Sveitarstjórnarmál - okt. 2019, Blaðsíða 30

30
SVEITARSTJÓRNARMÁL
Þann 17. september sl. boðaði stjórn
SSKS aðildarsveitarfélög til vinnufundar í
Vestmannaeyjum. Alls voru fulltrúar frá 8
sveitarfélögum á fundinum ásamt Sigurði
Inga Friðleifssyni frá Orkusetri, Benedikt
Guðmundssyni frá Orkustofnun og
Ragnari Ásmundssyni frá Varmalausnum.
Megintilgangur ferðarinnar
var að undirbúa stefnu-
mótun fyrir samtökin en
mikil nýliðun hefur verið
meðal fulltrúa sveitarfélaga
undanfarin ár.
Þrátt fyrir að stofnskrá samtakanna kveði
á um hlutverki þeirra taldi stjórnin að
skýra þyrfti betur markmið þeirra og þá
ekki síst með tilliti til þess hvaða leiðir
eigi að fara til að markmiðum verði náð.
Einnig er þörf á að stilla saman strengi
aðildarsveitarfélaganna til að slagkraftur
þeirra verði sem allra mestur.
Jöfnun húshitunarkostnaðar
Farið var með Herjólfi frá Landeyjahöfn
að morgni og hófst vinnuferðin
með kynningu hjá HS Veitum á
sjóvarmadælunni sem notuð er til
kyndingar í Vestmannaeyjum á stórum
hluta bæjarins og var tekin í notkun
í lok síðasta árs. Eftir sameiginlegan
hádegisverð hélt hópurinn í
Þekkingarsetrið í Vestmannaeyjum þar
sem Sigurður, Benedikt og Ragnar voru
með gagnleg innlegg um þróun jöfnunar
á raforkuverði og mögulegar tæknilausnir
til lækkunar kostnaðar á húshitun fyrir
köld svæði og munu þau nýtast stjórninni
til áframhaldandi stefnumótunar.
Einnig voru kynntar helstu
niðurstöður könnunar sem send var
út til aðildarfélaganna nú í sumar.
Niðurstöður könnunarinnar leiddu í
ljós að jöfnun húshitunarkostnaðar er
aðildarsveitarfélögunum efst í huga
þegar kemur að mikilvægustu verkefnum
SSKS. Mörg aðildarsveitarfélaganna hafa
þegar lagt í umtalsverðar fjárfestingar
í innviðum til að lækka orkukostnað
eða eru að huga að því að fjárfesta í
slíkum aðgerðum eða innviðum. Góðar
umræður voru á fundinum um hvaða
áherslur og aðferðafræði samtökin
ættu að beita sér fyrir til að ná settum
markmiðum. Íris Róbertsdóttir bæjarstjóri
Vestmannaeyjabæjar kom einnig inná
fundinn og fór yfir reynslu þeirra af
sjóvarmadælunni. Þar sem fundarmenn
voru ekki komnir með nóg eftir fundinn
í Þekkingarsetrinu var haldið áfram að
funda í Herjólfi á leiðinni aftur upp á land
og var Kristinn Jónasson bæjarstjóri í
Snæfellssbæ með kynningu á reynslu
þeirra af ýmiskonar varmadælulausnum.
Mikil ánægja var með fundinn og verður
hann vonandi árlegur viðburður hjá
samtökunum en það kom glögglega í ljós
að einn dagur var varla nóg til að fara
yfir svo mikilvægt hagsmunamál sem
húshitun og raforkukostnaður er fyrir
sveitarfélög á köldum svæðum. Stjórn
SSKS stefnir á að leggja fram tillögu
að stefnu samtakanna á aðalfundinum
sem haldin verður 4. október nk. eftir
Fjármálaráðstefnu sveitarfélaga á Hilton
Reykjavík Nordica.
Vinnuferð SSKS til Vestmannaeyja
Frá varmadælustöð HS Veitna í Vestmannaeyjum (Ljósm.: Ingibjörg Hinriksdóttir)