Bændablaðið - 14.12.2017, Blaðsíða 7

7Bændablaðið | Fimmtudagur 14. desember 2017
Jólamarkaður Skógræktarfélags
Reykjavíkur í Heiðmörk við Elliðavatn
verður opinn í síðasta skiptið fyrir jól um
næstu helgi frá klukkan tólf til fimm, báða
dagana.
Markaðurinn er haldinn ár hvert af
Skógræktarfélagi Reykjavíkur. Þar myndast
iðulega ljúf jólastemning og heimsókn
á markaðinn er orðin ómissandi hluti af
aðventuhefðinni hjá mörgum fjölskyldum.
Jólamarkaðurinn er haldinn í
Elliðavatnsbænum og við hann í Heiðmörk
og mynda skógurinn og vatnið sannkallaða
vetrarparadís, sem gestir geta notið þess að ganga
um. Að sögn Söru Riel hjá Skógræktarfélagi
Reykjavíkur er jólaskógurinn á Hólmsheiði
þar sem fólk getur fundið og sagað sitt jólatré
sjálft. Á staðnum eru sagir sem viðskiptavinir
fá afnot af og skógarhöggsmenn aðstoða gesti
við að finna jólatré og pakka þeim inn í net.
Það kostar jafn mikið að höggva sitt eigið
tré og að kaupa þau sem eru þegar hoggin,
en þau eru til sölu bæði við Elliðavatnsbæinn
og á Hólmsheiði.
„Skógræktarfélag Reykjavíkur selur að
sjálfsögðu íslensk jólatré af ýmsum gerðum,
en fyrir hvert keypt tré eru 50 ný gróðursett.
Auk þess verða mismunandi vörur úr
skóginum í boði. Öll trén eru af löndum sem
Skógræktarfélag Reykjavíkur hefur umsjón
með; Heiðmörk, Hólmsheiði og Reynivellir.
Furan er sú tegund sem við seljum mest af
en það fer þó jafnt og þétt af öllum tegundum.
Einnig má benda á að við höfum á þriðja
ár selt tré sem við köllum „Einstök tré“. Þetta
eru tré sem eru furðuleg í laginu, hafa marga
toppa eða eru á einhvern hátt óvenjuleg,“
segir Sara.
Verð á trjám er á bilinu frá 5.000 krónum
(0–1 metri) til 16.000 króna (2,5–3 metrar),
eldiviður kostar 2.500 kr. og greinabúnt 1.500
kr.
Jóla- og handverksmarkaður
„Skógræktarfélag Reykjavíkur heldur utan
um handverksmarkað þar sem sérstök
áhersla er lögð á einstakt handverk, unnið
úr náttúrulegum efnum, auk þess sem mat-
og snyrtivara er þar til sölu,“ segir Sara og
hvetur fólk til að fylgjast með viðburðasíðu
Heiðmerkur á Facebook, þar sem úrvalið sé
mismunandi eftir helgum, nýtt fólk, nýjar
vörur hverja helgi.
„Það eru þó einstaka aðilar sem eru allar
helgar. Við erum með þó nokkra bása sem eru
til góðgerðarmála; Zontaklúbbur Reykjavíkur,
Zontaklúbburinn Embla, Fríðuhús og Tógó
eru aðilar sem starfa sem góðgerðarsamtök
og rennur allur ágóði til starfsemi þessarar
félagasamtaka.
Vörurnar eru af ýmsu tagi, ullarvörur,
keramíkvörur, handgerð kerti, útskornir munir,
hnífar, gærur, brúður og bangsar, leikföng úr
tré, jólavörur af ýmsu tagi, myndir, barnaföt,
sultur, saft, tvíreykt hangilæri, grafið ærkjöt,
grafin og reykt bleikja, sósur af ýmsu tagi,
bakkelsi og svo mætti lengi telja.“
Viðamikil menningardagskrá
„Félagið rekur notalega kaffistofu þar sem
lagt er upp úr því að verðlag sé hagstætt
þannig að flest allir ættu að hafa ráð á að fá
sér kakó eða kaffisopa og með því. Viðamikil
menningardagskrá er allar helgar, bæði fyrir
börn og fullorðna.
Menningardagkráin fyrir næstu helgi verður
þannig að á laugardaginn 16. desember
klukkan 13.00 hefst upplestur á kaffistofunni,
þar sem Unnur Jökulsdóttir les upp úr bók
sinni Undur Mývatns, en hún er tilnefnd til
Íslensku bókmenntaverðlaunanna. Klukkan
14.00 hefst Barnastund í Rjóðrinu við varðeld
og les Gunnar Helgason upp úr barnabókinni
Amma er best.
Jólasveinarnir munu láta sjá sig, syngja og
tralla með börnunum. Klukkan 15.30 hefjast
tónleikar á Kaffistofu, ætla tvíburasysturnar
Gyða og Kristín Anna Valtýsdætur að syngja
fyrir gesti.
Daginn eftir, á sunnudeginum 17. desember,
klukkan 13.00 les Kristín Eiríksdóttir upp
úr bókinni sinni Elín – ýmislegt, en hún er
tilnefnd til Íslensku bókmenntaverðlaunanna.
Klukkan 14.00 hefst Barnastund í Rjóðrinu
við varðeld og les Sigrún Eldjárn upp úr
barnabókinni Áfram Sigurfljóð.
Síðan hefjast tónleikar klukkan 15.30 á
Kaffistofu og munum við tilkynna það þegar
nær dregur hver stígur á svið,“ segir Sara að
lokum. /smh
Jóla- og handverksmarkaðurinn í Heiðmörk
MÆLT AF
MUNNI FRAM
Heldur kuldalegur var kveðskapur síðasta vísnaþáttar. En þar sem veðurfar er frekar önugt það sem
af er desember, þá byrjar þessi þáttur með
hálfgerðum aftökum. Páll Guðmundsson
frá Holti í Ásum orti á útmánuðum næstu
tvær vísur:
Stabbinn grennist, geilar víkka
gengur senn á heyjaforðann.
Hokurbóndans brúnir síkka,
blæs af Grænlandsjöklum norðan.
Bítur kjúkur kyljan hörð,
kælir búki þínum,
ennþá strjúka él um jörð
jötunlúkum sínum.
Á harðindavetri orti Ingibjörg Björnsdóttir
um Gönguskörð:
Tíðin ýtum tjáist hörð,
telst því lítil gleðin.
Illt er að líta upp í Skörð
eru þau hvít og freðin.
Þessi vísa Höskuldar Einarssonar frá
Vatnshorni lýsir e.t.v. betur átthagaást frekar
en vetrarhörkum í Skorradal:
Kalla ég hátt í kaldri tíð
kveðju norður á heiðar.
Fimmtugur einn í frosti og hríð
fer þar sinnar leiðar.
Traust vinátta var með þeim Höskuldi
og Sigurði frá Brún í Svartárdal. Miklar
vísnaglettur voru með þeim meðan lífið
leyfði. Síðasta vísa sem Höskuldur orti til
Sigurðar varð til að morgni þess dags sem
Sigurður lést:
Illt þó finnist allt mitt grín
eftirminnilega
þegin kynni þín og mín
þakka ég innilega.
Eftir Sigurð allan orti Höskuldur:
Brúnar rætur, blóm og fræ
bjartar nætur kvað hann,
eg í sætið engan fæ
er mér bætir skaðann.
Þó að allt sé kvitt og klárt
er kemur að hinsta brottflutningi,
getur maður saknað sárt
Svartdælings úr Húnaþingi.
Nú verður kynntur til sögu nýr hagyrðingur
í þessum vísnaþáttum. Guðmundur
Sigurjónsson, uppalinn á Valbjarnarvöllum
í Mýrasýslu, nú starfandi sem
viðskiptafræðingur hjá Lykli fjármögnun,
og stýrir þar fyrirtækjaviðskiptum. Foreldrar
Guðmundar, Sigurjón Jóhannsson
og Inga Guðmundsdóttir búa enn á
Valbjarnarvöllum, undir áttrætt bæði tvö.
Guðmundur er augljóslega enginn byrjandi
á Braga-völlum. Hér á eftir fer bragur sem
hann nefnir „Annir á aðventu“. Á þessum
árstíma mætti kalla brag Guðmundar
sannkallað súkkulaði fyrir sauðfjárbændur:
Hrútarnir bros‘útí bæði
bísperrtir hlaupa um krær.
Ærnar fá ekkert næði
eltast þeir sífellt við þær.
Móðir og másandi reyna
mökin að klára sem fyrst.
Tekst það með eina og eina
ekkert er daðrað og kysst.
Allt þett‘af gleði þeir gera,
glampar á velsköpuð tól.
Himneskt er hrútur að vera
í hátíðarstemmningu um jól.
Meira af Guðmundi síðar. Ingólfur Ómar
Ármannsson sendi þættinum líka gullkorn
sem glatt getur bændur á aðventunni:
Þó að myrkur byrgi bólin
birtir senn við helgan yl.
Bráðum koma blessuð jólin
og bændur fara að hleypa til.
Með jóla og nýársóskum,
Árni Geirhjörtur.
192
Umsjón:
Árni Geirhjörtur Jónsson
kotabyggð1@gmail.com
Við gamla Elliðavatnsbæinn í Heiðmörk myndast iðulega ljúf jólastemning á aðventuhelgunum.
Myndir / smh
LÍF&STARF
Á markaðnum getur fólk keypt hoggin tré, eldivið og greinabúnt.
Notaleg upplestrarstund í Rjóðrinu.
Frá handverksmarkaðnum.