Skessuhorn - 18.05.2022, Blaðsíða 17

MIÐVIKUDAGUR 18. MAÍ 2022 17
verið að endurskoða allar stúdents­
brautir skólans.“
Nú er komið að kjarna málsins
og blaðamaður hlustar af athygli.
„Hver einasti áfangi er tekinn og
bætt inn í hann stafrænni hönnun
og miðlun. Allir áfangar voru sem
sagt skrifaðir upp á nýtt með það
í huga að bæta slíku inn og menn
þurftu þá að nýta aðra miðla og
aðra tækni í verkefnaskilum og
slíku. Aðrir skólar hafa reyndar ver­
ið að auka þessa nálgun, en núna er
þetta komið inn í allar áfangalýs­
ingar hjá okkur.“
Unglingur og er
í mótun
Bragi segir kennara hafa tekið mjög
vel í þessa nýju hugsun. „Enda er
þessi skóli unglingur sem er í örri
þróun. Það er í eðli skólans að hann
er opinn fyrir breytingum. Hann
er tiltölulega nýr svo við erum ekki
komin í neitt far, stefna skólans er
framfarir og breytingar. Því þurfum
við að viðhalda og erum sannarlega
að því núna.“
Bragi dregur ekki dul á það að
þetta sé búið að vera mikil vinna.
„Allir kennarar hafa tekið að sér
mikla vinnu vegna þessa,“ seg­
ir hann. „Það er ánægjulegt hvað
nemendur taka vel í lífsnámið, enda
er það skrifað upp úr þeirra hug­
myndum. Þau eru mjög spennt fyrir
öllu sem viðkemur sköpun og tækni,
sem þau eru jú með í höndunum
alla daga. Það er líka þannig að
þegar við erum að hafa áhyggjur af
því hvað þau nota snjalltæki mikið
verðum við að hafa í huga að það er
ungu fólki eðlislægt að sjá alla mið­
lun í því formi, en ekki í löngum
bókum eða ritum. Svo þeim finnst
þetta örugglega ekki eins mikið
nýnæmi eins og okkur sem erum
eldri,“ segir hann og hlær.
Breytingar heilla
Bragi segir nýjar hugmyndir höfða
til sín. „Ég er ekki stöðnuð týpa
og vil ekki vera það. Mig langar í
breytingar og hef meira gaman af
því ef hlutirnir breytast í kringum
mig en ekki. Svo ég var alveg opinn
fyrir því að takast á við þetta. En ég
fann líka þegar ég tók við starfinu að
það var mikill samhljómur með mér
og stjórn skólans og það var mikill
styrkur í þeim. Þau búa yfir mikl­
um metnaði, alveg eins og ríkir hér
almennt innan dyra,“ segir hann.
Nýtt starf í
skapandi rými
Athygli vakti að nýverið auglýsti
skólinn eftir umsjónarmanni í
skapandi rými. Bragi segir að rým­
ið sjálft sé í mótunarferli ennþá og
starfið í heild sinni líka. „En þarna
á að blanda saman tækni, listum
og sköpun. Ekki STEM heldur
STEAM. Ein mesta nýlundan felst
í þessum fimmtán einingum sem
nemendur munu taka og bera það
heiti.“
Talið berst aftur að nýjum
straumum. „Ég tel að maður eigi
ekki að vera alltof lengi í því sama,
það sé nauðsynlegt að opna augun
öðru hvoru, breyta til og fá meiri
þekkingu og reynslu. Hjá bankan­
um fékk ég mikilvæga stjórnunar­
reynslu, svo sem í mannauðsmál­
um. Þetta er stórt fyrirtæki með
margt starfsfólk. Þá reynir m.a.
á samskiptahæfnina sem ég tel
gríðarlega mikilvæga í allri stjórn­
un. Svo fór ég fyrir nokkrum árum
í mastersnám á Bifröst í forystu og
stjórnun sem hefur gagnast mér
mikið. Þegar ég sá starf skólameist­
ara MB auglýst vildi ég prófa það,
var spenntur fyrir að takast enn og
aftur á við eitthvað nýtt. Þó var ég
búinn að vera að vinna í umhverfi
sem var mjög breytilegt og það
var t.d. mikil lífsreynsla að fara
að vinna í banka árið 2007,“ segir
Bragi brosandi.
Samstarf við
alla háskóla
Talið berst að grundvallarvinnunni
að baki þessu nýja námsfyrir­
komulagi. „Við vinnum námsefni
STEAM í samstarfi við alla háskóla
á landinu og áfangalýsingarnar
líka,“ segir Bragi. „Það er starfs­
hópur í gangi núna sem bæði sam­
anstendur af fólki héðan og fulltrú­
um háskólanna í landinu og það er
formlegur samstarfssamningur við
þá alla um þetta. Meðal annars mun
menntavísindasvið Háskóla Íslands
vera með okkur í að skoða hvern­
ig mun ganga að vera með þessa
áfanga.“ Hann segir það vera besta
vitnisburðinn um að skólinn sé að
slá rétta tóna hversu mikinn áhuga
og samstarfsvilja sé að finna hjá
háskólunum. „Fulltrúar borgfirsku
háskólanna tveggja eru með okkur
í hópnum, en einnig fólk frá öllum
hinum háskólunum. Einn hópur er
að móta námsefnið og annar hópur
er leiðbeinandi, les yfir og fleira.“
Hann segir þessa breytingu á
brautunum vera komna með sam­
þykkt Menntamálastofnunar og
bíða lokaafgreiðslu. „Svo við mun­
um kenna eftir þessum nýju braut­
um frá og með næsta hausti, þ.e.
allir nýir nemendur skrá sig inn á
þær og eldri nemendum mun bjóð­
ast þessir áfangar sem val,“ segir
Bragi.
Í síðustu viku skrifaði svo
Ásmundur Einar Daðason
mennta­ og barnamálaráðherra
undir formlega yfirlýsingu um
stuðning ráðuneytisins við verk­
efnið sem nýsköpun í skólastarfi.
Bragi segir að það hafi þurft að
hagræða ýmsu til að breytingarn­
ar rúmuðust innan námsins. „Við
breyttum m.a. hagfræði­ og fjár­
málalæsikennslunni af því sá áfangi
er nú hluti af lífsnáminu. Við fækk­
uðum líka einingafjölda ákveðinna
áfanga úr sex í fimm og tókst það
án þess að gefa neitt eftir í gæðum
námsins.“
Framtíðarsýn
Nú stunda um 150 nemend­
ur nám við skólann, þar af um
hundrað í staðnámi. Aðspurður
um nemendahópinn segir Bragi
að stærstur hluti hans komi úr
Borgar fjarðarhéraði. „En við finn­
um fyrir aukningu í hópi þeirra
nemenda sem koma lengra að og
viljum leggja áherslu á að búa sem
mest í haginn fyrir þá nemendur
svo sem varðandi heimavistarmál,“
segir hann. „Það er mikilvægt fyr­
ir þennan skóla sem aðra að nem­
endahópurinn sé öflugur og með
breiðan bakgrunn og áhugasvið.“
Bragi hefur ákveðnar skoðanir
á hlutverki og framtíðarsýn skól­
ans. „Sérstaðan hans er mjög mik­
ilvæg, við verðum að sýna að við
höfum eitthvað annað fram að
færa en að vera bara næsta skóla­
stig eftir grunnskóla. Við viljum
efla staðnám en jafnframt taka þátt
í ákveðinni þróun í fjarnámi. En
félagslíf og fleira er líka þunga­
miðja öflugs skóla svo staðnámið
er mikilvægt.“ Blaðamaður spyr
um staðsetningu Framtíðarversins
innan skólans og Bragi segir að
því muni vera komið fyrir á fyrstu
hæðinni, rétt við innganginn. „Þar
var RÚV með aðstöðu áður en
hefur nú færst innst á ganginn og
við munum verða með hljóð­ og
myndver þar sem RÚV var áður,“
segir hann. „Þar fyrir framan er
kennslustofa sem verður jafn­
framt hluti af verinu.“ Hann segir
að vinnuheiti þess sé Kvika og það
hljómar vel í eyrum blaðamanns.

Mikilvægar samgöngur
Bragi segir ýmsar breytingar hafi
orðið síðan hann hóf störf. „Nú er
ekki kennt í 2x40 mínútur heldur
í 1x60 mínútur. Við færðum skól­
ann líka fram til kl. 9 á morgnana,
vildum athuga hvernig nemend­
um liði með það, það er ágætlega
hagkvæmt og hefur verið vel tekið.
Svo eru komnar almenningssam­
göngur í uppsveitirnar sem nýtast
skólanum, það var gerður tveggja
ára samningur um það í samvinnu
við sveitarfélagið og með tilstyrk
frá SSV, Samtökum sveitarfélaga á
Vesturlandi.“
Skólabílar grunnskólans nýt­
ast með þessum hætti bæði fyrir
almenning og nemendur MB. Bragi
segir þetta hafa tekist mjög vel. „Það
er ekið með þeim að skólunum á
Varmalandi og Kleppjárnsreykjum
og þaðan er svo bíll sem er kominn
hingað í skólann kl. 9 á morgnana.
Þannig nýtast grunnskólabílarnir
sem safnbílar. Við bindum miklar
vonir við að þetta fyrirkomulag sé
komið til að vera, það er afar mik­
ilvægt fyrir skólann, með þessum
hætti eru grunnskólabílarnir orðnir
hluti af almannenningssamgöngum
í sveitarfélaginu,“ segir Bragi.
Hann vill gjarnan sjá vinnudag
nemenda hefjast áfram klukkan níu,
ekki síst út af þeim sem eiga lengra
að sækja skóla. Hann nefnir einnig
aðra nýjung í skólastarfinu. „Við
höfum í á annað ár verið með vinnu­
stofur einn dag í viku. Þá brjótum
við upp alla stundaskrá, en það er
skyldumæting og allir kennarar eru
til staðar. Nemendur vinna svo að
sínum verkefnum frá kl. 9­14. Það
má segja að við séum þarna með
verkefnatíma sem safnað er saman á
þessa daga. Nemendur og kennarar
nýta sér þetta með góðum árangri.
Þarna er verið að vinna með nýtt
fyrirkomulag þar sem nemendum
gefst kostur á að vinna sjálfstætt og
um leið taka ábyrgð á eigin námi.
Við erum mjög opin fyrir þróun og
endurskoðun verkefna og það hefur
reynst okkur vel.“
Uppruninn
Í lok upplýsandi samtals um skóla­
starfið er kominn tími til að
forvitnast svolítið um Braga sjálf­
an. Hann segist vera sveitadreng­
ur og það finnst blaðamanni hljóti
að vera gott veganesti í starfi skóla­
meistara svona skóla. „Ég ólst upp
á Birningsstöðum í Ljósavatns­
skarði. Fyrst ætlaði ég að vera sauð­
fjárbóndi en lærði svo til kennara
við Háskólann á Akureyri og kom
fyrst hingað í Borgarfjörð til að
kenna á Varmalandi, segir Bragi.
„Ég var þar í tvö ár en starfaði síð­
an við Háskólann á Bifröst og sá
um tæknihlið fjarnámsins þar á
miklum uppvaxtartíma sem var
verðmæt reynsla. En árið 2007 fór
ég að vinna í Íslandsbanka, starf­
aði þar að tæknimálum og ók til
vinnu milli Borgarness og Reykja­
víkur í tæp þrettán ár. Síðast sinnti
ég deildarstjórastöðu tækniþjón­
ustu hjá bankanum.“ Blaðamað­
ur spyr hvort ekki hafi verið þreyt­
andi að aka alltaf svona á milli, en
það vafðist ekki fyrir Braga. „Það
er ekkert mál að vinna í Reykjavík
og það gæti ég alveg gert aftur ef
á þyrfti að halda. Það var vissulega
ákveðin lífsstílsbreyting, en mér
fannst þetta vandalaust.“
Fjölskyldan
Bragi býr ásamt fjölskyldu sinni
í Borgarnesi. „Konan mín heit­
ir Hrafnhildur Tryggvadóttir og
starfar sem deildarstjóri umhverfis­
og framkvæmdamála hjá Borgar­
byggð. Hún kemur úr Flóa svo hún
er sveitastelpa eins og ég. Við eig­
um þrjár dætur á aldrinum 12 –
25 ára. Eftir að við tókum saman
ákváðum við að mætast á miðri leið
og búa í Borgarnesi og því höfum
við ekki séð eftir. Það hefur alltaf
verið tekið vel á móti okkur og hér
er alveg einstakt að ala upp börn,“
Þingeyski andinn
Nú er komið að lokum þessa
spjalls um kjarnmikið skólastarf
og spennandi framtíð Mennta­
skóla Borgarfjarðar. Bragi lítur
björtum augum á starfsemina, en
einnig á samfélagið sem skólinn til­
heyrir. „Ef það er eitthvað sem ég
vildi breyta hér myndi ég vilja taka
þingeyska hógværð á þetta; sumir
nefna það þingeyskt mont. Við eig­
um að vera stolt af því sem við eig­
um og höfum akkúrat núna, ekki
velta okkur upp úr því sem betur
má fara heldur því sem við erum að
gera gott. Svo við þurfum að efla
með okkur þingeyska hógværð sem
sumir kalla þingeyskt mont,“ segir
Bragi að endingu. gj
Fjölskyldan á góðri stund í London. Frá vinstri: Bragi, Kristný Halla Bragadóttir, Hrafnhildur, Valborg Elva Bragadóttir og
Ester Alda Hrafnhildar Bragadóttir.
Nemendur tóku virkan þátt við gerð tillagna um skólaþróun í MB.
Þátttaka nemenda í viðburðum er mjög góð, til að mynda mæta 80-90% nemenda
í staðnámi á árshátíð.