Fjarðarfréttir - 01.03.1985, Blaðsíða 22

22
FJARÐARFRÉTTIR
Fylgst með Hjálparsveit skáta á æf ingu
Fyrir nokkrum vikum lögðu Fjarðafréttamenn inn beiðni hjá formanni
Hjálparsveitar skáta í Hafnarfirði þess efnis að fá að vera viðstaddir
æfingu hjá sveitinni. Ólafur Proppé, formaður, brást vel við þessari beiðni.
Fimmtudaginn 14. mars sl. kom svo kallið: Meiri háttar æfing átti að fara
fram þá um kvöldið.
Þegar við komum upp í Hjálparsveitarhús á tiisettum tíma hafði sveitar-
mönnum verið afhent svohljóðandi tilkynning:
„Tvœr þyrlur rákust saman á flugi yfir Hafnarfirði. Báðar þyrlurnar
reyndu nauðlendingu á Hamrinum í miðjum Hafnarfirði. Vitað er að í
annarriþyrlunni voru fjórir farþegar ásamt flugmanni, en ekki er vitað um
fjölda manna í hinni vélinni, en vitað er að hún gat flutt 12 farþega.
Farið á staðinn og gerið nauðsynlegar björgunaraðgerðir og flytjið hina
slösuðu á sjúkrahús (hús. H.S.H.)“.
Svavar Geirsson, sem stjórnaði aðgerðunum, skipaði nú hópnum fyrir
verkum og síðan var haldið af stað í flýti upp á Hamar.
Við slógumst í för með Ólafi Proppé sem fræddi okkur nánar um fyrir-
hugaðar björgunaraðgerðir. Félagar úr Hjálparsveit skáta í Reykjavik
höfðu tekið að sér að leika siasað fólk og höfðu komið sér fyrir víðs vegar
utan í Hamrinum. Hafnfirðingarnir áttu svo að finna þá, greina hve alvar-
lega þeir voru slasaðir, veita þeim fyrstu hjálp og koma þeim síðan í bílana,
sem siðan áttu að flytja hina slösuðu á sjúkrahús (sem reyndar var Hjálpar-
sveitarhúsið). Sérstakir eftirlitsmenn áttu svo að fylgjast með bjðrguninni
til að meta hvernig til tækist.
Við fylgdumst nú með leitinni. Tveir leitarflokkar skiptu með sér svæð-
inu en þriðji flokkurinn, sjúkraflokkurinn, bjó sig undir að sinna hinum
slösuðu. Leitarflokkarnir þustu af stað og voru fljótir að finna fólkið og
koma því til hjálpar. Um Ieið og einhver fannst tilkynntu viðkomandi
leitarmenn Svavari, leitarstjóra, það i talstöð og skýrðu jafnframt frá því
hve alvarleg meiðsli hins slasaða voru.
Að dómi okkar leikmanna gekk þessi svokallaða aðgerðaræfing mjög
vel, og innan skamms voru allir fundnir og komnir í hlýjuna uppi í Hjálpar-
sveitarhúsi ásamt leitarmönnum. Þegar við kvöddum og þökkuðum fyrir
kvöldið sat Hjálparsveitarfólkið yfir rjúkandi kaffibollum og ræddi saman
um árangur æfingarinnar.
Hluti leitarmanna hlýðir á upplýsingar um „þyrluslysið“.
Leitarmenn halda af stað.

Aðstæður á „slysstað" voru mjög erfiðar.
Hér er verið að huga að „sárurn" og kanna hversu alvarleg þau eru.
„Sjúklingarnir" voru síðan fluttir í sjúkrabíl sveitarinnar
á „sjúkrahús“.