Strandapósturinn - 01.06.2016, Síða 101

99
dregið af því að í mörg ár eftir að það var brotið var það svart og
greri illa.
Milli Stekkjarness og Hærra-Stekkjarness er stykki sem nefnist
Miðnes (328) og skilur Hærra-Stekkjarnesið það og Svartastykki.
Utan og ofan við Dýrakletta er Dýraklettamýri (329). Vestan við
Bryggju er Ræman (330) sem er mjótt stykki milli Bryggju og
skurðar vestan hennar. Bryggjuslétta (331) liggur aftur á móti
austan við Merarbryggju. Stór hluti af Móholtinu hefur einnig
verið brotinn og þar ræktað tún.
Halldór Jónsson, sem lengi bjó á Munaðarnesi (1935–1963) og
átti hluta í jörðinni, girti af skika út í Landinu og var sú girðing
nefnd eftir honum Halldórsgirðing (332). Að vestan liggur
girðingin úr Skálanesvík rétt heiman til við Skálanesið og þaðan
sjónhendingu upp í hlíðina milli Hærri- og Neðri-Dýrakletta, að
ofan með hlíðarfætinum og að austan niður í utanverðan Ytri-Bás
um mið Svörtunef. Samúel Vilberg Jónsson keypti þennan
jarðarpart árið 1962 og síðan hefur Halldórsgirðing verið nefnd
Villagirðing (333). Í Villagirðingu er mikið af gömlum mógröfum
sem nú eru að mestu uppgrónar. Þær eru nefndar Grafir (334).
Klettarnir fyrir ofan þessar fornu mógrafir heita Móklettar (335)
og eru þeir innan Villagirðingar. Þarna þótti slakt mótak. Á Mó-
klettunum var grindaður mór.
Svæðið frá Krossklettum og út að Bryggju hét einu nafni Mýrar
(336) áður en það var ræst fram og þurrkað. Sagt var „að fara út á
Mýrar“. Mýrlendið á Svörtunefjunum og út að Sjálfbergi heitir
Svörtunefsmýrar (337) eða Sortunefsmýrar (338). Sagt var „að
heyja á Sortunefjunum“. Niður af Torfahrygg er Torfahryggsmýri
(339).
Munaðarnesfjall
Nú förum við aftur heim að bæ og teljum hryggina í hlíðinni út
eftir. Fyrir ofan bæinn (um 100 m utan við hann) er Skrautu-
hryggur (340) og á honum neðst er Imbusteinn (341). Skrautu-
hryggur er nokkuð breið aurkeila neðan undir Dagmálalæk og
sunnan hryggjarins er Hvammur. Imbusteinn er sléttur steinn
sem nær manni í brjóst og er hann um tveggja metra langur.
Steinninn er kenndur við Ingibjörgu Jónsdóttur sem gift var Guð-