Dagblaðið Vísir - DV - 22.05.2020, Blaðsíða 27

35 ára bústaður fékk allsherjar yfirhalningu
Eydís Eyjólfsdóttir tók sumarbústaðinn sinn
í gegn fyrir nokkrum árum. Bústaðurinn
var byggður árið 1983 og hafði ekki tekið
neinum breytingum síðan þá. Það var allt
upprunalegt í honum og tók Eydís hann svo
sannarlega í nefið. Hún segir að lykillinn að
því að halda kostnaðinum í lágmarki sé að
gera sem mest sjálf og eiga góða að sem
geta hjálpað.
Skemmtilegt verkefni
„Pabbi minn er smiður sem er kominn á
eftirlaun. Hann á heiðurinn af því að þetta
„makeover“ var gert eins vel og vandlega og
raunin varð. Hann er einstaklega útsjónar-
samur og snillingur í að hanna fallegar
innréttingar í lítil rými. Ég lagði upp með
ákveðið útlit sem hann var sammála mér um.
Úr varð skemmtilegt verkefni okkar feðgina
sem hann verkstýrði með sinni þekkingu og
reynslu,“ segir Eydís.
Bústaðurinn er 54 fermetrar. „Allt ferlið
hófst í nóvember 2017 og tók í það heila eitt
og hálft ár. Mest lá á í byrjun að mála að
innan og breyta eldhúsinu. Annað kom svo
smám saman bara,“ segir Eydís.
„Það ætlaði aldrei að stytta upp rigninga-
sumarið 2018 og það var ekki fyrr en í ágúst
sem við gátum loksins málað bústaðinn að
utan, það var stór og góð breyting, punktur-
inn yfir i-ið.“
Í heildina kostaði yfirhalningin um hálfa
milljón, en það var allt efniskostnaður. „Það
er heilmikill sparnaður í því að vinna sem
mest sjálfur og eiga góða að,“ segir Eydís.
Breytingarnar
Eydís fer yfir allar þær breytingar sem voru
gerðar á bústaðnum.
„Allur bústaðurinn var málaður að innan,
í ljósgráu og hvítu. Við ákváðum að halda
þverbitunum dökkum sem gaf ákveðinn stíl.
Héldum einnig gólfefninu í bústaðnum, nema
inni á baði þar sem við fjarlægðum gamlan
dúk og settum vínyldúk í staðinn. Eldhúsið
var alveg tekið í gegn, ný eldhúsinnrétting
og ný tæki, bættum einnig við uppþvottavél.
Settum nýjar innréttingar á ganginn og
forstofuna. Tókum niður vegg, bættum
einangrun í veggi. Við settum nýja innrétt-
ingu inn á bað og keyptum nýtt klósett,
sturtugler og handklæðaofn. Við styrktum
svo undirlag heita pottsins og endurnýj-
uðum timburvegginn í kring þar sem þurfti.
Svo máluðum við allan bústaðinn að utan og
þakið, og endurnýjuðum þá glugga sem var
komin móða í,“ segir hún.
Góð ráð
Eydís gefur þeim ráð sem eru að hugsa um
að taka sumarbústaðinn í gegn.
„Ég mæli til dæmis með að fá ráðgjöf
sérfræðinga í málningarverslun áður en
ákveðið er að mála, það var margt sem ég
vissi ekki og hefði verið auðvelt að klúðra.
Eyða mestu í að taka eldhúsið í gegn, þannig
að gaman sé að elda og auðvelt sé að ganga
frá. Flýta sér hægt. Með því að verja tíma
í bústaðnum sérðu smám saman hvaða
breytingar eru bestar. Plana, forgangsraða
og njóta þess að sjá umbreytinguna,“ segir
hún.
Hvað er alveg nauðsynlegt að hafa í bú-
staðnum að þínu mati?
„Þægindi og smá lúxus. Algjör nauðsyn að
hafa uppþvottavél, heitan pott, internet og
router fyrir sjónvarp. Þetta á að vera staður
til að slaka á og njóta og maður á einskis að
sakna, bara sömu þægindi og heima, með
þeim plús að vera nálægt náttúrunni og í
burtu frá stressi.“
Byggði útieldhús á einum degi
Eva Ósk Guðmundsdóttir byggði útieldhús
við sumarbústaðinn. Hún er að læra lands-
lagsarkitektúr við LBHÍ og hafði áður teiknað
nokkrar gerðir af útieldhúsum fyrir verkefni.
„Við erum með frekar lítið sumarhús
og oft þegar vinir okkar koma í heimsókn
getur orðið ansi þröngt inni. Okkur vantaði
geymslu og þurrkaðstöðu fyrir eldivið því
við kyndum bústaðinn með kamínu. Þetta
varð því tvöfaldur ávinningur, stækkuðum
eldunaraðstöðuna um helming og fengum
gott pláss undir eldivið,“ segir Eva Ósk.
Einföld smíði
Eva Ósk smíðaði og málaði eldhúsið á einum
degi. Maðurinn hennar smíðaði svo þakið og
setti báruplastið á.
„Ég teiknaði það upp í SketchUp til að ein-
falda mér verkið upp á að öll mál stæðust.
Maðurinn minn var búinn að smíða fjórhjóla-
geymslu svo ég ákvað að nota bakhliðina
á henni til að hafa eldhúsið á. Ég var þá
komin með vegg sem ég notaði og smíðaði
eldhúsið á honum. Ég vildi að það sæist sem
minnst í grillið, þannig að ég smíðaði utan
um það, og hafði hlera að framan svo ég
gæti tekið grillið út og sett inn yfir veturinn,“
segir hún.
Eva Ósk segir að kostnaðurinn hafi alls
ekki verið mikill, þar sem hún notaði gagn-
varða furu í allt eldhúsið og þetta hafi verið
mjög einfalt í smíði. „Það sem var kannski
dýrast er að ég notaði báruplast í þakið á
eldhúsinu,“ segir hún.
Hvað er alveg nauðsynlegt að hafa í
sumarbústaðnum að þínu mati?
„Frábært útisvæði er það sem mér þykir
skipta mestu í sumarbústöðum, að það sé
góð tenging milli úti- og innisvæða. Góðir
pallar í kringum húsin, gott skjól án þess að
skyggja á útsýni, útieldhús, hvítvínsskýli og
heitur pottur. Mér þykir útisvæðið skipta
meira máli í okkar bústað heldur en stærð
sumarhússins. Við notum bústaðinn lang-
mest frá apríl til október og erum rosalega
mikið úti þegar við erum þar. Við byggðum
okkur líka „hvítvínsskýli“, yfirbyggða úti-
stofu sem er að hluta opin en að hluta lokuð.
Við notum svæðin mjög mikið og þetta
stækkar notkunarsvæðið, að hafa góða staði
til að njóta úti með fjölskyldu og vinum.“
Eva Ósk og fjölskylda nota útieldhúsið mikið. MYNDIR/AÐSENDAR
Baðherbergið er bjartara yfirlitum eftir breytingu. MYND/AÐSEND Dagsbirtan fær að njóta sín. MYND/AÐSEND
FYRIR BREYTINGAR
SUMARHÚS SÉRBLAÐ 9 DV 22. MAÍ 2020