Iðjuþjálfinn - 2020, Page 46

46Iðjuþjálfinn 1/2020
GREIN
Í vor urðu ákveðin tímamót hjá Iðjuþjálfunarfræðideild Háskólans á
Akureyri þar sem síðasti hópurinn, sem hóf nám samkvæmt eldri
námskrá, útskrifaðist með 240 eininga BS-gráðu og gat í kjölfarið
sótt um leyfisveitingu hjá Embætti landlæknis til að starfa sem
iðjuþjálfi.
Ég og fleiri kennarar, sem starfa við deildina, tilheyrum þeim hópi
sem útskrifaðist fyrst, samkvæmt eldri námskrá. Það var árið 2001.
Fyrsta kennslustundin okkar var í húsnæði HA við Þingvallastræti
þar sem nú er bar Icelandair-hótelsins. Í fyrstu kennslustundinni
okkar mætti galvaskur kennari, hún Guðrún Pálmadóttir, og leiddi
okkur í allan sannleikann um iðju og hugmyndirnar að baki
iðjuþjálfun. Ári seinna vorum við fyrstu nemendurnir á Sólborg og
þar hittum við Kristjönu Fenger. Á þeim tíma var Sólborg ekki í
alfaraleið og Kristjana hafði ekki komist vandræðalaust til að hitta
nemendur, sagði okkur að hún hefði þurft að redda sér fari með
vörubílstjóra til að mæta á svæðið. Eftir að hafa kennt öllum sem
hafa útskrifast úr iðjuþjálfun á Íslandi síðustu 23 árin ætla Kristjana
og Guðrún að fara að sinna öðrum verkefnum í meiri mæli og munu
láta af störfum sem fastir starfsmenn deildarinnar í haust. Vil ég
færa þeim mínar bestu þakkir fyrir óeigingjarnt starf í þágu
deildarinnar og mikið brautryðjendastarf við Háskólann á Akureyri.
Nú í vor var það mikið fagnaðarefni að fyrsti árgangurinn útskrifaðist
samkvæmt nýrri námskrá með 180 ECTS-eininga BS-gráðu í
iðjuþjálfunarfræði. Á yfirstandandi skólaári verður síðan eins árs 60
ECTS-eininga viðbótarnám á meistarastigi í iðjuþjálfun til
starfsréttinda kennt í fyrsta skipti. Skipulag námsins þar er með
verulega breyttu sniði og síðasta vetur fór fram mikil vinna í
deildinni vegna námsleiðarinnar þar sem meðal annars fóru 800
tímar í vettvangsnám samhliða innlögn á fræðilegu efni. Ég vil
þakka öllum þeim iðjuþjálfum sem starfa víðs vegar í samfélaginu
og hafa lýst sig reiðubúna að vinna með okkur við menntun
nemenda í þessari námsleið. Það eru því spennandi tímar fram
undan hjá okkur.
Á síðustu tveimur áratugum hefur orðið mikil þróun innan
iðjuþjálfunar, bæði á Íslandi og á alþjóðlegum vettvangi. Áður unnu
iðjuþjálfar nánast eingöngu á sjúkrahúsum og öðrum heilbrigðis-
stofnunum. Nú á dögum vinna þeir víðs vegar í samfélaginu og
sinna þjónustu við ólíka þjóðfélagshópa. Þannig vinna iðjuþjálfar
nú á ýmsum sviðum innan velferðarkerfisins og í margvíslegu
umhverfi þar sem fólk stundar sína daglegu iðju. Starfsvettvangur
iðjuþjálfa er því mjög fjölbreyttur og á tímum örra breytinga innan
menntakerfis og félags- og heilbrigðisþjónustu eru tækifærin
óþrjótandi.
Nútíma áherslur í iðjuþjálfun endurspeglast skýrt í nýju náms-
fyrirkomulagi en námið byggir jafnt á félags- og heilbrigðisvísindum.
Niðurstöður árlegrar könnunar opinberu háskólanna sýna að mikill
meirihluti nemenda á þriðja námsári í iðjuþjálfunarfræði er mjög
ánægður með námið. Þeim finnst þeir hafa öðlast meira sjálfstraust
í náminu og það hafi eflt gagnrýna hugsun. Þeir telja sig færari að
tjá sig skriflega og munnlega og geta axlað ábyrgð á nýjum
verkefnum. Þeir upplifa sig jafnframt meðvitaðri um eigin ábyrgð í
samfélaginu og um mikilvægi þess að þar séu til staðar jöfn tækifæri
borgara. Svarhlutfall var 82% í Iðjuþjálfunarfræðideild.
Í nýlegu viðtali við Þóru Leósdóttur, formann Iðjuþjálfafélags
Íslands, kom fram að auglýst væri að jafnaði eftir iðjuþjálfa einu
sinni í viku meðal félagsmanna og er þetta skýrt dæmi um þá miklu
þörf sem er fyrir störf iðjuþjálfa. Það er því afar mikilvægt að tryggja
nægjanlegan fjölda nemenda sem hefur verið brýnt verkefni
undanfarin ár og hafa nemendur, kennarar og iðjuþjálfar unnið
markvisst að því með að kynna fagið á sem fjölbreyttastan hátt. Það
er gleðiefni að í ár voru tæplega 80 umsóknir nýnema í
iðjuþjálfunarfræði og er það 30% aukning frá því í fyrra. Mikilvægt
er að við höldum áfram að kynna okkar góða fag þar sem við höfum
örugglega öll fengið spurninguna: „…og hvað gera iðjuþjálfar?“
Að lokum óska ég nýbrautskráðum nemendum innilega til hamingju
með áfangann.
Sólrún Óladóttir
deildarformaður Iðjuþjálfunarfræðideildar
Háskólans á Akureyri
Sólrún
PISTILL FRÁ
DEILDARFORMANNI
IÐJUÞJÁLFUNARFRÆÐIDEILDAR HA