Sveitarstjórnarmál - okt. 2019, Side 42

42
SVEITARSTJÓRNARMÁL
Umræðan um jafnréttismál hefur
tvímælalaust þróast í rétta átt. Ég sat
minn fyrsta landsfund árið 2000 og ef ég
ber saman umræðuna þá við umræðuna
á landsfundinum í ár er ljóst að við erum
komin á allt annan stað. Fólk hefur öðlast
miklu víðari sýn á jafnréttismálin og nú
eru miklu fleiri að vinna af skilningi að
málefninu. Þetta þykir mér ánægjuleg
þróun því ég hef verið viðloðandi
jafnréttismál og sveitarstjórnarmál um
langt skeið og jafnréttismál sveitarfélaga
eru mér satt að segja sérstakt áhugamál,
segir Katrín Björg Ríkarðsdóttir,
framkvæmdastjóri Jafnréttisstofu, að
afstöðnum landsfundi um jafnréttismál
sveitarfélaga sem haldinn var í Garðabæ
í byrjun september.
Fyrsti landsfundurinn af þessu tagi
var haldinn 1993 og síðan hafa þeir
með fáum undantekningum verið
haldnir ár hvert. Að sögn Katrínar voru
fundirnir fyrst í stað takmarkaðir við
jafnréttisnefndir sveitarfélaga en síðari
árin hefur verið fjallað um jafnréttismál
almennt á landsfundum. Fundirnir eru
samvinnuverkefni sambandsins og
Jafnréttisstofu og sveitarfélagsins sem
hýsir fundinn hverju sinni. Katrín segir að
þátttaka í fundunum hafi þokast mjög í
rétta átt.
Þátttökumet
„Þátttakendur á fyrstu fundunum voru
ekki svo ýkja margir, kannski 20 manns
eða svo, en á síðustu árum hefur
þátttakan verið mun meiri og nú settum
við met því 80 manns frá rúmlega
30 sveitarfélögum mættu til leiks í ár.
Við viljum auðvitað gera enn betur en
þetta en þessi þátttaka sýnir vaxandi
meðvitund sveitarfélaga um mikilvægi
jafnréttismála. Það hefur verið ákveðin
tilhneiging til þess að stærri sveitarfélögin
sendi frekar fulltrúa á landsfundi um
jafnréttismál en að mínu mati er ákaflega
mikilvægt að smærri sveitarfélögin taki
líka þátt í vaxandi mæli. Þótt sveitarfélög
séu smá og hafi fáa starfsmenn hafa þau
ríkar skyldur í jafnréttismálum samkvæmt
lögum. Að mínu mati er landsfundurinn
mikilvægur vettvangur fyrir sveitarfélög,
stór sem smá, til að læra hvert af öðru í
þessum efnum. Það er svo gagnlegt að
kalla fólk saman til að eiga samtal um
þessa hluti, bæði formlegt og óformlegt,
svo fólk geti lært hvert af öðru,“ segir
Katrín.
Hún hefur gegnt embætti
framkvæmdastjóra Jafnréttisstofu
undanfarin tvö ár. Hún starfaði á
Jafnréttisstofu á árunum 2000-2003
og fór svo til starfa hjá Akureyrarbæ.
Fyrst sem jafnréttisráðgjafi, svo
framkvæmdastjóri samfélags- og
mannréttindadeildar og loks sem
aðstoðarmaður bæjarstjóra.
Umræðan um jafnréttismál
sveitarfélaga á réttri braut
Eftir Garðar H. Guðjónsson
Katrín Björg Ríkarðsdóttir, framkvæmdastjóri Jafnréttisstofu á landsfundi um jafnréttismál sveitarfélaga, sem fram fór í Garðabæ í september.