Litli Bergþór - maj 2019, Qupperneq 34

að telja í hana kjark og hugga hana. Nokkru áður
en farið var að flugstöðinni rákumst við á Lars
gamla Motzfeldt og dóttur hans og dótturdætur
tvær og reyndum við að spjalla dálítið við hann.
Eftir tollskoðun og vopnaleit komumst við loks í
flugvélina um kl. 5.30. Þá flýttum við klukkunni
um tvo tíma svo að hún var 7.30 eftir íslenzkum
tíma, þegar lagt var af stað. Við flugum vestur
yfir Eiríksfjörð og lyftum okkur upp yfir hálsana
ofan við Brattahlíð inn yfir Ísafjörð og sveigðum
þar ofan skýja n.a. yfir Grænlandsjökul. Bjart
var yfir austurstöndinni og gott skyggni yfir það
kuldalega freraríki. Við gátum auðveldlega séð
rekísjaðarinn langa vegu og nokkrar eyður í ísinn
út af sumum fjörðunum. Grænland hvarf okkur
um 8.45. Við flugum yfir fagurblátt haf nokkra
stund, en síðan tók skýjahula við.
Um það leyti sem við vorum að fljúga út yfir
ströndina steig Grímur á S-Reykjum fram og
flutti nokkur þakkarorð til ferðafélaganna, en bað
svo Jónas fararstjóra vorn að lesa eftrfarandi vísur
sem við skulum nefna Grænlandsvísur Gríms á
Reykjum:

Þegar gyllir sólin sund,
sanda, grjót og frera,
þá er hollt á Grænlandsgrund
í glöðum hópi að vera.
Hér er blómi úr bændum lands,
byggða vorra sómi.
Kætir augu í karlafans
kvenna þeirra ljómi.
Nú er afl mitt orðið slappt
á því fátt að vonum.
En einhverntíma hefði ég haft
hug á slíkum konum.
Herra Jónas heiti gaf
að hrösun hver með konum,
skyldi að bragði borgast af
búnaðarfélögonum.
Ellin hún er örg og blind
og erfitt hana að temja.
Lengur ekki ljúfa synd
leyfir hún mér að fremja.
…
Misjafnt láta menn í dag,
margir gráta og trega.
Aðrir kátir kveða lag,
kenndir mátulega.
Skrásett af Geirþrúði Sighvatsdóttur 2018.
Ungmennafélag Biskupstungna
þakkar öllum þeim sem styrkja
útgáfu blaðsins með styrktarlínu
eða auglýsingu og óskar þeim
sem og lesendum öllum
GLEÐILEGS SUMARS!