftir að hún veiktist, hversu ógrynni af íslenskum textum hún kunni og mundi
og gladdi það þau mikið.
Hanna lést á sjúkrahúsinu á Blönduósi. Útför hennar var gerð frá Blönduós-
kirkju þann 25. júlí. Jarðsett var í Blönduóskirkjugarði.
Sr. Bryndís Valbjarnardóttir.
Katrín Ólöf Böðvarsdóttir
frá Blönduósi
Fædd 19. nóvember 1980 – Dáin 22. júlí 2015
Katrín Ólöf fæddist í Reykjavík. Foreldrar hennar eru Böðvar Örn Sigurjónsson,
f. 1954 og Gestný Kolbrún Kolbeinsdóttir, f. 1955. Bróðir Katrínar er Sigurjón
Örn, f. 1986.
Þegar Katrín var tæplega ársgömul flutti fjölskyldan norður á Blönduós og
bjó þar í tæp tvö ár. Næstu fjögur árin þar á eftir bjuggu þau í Västerås í Sví-
þjóð þar sem Böðvar var í framhaldsnámi í heimilislækningum. Fjölskyldan