Húnavaka - 01.05.2016, Qupperneq 202

H Ú N A V A K A 200
þau urðu hluti fjölskyldunnar og voru virt til jafns við fullorðna. Þau fengu
hlýju og umhyggju og lærðu að vinna og bera virðingu fyrir fólki, skepnum,
náttúru og lífinu öllu og jafnvel dauðanum. Hjá Kötu og Jonna var tími til
samtals og eðlilegt að tala um allt, bæði gleði og sorg, líf og dauða.
Katrín var fyrirmyndarhúsmóðir og fæddur bóndi. Hún naut sín innan um
kýr og kindur en sauðburðurinn var í sérstöku uppáhaldi. Börnin fengu
kennslu í „fæðingarhjálp“ og nágrannar nutu aðstoðar hennar eftir þörfum.
Húsmóðirin á Steiná hafði tíma í fleira. Hún var mikil félagsvera og tók að
sér mörg hlutverk og ábyrgð sem hún sinnti af trúmennsku. Hún var tónelsk
og söng í kórum, lengst í kirkjukórum. Hún byrjaði að syngja í kirkjukór
Undirfellskirkju 13 ára að aldri en síðar í kirkjunni á Bergs stöðum og í
nágrannakirkjum. Samtals söng hún í kirkjukórum í 57 ár.
Á Steiná er mikið ættingjasamfélag enda þríbýlt. Gott samfélag og samvinna
á bæjunum hefur sett svip á staðinn. Katrín bjó þar sem hluti þessarar
fjölskyldu í rúma hálfa öld og með fimm kynslóðum. Hún var geðgóð og
ráðagóð, stóð aldrei í þrasi eða rifrildi en hafði sínar ákveðnu skoðanir. Hún
gerði samferðamenn sína að betri mönnum og dreifði birtu og kærleika hvar
sem hún var.
Frá ungum aldri glímdi Katrín við ýmis veikindi en var hörð af sér og lærði
að lifa með því. Síðustu 15 árin háði hún baráttu við krabbamein sem bar
hana að lokum ofurliði. Hún andaðist á Heilbrigðisstofnun Norðurlands á
Blönduósi á 2. sunnudegi í aðventu.
Útför Katrínar Grímsdóttur var gerð frá Bergsstaðakirkju 15. desember
2015. Jarðsett var í Bergsstaðakirkjugarði.
Sr. Stína Gísladóttir.
Aðalbjörg Sigurðardóttir
frá Akurgerði á Skagaströnd
Fædd 3. júní 1930 – Dáin 10. desember 2015
Aðalbjörg fæddist að Fiskinesi í Steingrímsfirði í Strandasýslu. Foreldrar
hennar voru Hallbjörg Jónsdóttir, f. 1909, d. 1987 og Sigurður Guðmonsson,
f. 1904, d. 1981, sem bjuggu að Fiskinesi og á Hafnarhólmi. Aðalbjörg var elst
sjö systkina en þau eru Guðrún, f. 1936, Hjördís, f. 1938, Gylfi, f. 1941, Jón
Brynjólfs, f. 1943, d. 1967, Árni Ólafur, f. 1949 og Reynir, f. 1951.
Aðalbjörg ólst upp á Fiskinesi í Steingrímsfirði hjá foreldrum sínum. Ung
að árum kynntist hún manni sínum, Þorbirni Jónssyni, f. 1922, d. 1986, frá
Hafnarhólmi á Selströnd. Þau bjuggu á Akranesi og Hafnarhólmi um tíma en
fluttu til Skagastrandar árið 1949 þar sem þau byggðu húsið Akurgerði og
bjuggu þar í 18 ár. Þau fluttu í Kópavog 1967 og bjuggu þar á nokkrum
stöðum til æviloka.
Börn þeirra eru: Ómar Örn f. 1946, maki hans er Sigríður Sturlaugsdóttir
og eiga þau þrjú börn. Hrefna f. 1948, maki hennar var Gunnlaugur Melsteð