Sjómannablaðið Víkingur - 01.04.2008, Síða 38

38 - Sjóm­annablaðið Víkingur­
Matís ohf. opnaði nýlega líftæknismiðju
fyrirtækisins í Verinu á Sauðárkróki
en þar er fyrirtækið í góðri sambúð með
Háskólanum á Hólum. Líftæknismiðjan gegnir
lykilhlutverki fyrir Matís og með opnuninni
er stefnan sett á að íslensk líftækni verði í
fararbroddi á sviði líftækni og lífvirkra afurða
í Norður­Evrópu innan fimm ára.
Líftæknismiðjan skapar rannsóknaraðstöðu
með tilheyrandi vinnsluaðstöðu þar sem vís-
indamenn og frumkvöðlar í líftækni geta þróað
vörur sínar og vinnsluferla í samvinnu við
Matís. Það þarf ekki að koma á óvart að Matís
opni þessa smiðju í Skagafirði enda er mat-
arkista Skagfirðinga alþekkt en þar vex hún
og dafnar í skjóli öflugs og fjölbreytilegs mat-
vælaiðnaðar. Líftæknismiðjan er opin öllum
landsmönnum og þar geta einstaklingar og
fyrirtæki fengið aðstöðu til skemmri tíma til að
framleiða afurðir. Smiðjunni er ætlað að vera
nokkurs konar klakstöð nýrra sprotafyrirtækja
í líftækni og mikilvægur þáttur í að stytta ferlið
frá hugmynd til markaðar.
Á rannsóknastofunni verður fyrst í stað lögð
áhersla á mælingar á lífvirkum eiginleikum
efnisþátta íslenskra matvæla og í vinnslusal er
unnið að því að koma hugmyndum sem virka
vel á rannsóknastofu í framkvæmd með meira
magni en því sem rúmast í tilraunaglösum;
færa hugmyndirnar sem þá eru aðferðir nær
matvælaiðnaðinum.
Matís hyggst efla enn frekar hið góða sam-
starf sem fyrirtækið hefur átt við fyrirtæki í
matvælaiðnaði í Skagafirði og Háskólann á
Hólum, því með slíka samstarfsaðila í heima-
héraði er Matís vel í sveit sett.
Arnljótur B. Bergsson
MATÍS í Verinu á Sauðárkróki
Sjöfn Sigurgísladóttir forstjóri Matís og Einar K. Guðfinnsson, sjávarútvegs­ og landbúnaðar­
ráðherra klippa á borðann
Frá opnuninni.