Hugur og hönd - 2021, Blaðsíða 19

ÚTSAUMI
NJÁLUREFILS LOKIÐ
KRISTÍN HELGA ÞÓRARINSDÓTTIR
Í september á liðnu ári urðu þau tímamót að síðasta sporið var
saumað í Njálurefilinn. Þar með lauk útsaumi refils sem þegar
upp var staðið var 91,16 metrar að lengd. Til samanburðar má
geta að hinn víðfrægi Bayeux-refill frá 11. öld er 70 metrar.
Verkefninu var ýtt úr vör að frumkvæði tveggja kvenna úr
Rangárþingi, þeirra Christinu M. Bengtsson og Gunnhildar
Eddu Kristjánsdóttur, og var hafist handa við saumaskapinn
í Sögusetrinu á Hvolsvelli í febrúar árið 2013. Eins og fram
kemur á vefsíðu verkefnisins er því ætlað að varðveita menn-
ingararfleifð héraðsins á sérstæðan hátt og laða að ferðamenn
með áhuga á Íslendingasögunum, listum og handverki.
Kristín Ragna Gunnarsdóttir myndlistarmaður og rithöfundur
er hönnuður refilsins. Af honum má lesa framvindu Njáls sögu
í myndum og máli, unnum með svonefndum refilsaumi með
íslensku ullareinbandi í hördúk.
Ákveðinn kjarni íbúa í Rangárþingi kom reglulega saman og
saumaði út í refilinn, en auk þess var hafður sá háttur á að
leyfa gestum og gangandi að spreyta sig með nálina að
fenginni kennslu í refilsaumi. Miklar vinsældir þessa höfðu
í för með sér að útsaumurinn tók skemmri tíma en áætlað
hafði verið, eða um sjö og hálft ár í stað tíu. Unnið er að því
að búa Njálureflinum viðeigandi sýningarstað á Hvolsvelli.
Lesa má nánar um Njálurefilinn á vefsíðunni www.njalurefill.is
Ullarband af
norður-þingeysku
Sauðfé.

Náttúrulegt
Ólitað band.
www.Gilhagi.is
afsláttarkóðinn: Huguroghönd
5% afsláttur
í Vefverslun út árið 2021.
Gilhagi, 671 Kópasker - www.facebook.com/gilhagi - Gilhagi@gilhagi.is
Hér sitja við sauma, frá vinstri talið, þær Sigurbjörg Sveinsdóttir, Helga Sigurðardóttir
og Katrín Óskarsdóttir. Ljósmynd: Gunnhildur Edda Kristjánsdóttir.