Skessuhorn - 25.03.2015, Blaðsíða 26

26 MIÐVIKUDAGUR 25. MARS 2015
Hin árlega árshátíð Brekkubæj-
arskóla á Akranesi var haldin í sal
skólans 17. og 18. mars síðastlið-
inn. Að þessu sinni voru söngleikir
rauður þráður í gegnum sýninguna.
Atriðin voru fjölbreytt og búningar
æði skrautlegir.
Fyrsti bekkur var með atriði úr
Latabæ, annar bekkur lét þau Emil
og Línu hittast, þriðji bekkur var
með atriði úr Dýrunum í Hálsa-
skógi og krakkarnir í fjórða bekk
voru með atriðið um Glám og
Skrám í Sælgætislandinu. Eftir því
sem ofar dró í aldri varð viðfangs-
efnið fullorðinslegra því fimmti
bekkur var með atriði út Grease
og sjötti bekkur söng um Talúlu
og ganstera úr Bugsy Malone. Í
framangreindum atriðum komu
allir nemendur fram og má segja að
það sé eitt af aðalsmerkjum árshá-
tíðarinnar, þ.e. allir eru með. Þá er
það löngu orðin hefð að þeir nem-
endur í 7. bekk sem þátt tóku í upp-
lestrarkeppninni flytji ljóð.
Tónlistarlíf er afar fjölbreytt í
Brekkubæjarskóla og þau Heiðrún
og Sammi, tónlistar- og leiklistar-
kennarar, óþreytandi að þjálfa og
leiðbeina nemendum. Á árshátíð-
inni kemur afrakstur þeirrar vinnu
í ljós. Hljóðfæraleikarar úr sjöunda
til tíundabekk léku undir í lang-
flestum atriðum, ýmist sem heil
hljómsveit eða í smærri hópum.
Einsöngvarar og hljómsveitir stigu
á stokk og rúsínan í pylsuendanum
var Unglingakór Brekkó sem kom
út tárunum á einum eða fleirum
með söng sínum. Inn á milli atriða
sprelluðu brandarakarlar og kerl-
ingar en sýningunni var svo haldið
saman af föngulegum kynnum, að
þessu sinni úr níunda bekk.
Það er svo að þeir nemendur sem
stíga á svið eru alltaf meira áberandi
en þeir sem vinna verk sín baka til.
Skólinn hefur á að skipa ótrúlega
flinkum tæknimönnum sem kunna
flestallt sem snýr að hljóðblöndun,
lýsingu og myndatöku. Þá er dá-
góður hópur sem aðstoðar baksviðs
og ekki má gleyma þeim ungling-
um sem eru í gæslu á yngstu nem-
endum skólans á meðan á sýningu
stendur.
Af ofangreindri upptalningu
má sjá að það er mikið og þrosk-
andi nám sem fram fer í tengslum
við svo fjölbreytta skemmtun sem
Árshátíð Brekkubæjarskóla er.
Hallbera Jóhannesdóttir
Árshátíð Brekkubæjarskóla á Akranesi
Meðfylgjandi myndir voru teknar
síðastliðinn miðvikudag þegar um
60 fermingarbörn úr Saurbæjar,-
Hvanneyrar,- Borgar,- Stafholts,-
Reykholts- og Staðastaðarpresta-
köllum komu saman í Reykholti
ásamt prestunum sínum. Þar nutu
þau fermingarfræðslu daglangt.
Þetta samstarf sóknanna hefur
verið við lýði um árabil. Þar sem
Fermingarblað Skessuhorns kom
út áður en unga fólkið hittist í
Reykholti látum við þessar mynd-
ir fljóta hér með.
mm/ Ljósm. Dagný
Emilsdóttir.
Hittust við fermingar-
fræðslu í Reykholti