Morgunblaðið - 15.11.2018, Blaðsíða 31

31
MORGUNBLAÐIÐ FIMMTUDAGUR 15. NÓVEMBER 2018
markmiðið er alltaf að ferðalagið sé
sem skilvirkast, hvort sem farþegar
eru að koma til Íslands, fara frá Ís-
landi, eða fljúga í gegnum Ísland.
Við höfum sagt að þegar búið er
að byggja tengibygginguna eigi hún
ein og sér eftir að breyta upplifun
farþega þegar komið er upp eftir
vopnaleit og gengið inn í verslunar-
og veitingasvæðið og farið út að hlið-
unum. Þetta breytir allri upplifun af
Keflavíkurflugvelli,“ segir Guð-
mundur Daði.
Kostar um 70 milljarða
Næsti áfangi er að stækka
norðurbygginguna til norðurs og
byggja austurálmu með flughliðum.
Guðmundur Daði segir nú áætlað
að sá áfangi kosti um 70 milljarða.
„Vinna við að hanna austurálm-
una er ekki hafin. Frá því að við
byrjum að huga að því að byggja
austurálmuna mun verkefnið taka
um fimm og hálft ár. Ef hafist verð-
ur handa við að undirbúa hana á
næstu 12 mánuðum gæti hún mögu-
lega verið tilbúin í kringum 2025.“
Með stækkun norðurbyggingar-
innar til norðurs verða til ný af-
greiðslusvæði komu- og brottfarar-
farþega. Á annarri hæð norður-
byggingar verður innritunarsalur
brottfararfarþega, ásamt nýju svæði
fyrir öryggisleit. Á fyrstu hæð verða
ný færibönd við heimkomu.
Kostnaður við stækkun norður-
byggingar til norðurs liggur ekki
fyrir. Hins vegar hefur verið rætt
um 30 milljarða til viðmiðunar. Þá
hefur norðurbyggingin ekki verið
tímasett. Gengið er út frá því að
fyrst verði byrjað á austurálmu en
norðurbygging þyrfti að vera tilbúin
á sama tíma og allir áfangar austur-
álmu eru fullbyggðir.
Auðvelt að áfangaskipta
Tengibyggingin gæti því kostað
25-30 milljarða og austurálman og
norðurbyggingar kostað 70 og 30
milljarða, eða alls 130 milljarða.
„Hvað varð austurálmuna og
stækkun norðurbyggingarinnar til
norðurs hafa stærðirnar áhrif hvor á
aðra. Það er afar líklegt að þessum
framkvæmdum verði áfangaskipt. Í
raun hefur öll þróunaráætlunin
gengið út á að auðvelt væri að
áfangaskipta verkefninu. Það var
einn af kostunum sem við sáum til
dæmis við að byggja austurálmuna
að þar er nú bílastæði. Þetta er gott
byggingarsvæði. Á meðan verið er
að byggja austurálmuna er hægt að
hafa nánast allan flugvöllinn í fullum
rekstri en tryggja aðkomu allra
verktaka og þeirra sem eru að
byggja,“ segir Guðmundur Daði.
Virkjast með farþegafjölda
Guðmundur Daði segir aðspurður
að tíðindin af WOW air breyti ekki
heildarmyndinni. Þau gefi ekki til-
efni til að setja verkefnið á ís.
„Við höldum áfram með verkefnið
eins og áður, sérstaklega með tengi-
bygginguna. Lykilatriði fyrir okkur
er að það er ekki búið að fara í fjár-
hagslegar skuldbindingar. Áætlunin
miðast við og gengur út á ákveðinn
farþegafjölda og hún virkjast þegar
við sjáum að það er þörf fyrir að
byggja fyrir þann fjölda. Ef þessi
órói mun hægja á vexti þá sníðum
við okkur stakk eftir vexti. Það er
mjög auðvelt að áfangaskipta aust-
urálmunni og norðurbyggingunni.
Norðurbyggingin skiptist í þrjár
innritunareyjur. Það væri ekki hag-
kvæmt að byggja eina en það væri
hægt að byggja tvær í staðinn fyrir
þrjár og svo framvegis. Við erum
enn með sömu langtímaáætlunina
en hvernig hún verður framkvæmd
mun skýrast. Við fylgjumst grannt
með því sem er að gerast.“
Þarf ekki á framlagi að halda
Tekjur Isavia hafa aukist mikið
síðustu ár. Félagið er opinbert
hlutafélag í eigu ríkisins.
Guðmundur Daði segir aðspurður
að sjóðstreymi dugi ekki fyrir öllum
framkvæmdum. Félagið geri í sínum
áætlunum ekki ráð fyrir að íslenska
ríkið, sem eigandi félagsins, muni
leggja fram aukið hlutafé til upp-
byggingar verkefnisins. Lánsfé
verði sótt á almennum markaði í
gegnum skuldabréfaútboð eða lán-
töku. Það sé ekki ljóst hversu mikil
lántakan verður.
„Það er verið að gera fjár-
streymisáætlanir. Framkvæmdir á
flugvelli eru í eðli sínu mjög fram-
þungar. Það er verið að leggja til
mjög dýr mannvirki en það fást ekki
neinar tekjur fyrr en þau eru tekin í
notkun. Því er eðlilegt að bilið sé
brúað milli framkvæmda og þar til
tekjurnar koma inn.“
Veiking krónu hefur áhrif
Guðmundur segir aðspurður vís-
bendingar um að veiking krónunnar
í haust hafi haft áhrif á eftirspurn
erlendra ferðamanna á vellinum.
„Við sjáum breytta kauphegðun
Árið 2012 Flugstöðin hefur verið stækkuð til suðurs. Umferðin er farin að þyngjast mikið.
Ljósmyndir/Ljósmyndir ehf./Birt með leyfi
2018 Suðurbyggingar hafa verið stækkaðar frekar og byggt við norðurbyggingu til vesturs.
 SJÁ SÍÐU 32