Húnavaka - 01.05.2016, Side 190

H Ú N A V A K A 188
flutti heim frá Svíþjóð árið 1987, settist aftur að á Blönduósi og bjó þar næstu
níu ár sem fylgdu.
Katrín var góður námsmaður og hafði alltaf nóg fyrir stafni í tómstundastarfi.
Hún æfði fót bolta, handbolta og frjálsar og hafði gaman af íþróttum. Hún
lærði einnig á þverflautu við Tónlistarskóla
A-Hún. og var einn af stofnfélögum Lúðrasveitar
Blönduóss. Hún átti sérstaklega auðvelt með
samskipti og var mannasættir frá unga aldri.
Að grunnskólanámi loknu flutti Katrín ásamt
fjölskyldu sinni suður og settust þau að í Kópavogi.
Katrín lauk stúdentsprófi frá Menntaskólanum í
Kópavogi árið 2000.
Á unglingsaldri vann hún meðal annars í
Blöndu virkjun á sumrin. Þar kynntist hún eftir-
lifandi eiginmanni sínum, Þórólfi Heiðari Þor-
steinssyni f. 1980. Foreldrar hans eru Þorsteinn
H. Gunnars son og Inga Þórunn Halldórsdóttir og
var mjög kært með þeim.
Þau Katrín og Þórólfur unnu einstaklega vel saman að þeim verkefnum sem
lífið færði þeim í fang, fyrst á námsárunum þegar Katrín var í læknisfræðinni
og Þórólfur í lögfræðinni og síðar þegar þau stofnuðu heimili og fjölskyldu.
Þau Þórólfur stofnuðu sitt fyrsta heimili að Eggertsgötu 2 í Reykjavík en
bjuggu síðar að Lómasölum 12. Synir Katrínar og Þórólfs eru: Matthías Örn
f. 2007 og Benedikt Arnór f. 2011.
Meðfram læknanáminu var Katrín virk í starfi Alþjóðanefndar læknanema.
Hún aðstoðaði erlenda skiptinema og skipulagði ferðir fyrir þá. Hún gegndi
ýmsum trúnaðarstörfum fyrir nefndina, meðal annars formennsku og fór á
hennar vegum á ráðstefnur í Venesúela og Egyptalandi.
Katrín lauk embættisprófi frá Háskóla Íslands árið 2009. Hún starfaði sem
læknir, bæði við heilsugæsluna í Salahverfi og í Árbæ. Hún lét sér annt um
sjúklinga sína, var þolinmóð og gaf sér góðan tíma til að hlusta. Hún hóf
sérnám í heimilislækningum árið 2010 og öðlaðist fjölbreytta starfsreynslu á
sjúkrahúsum, bæði á höfuðborgarsvæðinu og landsbyggðinni.
Sérnáminu hugðist Katrín ljúka á æskuslóðunum í Svíþjóð og þau Þórólfur
fluttu með drengina til Västerås í ársbyrjun 2013.
Katrín var mikið náttúrubarn og elskaði að ferðast um Ísland. Hún hafði
mikinn áhuga á útivist og stangveiði, var einnig áhugaljósmyndari og hafði
sem slík næmt auga fyrir augnablikinu og náttúrunni.
Síðla hausts árið 2014 glímdi Katrín við þrálát veikindi sem í fyrstu fannst
ekki skýring á. Skömmu fyrir jólin fékk hún þær fréttir að um ólæknandi mein
væri að ræða. Katrín tók þessum fréttum af einstöku æðruleysi. Hún lést á
krabbameinsdeild Landspítalans. Útför hennar var gerð frá Lindakirkju í
Kópavogi 30. júlí. Jarðsett var í Kópavogskirkjugarði.
Sr. Guðmundur Karl Brynjarsson.