Húnavaka - 01.05.2016, Page 192
H Ú N A V A K A 190
við Höfðaskóla. Síðustu starfsárin vann hún á leikskólanum Barnabóli. Hún
hafði góða nærveru, hændust börn auðveldlega að henni og naut hún virðingar
þeirra.
Guðmunda var lagin hannyrðakona. Í mörg ár saumaði hún og föndraði
fallega muni fyrir jólin sem hún gaf til Líknarfélagsins Hringsins. Hún var
einnig góður liðsmaður í Kvenfélaginu Einingu sín fyrstu ár á Skagaströnd og
sat í hreppsnefnd um tíma.
Guðmunda bar ákaflega hlýjar tilfinningar til Hólaneskirkju og starfaði í
sókn ar nefnd síðustu árin. Í mörg ár annaðist hún þrif í kirkjunni og gaf um
leið alla sína vinnu. Hún hafði ríka réttlætiskennd, var áreiðanleg og passasöm.
Í henni bjó æðruleysi, kraftur og þrjóska en hún skipti sjaldan skapi. Hún var
fróð, las mikið og var rithöfundurinn Guðrún frá Lundi henni einkanlega
hugleikinn.
Eftir 56 ára hjónaband létust Ólafur og Guðmunda með um fjögurra
mánaða millibili. Guðmunda andaðist á Landspítalanum í Fossvogi. Útför
hennar var gerð frá Hólaneskirkju 29. ágúst, jarðsett var í Spákonu fells kirkju-
garði.
Sr. Bryndís Valbjarnardóttir.
Jón Jósef Magnússon,
Steinnesi
Fæddur 22. maí 1919 – Dáinn 4. október 2015
Jósef var fæddur í Brekku í Þingi. Foreldrar hans voru Sigrún Sigurðardóttir,
f. 1895, d. 1981, húsmóðir í Brekku og Magnús Bjarni Jónsson, f. 1887,
d. 1962, bóndi í Brekku. Bræður Jósefs eru:
Sigurður Sveinn, f. 1915, d. 2000, Þórir Óli,
f. 1923, d. 2015, Haukur, f. 1926, d. 2013 og
Hreinn, f. 1931.
Jósef ólst upp í Brekku með foreldrum sínum
og bræðrum við alla almenna sveitavinnu.
Skólagangan var farskóli sveitarinna og síðan
Hólaskóli en Jósef varð þó að hætta námi vegna
veikinda. Eftir Hólaskóla var hann um tíma í
Íþróttaskólanum í Haukadal.
Árið 1949 kvæntist Jósef Guðrúnu Vilmund ar-
dóttur, f. 1925, d. 2005. Hún var fædd í Reykjavík,
foreldrar hennar voru Ólafía Björnsdóttir,
f. 1901, d. 1974 og Vilmundur Vilhjálmsson,
f. 1899, d. 1962. Jósef og Guðrún fluttu norður árið 1950 og hófu búskap.
Fyrstu búskaparárin voru þau á Hnjúki en fluttu síðan að Þingeyrum árið
1955 og bjuggu þar alls í nítján ár. Í Steinnes fluttu þau árið 1974, þá jörð
keyptu þau og bjuggu Jósef og Guðrún þar sína ævi bæði til enda. Síðustu ár